ଭୁବନେଶ୍ୱର: ଲମ୍ବାଧାଡିରେ ମୂଲିଆ ଆଉ ଶ୍ରମିକ । ହାତରେ ଟଙ୍କା ବିଡା । ଘଣ୍ଟାଘଣ୍ଟା ଧରି ଛିଡା ହୋଇଛନ୍ତି ଆରବିଆଇ ସମ୍ମୁଖରେ । ଆଜି ନୁହେଁ ଗତ କିଛି ଦିନ ହେବ ଧାଡି ଲଗାଇଛନ୍ତି ଟଙ୍କା ବଦଳେଇବା ପାଇଁ । ୨ ହଜାର ଟଙ୍କା ବଦଳାଇବେ । ହେଲେ ୨ ଦିନ ପରେ ବି ମୂଲିଆଙ୍କ ପାଖରୁ ଟଙ୍କାର ଭଣ୍ଡାର ସରୁନି ? ଆହୁରି ବାହାରୁଛି ବିଡା ବିଡା ନୋଟ ? ସନ୍ଦେହ ଖାଲି ସାଧାରଣ ଲୋକଙ୍କ ମନରେ ନ ଥିଲା । ଇଓଡବ୍ଲ୍ୟୁ ସନ୍ଦେହ କରିଥିଲା । ବୁଝୁ ବୁଝୁ ଖୋଲିଥିଲା ଟଙ୍କାର ଗୁମର ।
ଏ ଥିଲା କଳା ଧନକୁ ଧଳା କରିବା ପାଇଁ ଚାଲିଛି କି ପ୍ରୟାସ ? ହାତରେ ଆଉ ମାତ୍ର ୬ ଦିନ । ଟିକସ ଫାଙ୍କି ପାଖରେ ରଖିଥିଲେ କୋଟି କୋଟି ଟଙ୍କା ଆଉ ଏବେ ପଡିଛନ୍ତି କି ଅଠାକାଠିରେ ? ତେଣୁ ଏବେ ମୂଲିଆ ମଜୁରିଆଙ୍କୁ ଅସ୍ତ୍ର କରିଛନ୍ତି କି କୋଟିପତି ବ୍ୟବସାୟୀମାନେ ? ଏ ଟଙ୍କା ବଦଳ ପଛରେ କିଛି ରାକେଟର ହାତ ଅଛି କି ? ଏ ଲମ୍ବା ଭିଡକୁ ଦେଖି ଏମିତି ପ୍ରଶ୍ନ ଖାଲି ସାଧାରଣ ଲୋକଙ୍କ ମନରେ ନୁହେଁ, ଇଓଡବ୍ଲୁ ଓ ଇଡି ମନରେ ମଧ୍ୟ ଆସିଛି ।
ଶୁଣିବାକୁ ମିଳୁଛି, ୨୦ ହଜାର ଟଙ୍କା ବଦଳାଇଦେଲେ କୁଆଡେ ୨୦୦ ଟଙ୍କା ମିଳୁଛି । ତେଣୁ ୨୦୦ ଟଙ୍କା ଲୋଭରେ କାମ ଛାଡି କୁଆଡେ ଟଙ୍କା ଭଙ୍ଗେଇବାକୁ ଧାଡିରେ ଛିଡା ହୋଇଛନ୍ତି ଶ୍ରମିକ । ଦୈନିକ ୭ ଶହରୁ ଅଧିକ ଲୋକ ଆସୁଛନ୍ତି ଟଙ୍କା ବଦଳାଇବା ପାଇଁ । ଆଜି ପ୍ରଥମେ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା ବା ଇଓଡବ୍ଲ୍ୟୁର ୨ ଜଣିଆ ଟିମ ଆସି ପଚରା ଉଚରା କରିଥିଲା । ଆଧାରକାର୍ଡ ଦେଖିବା ସହ ନାଁ ପଚାରି ବୁଝିଥିଲା । ନିଜ ଟଙ୍କା ନା ଆଉ କାହାର ସେ ବିଷୟରେ ମଧ୍ୟ ପଚାରି ବୁଝିଥିଲେ ।
ଇଓଡବ୍ଲୁ ଯିବା ପରେ ପହଞ୍ଚିଥିଲା ଇଡି । ଧାଡିରେ ଛିଡା ହୋଇଥିବା ବ୍ୟକ୍ତିଙ୍କୁ କେଉଁଠୁ ଟଙ୍କା ଆସିଲା ? ତୁମର ନା ଆଉ କିଏ ଦେଇଛି ଏସବୁ ସମ୍ପର୍କରେ ପଚାରିଥିଲା ।
ଆରବିଆଇ ଭୁବନେଶ୍ୱର ଆଞ୍ଚଳିକ କାର୍ଯ୍ୟାଳୟ ନିର୍ଦ୍ଦେଶକ କହିଛନ୍ତି, ଦୈନିକ ୨ କୋଟିର ୨ ହଜାର ଟଙ୍କିଆ ନୋଟ ବଦଳ ଓ ଜମା ପାଇଁ ଆସୁଛି । ୯୫ ପ୍ରତିଶତ ବଦଳ ହେଉଛି, ୫ ପ୍ରତିଶତ ଜମା ହେଉଛି ।
ତେବେ ଏପରି ସ୍ଥିତି ଖାଲି ଓଡ଼ିଶାରେ ନୁହେଁ, ଦିଲ୍ଲୀ ବମ୍ବେରେ ମଧ୍ୟ ଦେଖିବାକୁ ମିଳିଛି । ଦିଲ୍ଲୀରେ ୨୦ ହଜାର ଟଙ୍କା ବଦଳାଇଲେ ୪୦୦ ଟଙ୍କା ମିଳୁଥିବା ଜଣାଯାଇଛି ।
ଏପଟେ କଂଗ୍ରେସ ନେତା ସିଧା ସିଧା କହିଛନ୍ତି ଏହି ଟଙ୍କା ଶିଳ୍ପପତି, ଲୁଗା ଓ ସୁନା ବ୍ୟବସାୟୀଙ୍କର । ୫୦୦ ଟଙ୍କାର ଲୋଭ ଦେଖାଇ ୨୦ ହଜାର ଲେଖାଏ ଟଙ୍କା ଭଙ୍ଗାଇବାକୁ ଦେଉଛନ୍ତି ବୋଲି କହିଛନ୍ତି ସୁର ।
ସୂଚନାଥାଉ କି, ମେ’ ୨୩ରୁ ସେପ୍ଟେମ୍ବର ୩୦ ତାରିଖ ଯାଏ ନୋଟ ବଦଳି ପ୍ରକ୍ରିୟା ଚାଲୁ ରହିବ ବୋଲି ଆରବିଆଇ ପକ୍ଷରୁ କୁହାଯାଇଥିଲା । ପରେ ଏହି ସମୟ ସୀମାକୁ ବଢାଇ ଦେଇଥିଲା । ଗାଇଡଲାଇନ ଅନୁସାରେ, ଜଣେ ବ୍ୟକ୍ତି ମାତ୍ର ୨୦ ହଜାର ଟଙ୍କା ବଦଳାଇ ପାରିବ । ସେ ଚାହିଁଲେ ଏହାକୁ ନିଜ ଆକାଉଣ୍ଟରେ ଜମା କରି ପାରିବ କିମ୍ବା ବଦଳାଇ ଟଙ୍କା ନେଇ ପାରିବ ।