ନୂଆଦିଲ୍ଲୀ : ବିଷ ବଳୟରେ ରାଜଧାନୀ ଦିଲ୍ଲୀ । ଆଜି ବି ପ୍ରଦୂଷଣର ମାତ୍ରା ଅପରିବର୍ତ୍ତିତ ରହିଛି । ପ୍ରଦୂଷଣର ମାତ୍ରା ଏତେ ବଢିଯାଇଛି ଯେ ନିଶ୍ବାସ ପ୍ରଶ୍ବାସ ନେବା ବି ଦିଲ୍ଲୀବାସୀଙ୍କ ପାଇଁ କଷ୍ଟକର ହୋଇପଡିଛି । ଆନନ୍ଦ ବିହାରରେ ଏକ୍ବିଆଇ ୪୫୨ ଥିବାବେଳେ ଆରକେ ପୁରମରେ ୪୩୩ ରହିଛି । ସେହିପରି ପଞ୍ଜାବୀ ବାଗରେ ୪୬୦ ଥିବା CPCB ପକ୍ଷରୁ ସୂଚନା ମିଳିଛି । ପ୍ରଦୂଷଣ ରେକିବାକୁ ଅଡ ଇଭିନ୍ ଫର୍ମୁଲା ଲାଗୁ କରିବାକୁ ଘୋଷଣା ହୋଇଛି । ପୁରା ବିପଦଜନକ ସ୍ଥିତିରେ ରହିଛି ଦିଲ୍ଲୀ ଏନସିଆର୍ ।
ଅତି ଜରୁରୀ ନଥିବା ନିର୍ମାଣ କାର୍ଯ୍ୟ ବନ୍ଦ ରଖିବା ସହ ସହର ମଧ୍ୟକୁ ପ୍ରବେଶ କରୁଥିବା ଟ୍ରକ ଗୁଡିକୁ ମଧ୍ୟ ନିଷେଧ କରାଯାଇଛି । ପ୍ରଦୂଷଣର ମାତ୍ରା ଏତେ ବଢିଯାଇଛି ଯେ ଦିଲ୍ଲୀର ସମସ୍ତ ସରକାରୀ ବିଦ୍ୟାଳୟ ଗୁଡିକୁ ଦୁଇ ଦିନ ପାଇଁ ବନ୍ଦ କରାଯାଇଛି । ଆଗକୁ ପିଲାମାନେ ଅନଲାଇନ୍ ରେ ପଢିବା ନେଇ ଯୋଜନା କରାଯାଉଛି । ସେପଟେ ବଢୁଥିବା ପ୍ରଦୂଷଣକୁ ରୋକିବା ପାଇଁ ବାୟୁ ଗୁଣବତ୍ତା ସ୍ଥିତିର ସମୀକ୍ଷା ପାଇଁ CAQM ପକ୍ଷରୁ ଏକ ବୈଠକ ମଧ୍ୟ ବସିଥିଲା । କିନ୍ତୁ ଥମିବାର ନାଁ ନେଉନି ପ୍ରଦୂଷଣର ମାତ୍ରା । ଦିନକୁ ଦିନ ବଢିଚାଲିଛି । ଜନଜୀବନ ପୁରା ଅସ୍ତବ୍ୟସ୍ତ ହୋଇପଡିଛି । ନଭେମ୍ବର ୨ ତାରିଖ ସକାଳୁ କ୍ରମାଗତ ଭାବରେ AQI ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି ।