ଭାଇରାଲ୍ ପୋଷ୍ଟମୋର୍ଟମ୍‌; କରୋନା ଜିହାଦ, ସତ ନା କୁହେଳିକା !

ଭୁବନେଶ୍ୱର: ମାତ୍ର ଗୋଟିଏ ଦିନ ପୂର୍ବରୁ ଅର୍ଥାତ୍ ଏପ୍ରିଲ୍ ୬ରେ ଏକ ଭିଡିଓ ଭାଇରାଲ୍ ହୋଇଛି । ଯେଉଁଥିରେ ଜଣେ ବ୍ୟକ୍ତି ଗାଡିରେ ଲଦା ହୋଇଥିବା ବ୍ରେଡ୍ ବା ପାଉଁରୁଟି ସହ କିଛି ଅସାମାନ୍ୟ ଗତିବିଧୀରେ ସାମିଲ ହୋଇଥିଲା ।

PLEASE NOTE? फिलहाल के वातावरण को देखते हुए, पाव, ब्रेड, टोस्ट,बेकरी बिस्किट आइटम से परहेज करें, क्योंकि 95% बेकरी मुस्लिम के हाथ मे है, और उनके कर्मचारी भी मुस्लिम वर्ग के ही है जो कि क्वारंटाइन को मान नही रहे, ओर सायद इन मे से कोई रोगी (infected) हो सकता है।@ippatel pic.twitter.com/NJtbt6FR2G

— Diksha Kaushik दीक्षा कौशिक (@MsDikshaKaushik) April 6, 2020

ଏହି ଭିଡିଓଟିକୁ ଅପଲୋଡ କରି ଭାରତରେ କିଛି ଲୋକ କରୋନା ଜିହାଦ ନାମକ ଶବ୍ଦକୁ ଜନ୍ମ ଦେଇଛନ୍ତି । ଭିଡିଓରେ ଥିବା ବ୍ୟକ୍ତି ଜଣେ ମୁସଲମାନ ଓ ସେ ବ୍ରେଡ ପ୍ୟାକେଟରେ ଛେପ ପକାଇ କରୋନା ଭାଇରସକୁ ସଂକ୍ରମିତ କରୁଛି ବୋଲି ଗୁଜବ ଉଠିଛି ।

ଭାରତରେ ଏହି ଭିଡିଓ କେମିତି ଆସିଲା ଓ ଏହାକୁ କିଏ ପ୍ରଥମେ ସୋସିଆଲ ମିଡିଆରେ ଭାଇରାଲ୍ କଲା, ତାହା ଏବେ ବି ଅସ୍ପଷ୍ଟ । ହେଲେ ଦୀକ୍ଷା କୌଶିକ ନାମକ ଜଣେ ମହିଳା ପ୍ରଥମେ ଏହି ଭିଡିଓକୁ ଟୁଇଟ୍ ମାଧ୍ୟମରେ ପ୍ରଘଟ କରିଥିଲେ ।

ଯେଉଁଥିରେ ତାଙ୍କ କ୍ୟାପ୍ସନ ଥିଲା “ ତାଜା ସ୍ଥିତିରେ ପାଉଁରୁଟି, ଟୋଷ୍ଟ ଓ ବେକେରି ବିସ୍କୁଟ୍ ଆଇଟମ୍‌କୁ ପରିତ୍ୟାଗ କରନ୍ତୁ । କାହିଁକି ନା ୯୫% ବେକେରି ଉଦ୍ୟୋଗ ଇସଲାମ ସଂପ୍ରଦାୟ ଅଧିନରେ । ଏପରିକି ତାଙ୍କ କର୍ମଚାରୀ ବି ମୁସଲମାନ୍ । କରୋନାକୁ ମୁସଲମାନ ଲୋକେ ମାନୁନଥିବାରୁ କୌଣସି ସଂକ୍ରମିତ ଲୋକ ଏହି ଭିଡିଓରେ କିଛି ଧ୍ରୁଷ୍ଟତା କରିଛି” ।

ଭାରତରେ ଏହି ଭିଡିଓଟି ଫେସବୁକରେ ବି ବହୁଳ ମାତ୍ରାରେ ଶେୟାର ହୋଇଥିଲା । ତେବେ ସୋସିଆଲ ମିଡିଆରେ ପୋଷ୍ଟ ଓ ଶେୟାର ହୋଇଥିବା ଏହି ଭିଡିଓ ଏବଂ କ୍ୟାପ୍ସନର ସତ୍ୟତା ନେଇ ଭାଇରାଲ୍ ପୋଷ୍ଟମୋର୍ଟମ୍ ଟିମର ସନ୍ଦେହ ଜାତ ହୋଇଥିଲା ।

