Building Collapses in Delhi: ପୁଣି ଦିଲ୍ଲୀରେ ଭୁଶୁଡ଼ିଲା କୋଠା; ୨ ମୃତ,ଉଦ୍ଧାର କାର୍ଯ୍ୟରେ ଅଗ୍ନିଶମ ବାହିନୀ ନିୟୋଜିତ
ନୂଆଦିଲ୍ଲୀ:ଗୁରୁବାର ଦିନ ଦିଲ୍ଲୀର ଚାୱରୀ ବଜାର ଅଞ୍ଚଳରେ ଏକ ବଡ଼ ଧରଣର ଅଘଟଣ ଘଟିଛି । ନିର୍ମାଣାଧୀନ ଏକ ତିନି ମହଲା କୋଠାର କିଛି ଅଂଶ ହଠାତ୍ ଭୁଶୁଡ଼ି ପଡ଼ିଛି। ଏହି ଘଟଣାରେ ଦୁଇ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ଯୁବକ ସାମାନ୍ୟ ଆହତ ହୋଇଛନ୍ତି। କୋଠାଟି ଭୁଶୁଡ଼ି ପଡ଼ିବା ପରେ ସେହି ଅଞ୍ଚଳରେ ଆତଙ୍କ ଖେଳିଯାଇଥିଲା। ଖବର ପାଇ ଦିଲ୍ଲୀ ଅଗ୍ନିଶମ ସେବାର ଦଳ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ।
ଜଣେ ଅଧିକାରୀଙ୍କ ସୂଚନା ଅନୁଯାୟୀ, ଦିଲ୍ଲୀ ଅଗ୍ନିଶମ ସେବା ବିଭାଗକୁ ଗୁରୁବାର ସକାଳ ପ୍ରାୟ ୧୦:୧୫ ସମୟରେ ଚାୱରୀ ବଜାରର ଗଳି ସତାରା ଅଞ୍ଚଳରେ ନିର୍ମାଣାଧୀନ ଏକ ତିନି ମହଲା କୋଠା ଭୁଶୁଡ଼ି ପଡ଼ିଥିବା ନେଇ ଖବର ମିଳିଥିଲା। କୋଠାଟିର କିଛି ଅଂଶ ଭୁଶୁଡ଼ି ପଡ଼ିଥିବା ଜଣାପଡ଼ିଥିଲା ଏବଂ ଭଗ୍ନାବଶେଷ ତଳେ ଲୋକମାନେ ଫସି ରହିଥାଇପାରନ୍ତି ବୋଲି ଆଶଙ୍କା କରାଯାଉଥିଲା। ଏହା ପରେ, ତୁରନ୍ତ ଉଦ୍ଧାର ଓ ସହାୟତା କାର୍ଯ୍ୟ ପାଇଁ ବିଭିନ୍ନ ଦଳକୁ ଘଟଣାସ୍ଥଳକୁ ପଠାଯାଇଥିଲା।
ପ୍ରାରମ୍ଭରେ, ଦୁଇଟି ୱାଟର ଟେଣ୍ଡର (WT), ଗୋଟିଏ ୱାଟର ବାଉଜର (WB), ଗୋଟିଏ କ୍ୱିକ୍ ରେସ୍ପନ୍ସ ଭେଇକିଲ୍ (QRV) ଏବଂ ଏକ ଇନସିଡେଣ୍ଟ ରେସ୍ପନ୍ସ ଟିମ୍ (IRT) ନିୟୋଜିତ କରାଯାଇଥିଲା। ପରିସ୍ଥିତିର ଗମ୍ଭୀରତାକୁ ଦୃଷ୍ଟିରେ ରଖି, ଅତିରିକ୍ତ କର୍ମଚାରୀ ଏବଂ ବରିଷ୍ଠ ଅଧିକାରୀଙ୍କ ପାଇଁ ଅନୁରୋଧ କରାଯାଇଥିଲା। ଏହା ପରେ, ଆଉ ଏକ ୱାଟର ଟେଣ୍ଡର ଏବଂ ADO ରାଜେଶ ଶୁକ୍ଲାଙ୍କୁ ଘଟଣାସ୍ଥଳକୁ ପଠାଯାଇଥିଲା। ମୋଟ ଉପରେ, ଛଅଟି ୟୁନିଟ୍ ଉଦ୍ଧାର ଓ ରିଲିଫ୍ କାର୍ଯ୍ୟରେ ନିୟୋଜିତ ହୋଇଥିଲେ।
ଏହି ଘଟଣାରେ ଦୁଇ ଜଣ ବ୍ୟକ୍ତିଙ୍କର ମୃତ୍ୟୁ ଘଟିଛି। ଜଣେ ବ୍ୟକ୍ତିଙ୍କୁ ମୃତ ଅବସ୍ଥାରେ ଏଲ୍ଏନ୍ଜେପି (LNJP) ହସ୍ପିଟାଲକୁ ଅଣାଯାଇଥିଲା। ଅନ୍ୟ ଜଣେ ବ୍ୟକ୍ତି ସାମାନ୍ୟ ଆହତ ହୋଇଥିଲେ ଏବଂ ତାଙ୍କୁ ଚିକିତ୍ସା ପାଇଁ ହସ୍ପିଟାଲ ନିଆଯାଇଥିଲା। କୋଠାଟି ନିର୍ମାଣାଧୀନ ଥିବାରୁ ଏବଂ ଭଗ୍ନାବଶେଷ ମଧ୍ୟରେ ଲୋକମାନେ ଫସି ରହିବାର ସମ୍ଭାବନା ଥିବାରୁ, ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା। ତେବେ, ଘଟଣାର କାରଣ ସମ୍ପର୍କରେ ବିସ୍ତୃତ ସୂଚନା ଏପର୍ଯ୍ୟନ୍ତ ମିଳିପାରିନାହିଁ।