କୋଟିପତି କନଷ୍ଟେବଳ ପ୍ରସନ୍ନଙ୍କ ଫର୍ଣ୍ଣିଚର ସୋରୁମ୍ ଦେଖିଲେ ଟେରା ହୋଇଯିବେ, ବିଲଡିଂ ଦାମ୍ ୨ କୋଟି

ଭୁବନେଶ୍ୱର: ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ କମିଶନରେଟ ପୋଲିସର ବହିଷ୍କୃତ କନଷ୍ଟେବଳ ପ୍ରସନ୍ନ ବେହେରାଙ୍କ ଘରେ ପଞ୍ଝା ମାରିଛି ଭିଜିଲାନ୍ସ । ରେଡ୍ ବେଳେ ସାମନାକୁ ଆସିଛି କୋଟିପତି କନଷ୍ଟେବଳଙ୍କ ସମ୍ପତ୍ତିର ଲମ୍ବା ତାଲିକା । ପ୍ରସନ୍ନ ବେହେରାଙ୍କର ଭୁବନେଶ୍ୱର ଖଣ୍ଡଗିରି ଅନ୍ତର୍ଗତ ଡୁମଡୁମାରେ ବିରାଟ ଫର୍ଣ୍ଣିଚର ସୋରୁମ୍ ଅଛି । ଏହି ସୋରୁମ୍ ୦.୨୫୦ ଏକର ଜମିରେ ଠିଆ ହୋଇଛି । ଯାହାର ମୂଲ୍ୟ ୨ କୋଟି ଟଙ୍କା ହେବ ।
୨୦୧୯ ମସିହାରେ ପଞ୍ଜିକୃତ ହୋଇଥିଲା । ୧୮ ହଜାର ବର୍ଗଫୁଟ ଅଞ୍ଚଳରେ ଏହି ଫର୍ଣ୍ଣିଚର ସୋରୁମ୍ ରହିଛି । ବିରାଟକାୟ ସୋରୁମ୍ କରିଥିଲେ ପ୍ରସନ୍ନ ବେହେରା । ଭିଜିଲାନ୍ସ ଟେକ୍ନିକାଲ୍ ଓ୍ୱିଙ୍ଗ ବର୍ତ୍ତମାନ ବିଲଡିଂର ମୂଲ୍ୟ କେତେ ହେବ ଆକଳନ କରୁଛନ୍ତି । ସେହିପରି ଭିଜିଲାନ୍ସର ଫିନାନ୍ସ ଓ ଫରେଷ୍ଟ ଓ୍ୱିଙ୍ଗ ସୋରୁମରେ ଥିବା ଜିନିଷର ଆକଳନ କରୁଛନ୍ତି ।
ମହଙ୍ଗା ଫର୍ଣ୍ଣିଚର ସବୁ ମହଜୁଦ ରହିଛି । ପ୍ରସନ୍ନ ଏତେବଡ଼ ପ୍ଲଟ କେଉଁଠି ଓ କେଉଁ ସୂତ୍ରରେ କିଣିଥିଲେ ? କିଭଳି ଏତେ ବଡ଼ ସୋରୁମ୍ ନିର୍ମାଣ କଲେ ? ମୂଲ୍ୟବାନ ଫର୍ଣ୍ଣିଚର ରଖିବାର ପୁଙ୍ଖାନୁପୁଙ୍ଖ ତଦନ୍ତ କରିବ ଭିଜିଲାନ୍ସ । ଆଜି ଏକକାଳୀନ ପ୍ରସନ୍ନ ବେହେରାଙ୍କ ଘର ସମେତ ୫ଟି ସ୍ଥାନରେ ରେଡ୍ ଜାରି ରହିଛି ।