ସାଧାରଣ ଲୋକଙ୍କ ମନରେ ଭ୍ରମ ଦୂର କରିବା ପାଇଁ ଆରମ୍ଭ ହୋଇଥିଲା ସତ୍ୟର ସନ୍ଧାନ ।  ପର୍ବପରି ବିଭିନ୍ନ ୱେବ୍‌ସାଇଟ୍ ଓ ଭିଡିଓ ଆର୍କାଇଭରେ ଖୋଳତାଡ ହୋଇଥିଲା ।

ଶେଷରେ ଏହି ଭିଡିଓ ସହ ଫିଲିପାଇନ୍ସର କନେକ୍ସନ୍ ମିଳିଥିଲା । ରିଭର୍ସ ଇମେଜ ସର୍ଚ୍ଚ କରିବା ପରେ ଏହି ଭିଡିଓଟି ଆମକୁ ସୋସିଆଲ ମିଡିଆରେ ମିଳିଥିଲା । ଯେଉଁଥିରେ ଏହି ଭିଡିଓଟି ସେପ୍ଟେମ୍ବର ୨୦୧୯ରେ ଭାଇରାଲ୍ ହୋଇଥିବା ଜଣାପଡିଥିଲା । ହେଲେ  କ୍ୟାପ୍ସନ ରହିଥିଲା ଫିଲିପାଇନ୍ସ ବେକେରୀରେ ବିତରଣ କରୁଥିବା ଜଣେ ବ୍ୟକ୍ତିର ଅଗ୍ରହଣୀୟ ଆଚରଣ ।

ଏହା ପରେ ଆମେ ‘ଫିଲିପାଇନ୍ସ ବ୍ରେଡ୍ ଟାମ୍ପରିଙ୍ଗ’ ଲେଖି ଗୁଗଲ୍‌ରେ ସର୍ଚ୍ଚ କରିଥିଲୁ । କମ୍ପ୍ୟୁଟର୍‌ର ଏଣ୍ଟର୍ ବଟନ୍ ଟିପିବା ମାତ୍ରେ ABS-CBN ନାମକ ଏକ ଫିଲିପାଇନ୍ସ ନ୍ୟୁଜ୍ ସାଇଟ୍ ର ଆର୍ଟିକଲ ସାମ୍ନାକୁ ଆସିଥିଲା ।

ABS-CBN ର ଆର୍ଟିକଲ ଅନୁଯାୟୀ ଗାର୍ଡେନିଆ ବେକେରିସ୍ ଫିଲିପାଇନ୍ସର ଜଣେ କର୍ମଚାରୀ ଗାଡିରେ ଲଦା ହୋଇଥିବା ବ୍ରେଡ୍ ସହ ଅଜଣା ହରକତ କରୁଥିବା ନେଇ ଭିଡିଓଟି ଭାଇରାଲ୍ ହୋଇଥିବା ପ୍ରକାଶ ପାଇଥିଲା ।

ଏ ନେଇ ସଂପୃକ୍ତ ବେକେରୀ କମ୍ପାନୀ ଫେସବୁକ ଜରିଆରେ କ୍ଷମା ପ୍ରାର୍ଥନା । ଆଉ ସ୍ପଷ୍ଟ ବି କରିଥିଲେ ଯେ ବ୍ୟକ୍ତି ଜଣକ ଗାଡିରେ ଥିବା ବ୍ରେଡ୍ ପ୍ୟାକେଟରୁ କିଛି ବ୍ରେଡ୍ କାଢିଥିଲେ ।  ଏହି କ୍ଷମାପ୍ରାର୍ଥନା ପୋଷ୍ଟଟି ସେପ୍ଟେମ୍ବର ୨୦୧୯ ର ବୋଲି ସ୍ପଷ୍ଟ ହୋଇଛି ।

ଏହି ଘଟଣାକୁ ନେଇ ସମସ୍ତ ତଥ୍ୟ ସାମ୍ନାକୁ ଆସିବା ପରେ ସ୍ପଷ୍ଟ ପ୍ରମାଣିତ ହୋଇଛି ଯେ ଫିଲିପାଇନ୍ସର ଏକ ପୁରୁଣା ଭିଡିଓକୁ ଭାରତରେ ଭ୍ରାନ୍ତିକର ଭାବେ ଦର୍ଶାଯାଇ ମୁସଲମାନଙ୍କ ବିରୋଧରେ ଏହାକୁ ଭାଇରାଲ୍ କରାଯାଇଛି ।

ଏହି ଭିଡିଓରେ ସେହି ବ୍ୟକ୍ତି ଜଣକ ବ୍ରେଡ୍ ପ୍ୟାକେଟରେ ଛେପ ପକାଇନଥିଲେ, ବରଂ ଖାଇବା ଉଦ୍ଦେଶ୍ୟରେ କିଛି ବ୍ରେଡ୍ କାଢିଥିଲେ ବୋଲି ସ୍ପଷ୍ଟ ହୋଇଛି ।