ଦିଲ୍ଲୀ ଏକ୍ସସାଇଜ ସ୍କାମ: ସିସୋଡିଆଙ୍କ ସମେତ ୧୫ଜଣଙ୍କ ବିରୋଧରେ ଏଫଆଇଆର

ନୂଆଦିଲ୍ଲୀ: ଦିଲ୍ଲୀର ଉପ ମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟିର ତୁଙ୍ଗ ନେତା ମନୀଷ ସିସୋଡିଆଙ୍କ ଅସୁବିଧା ଦିନକୁ ଦିନ ବଢ଼ିବାରେ ଲାଗିଛି । ଶୁକ୍ରବାର ସିବିଆଇ ତାଙ୍କ ବାସଭବନରେ ସକାଳୁ ଚଢ଼ାଉ ଜାରୀ ରଖିଛି । ଏହି ମାମଲାରେ ତାଜା ଅପଡେଟ ଅନୁସାରେ ସିସୋଡିଆଙ୍କ ସମେତ ୧୫ଜଣଙ୍କ ବିରୋଧରେ ଏଫଆଇଆର ରୁଜୁ କରାଯାଇଛି । ସିବିଆଇକୁ କିଛି ଗୋବନୀୟ କାଗଜପତ୍ର ମଧ୍ୟ ମିଳିଛି । ୨ ଦିନ ପୂର୍ବରୁ ଅବଶ୍ୟ ସିବିଆଇ ଏଫଆଇଆର ରୁଜୁ କରିଥିଲେ ମଧ୍ୟ ଯାଂଚ ପରେ ଏହାକୁ ବିଧିବଦ୍ଧ ଭାବେ ଘୋଷଣା କରିଛି । ଏଫଆଇଆର କପିରେ ୧୬ତମ ସ୍ଥାନରେ ଅନନୋନ ପବ୍ଲିକ ସର୍ଭେଂଟ ଓ ପ୍ରାଇଭେଟ ପର୍ସନ ଲେଖାଯାଇଛି । ଏହାର ମାନେ ଆଉ କିଛି ବ୍ୟକ୍ତିଙ୍କ ଏହି ଏଫଆଇଆରରେ ଯୋଡାଯାଇପାରେ । ସିବିଆଇ ଏଫଆଇଆରରେ ସିସୋଡିଆ ମୁଖ୍ୟ ଅଭିଯୁକ୍ତ ହୋଇଥିବା ବେଳେ ସେ ସମୟର ଅବକାରୀ ଅଧିକାରୀ ଗୋପୀ କୃଷ୍ଣ, ଉପ ଅବକାରୀ ଅଧିକାରୀ ଆନନ୍ଦ କୁମାର ତିୱାରୀ, ପଙ୍କଜ ଭଟ୍ଟନାଗର, ୯ ବ୍ୟବସାୟୀ ଓ ୨ କମ୍ପାନୀଙ୍କ ନାମ ଉଲ୍ଲେଖ ରହିଛି । ସିବିଆଇ ଏହି ମାମଲାରେ ୭ ରାଜ୍ୟର ୨୧ ସ୍ଥାନରେ ଚଢ଼ାଉ କରିଥିଲା । ଏବେ ସିବିଆଇର ଏହି ଚଢ଼ାଉ ନେଇ ଆପ ଓ ବିଜେପି ମୁହାଁ ମୁହିଁ ହୋଇଛନ୍ତି ।