ନୂଆଦିଲ୍ଲୀ: ଆମେରିକାରେ ଚାକିରି କରିବାକୁ ସ୍ୱପ୍ନ ଦେଖୁଥିବା ଭାରତୀୟ ଆଶାୟୀଙ୍କ ପାଇଁ ଏକ ବଡ଼ ଝଟକା । H-1B ଭିସାକୁ ନେଇ ଆମେରିକା କଂଗ୍ରେସରେ ଆସିଛି ଏକ ବିବାଦୀୟ ବିଲ୍ । ଏହି ବିଲ୍ ଯଦି ପାରିତ ହୁଏ, ତେବେ ହଜାର ହଜାର ଭାରତୀୟ ଆଇଟି ପ୍ରଫେସନାଲଙ୍କ ଭାଗ୍ୟ ଖରାପ ହୋଇଯିବ ।
ଆମେରିକା ସାଂସଦ ଏଲି କ୍ରେନ କଂଗ୍ରେସରେ ଏକ ନୂଆ ପ୍ରସ୍ତାବ ଆଗତ କରିଛନ୍ତି । ଯେଉଁଥିରେ H-1B ଭିସା ନିୟମକୁ ଅତି କଠୋର କରିବାକୁ ଦାବି କରାଯାଇଛି । ଆସନ୍ତୁ ନଜର ପକାଇବା ଏହି ବିଲ୍ର କିଛି ମୁଖ୍ୟ ଦିଗ ଉପରେ:
୩ ବର୍ଷ ପାଇଁ ରୋକ: ନୂଆ H-1B ଭିସା ଜାରି କରିବା ଉପରେ ୩ ବର୍ଷ ପାଇଁ ସମ୍ପୂର୍ଣ୍ଣ ରୋକ ଲଗାଇବାକୁ ପ୍ରସ୍ତାବ ଦିଆଯାଇଛି ।
କୋଟା ହ୍ରାସ: ବାର୍ଷିକ ଭିସା ସଂଖ୍ୟା ୬୫,୦୦୦ ରୁ ହ୍ରାସ କରି ମାତ୍ର ୨୫,୦୦୦ କରିବାକୁ କୁହାଯାଇଛି ।
ଦରମା ବୃଦ୍ଧି: ଭିସା ପାଇବା ପାଇଁ ସର୍ବନିମ୍ନ ବାର୍ଷିକ ଦରମା ୨ ଲକ୍ଷ ଡଲାର (ପ୍ରାୟ ୧.୬ କୋଟି ଟଙ୍କା) ହେବା ଜରୁରୀ ।
ଲଟେରୀ ବନ୍ଦ: ବର୍ତ୍ତମାନ ଚାଲିଥିବା ଲଟେରୀ ସିଷ୍ଟମକୁ ବନ୍ଦ କରି କେବଳ ସର୍ବାଧିକ ଦରମା ପାଉଥିବା ବ୍ୟକ୍ତିଙ୍କୁ ପ୍ରାଥମିକତା ଦେବାକୁ ପ୍ରସ୍ତାବ ରହିଛି ।
ନିର୍ଭରଶୀଳ ବା Dependent ଭିସା: ପରିବାର ସଦସ୍ୟଙ୍କ ପାଇଁ ମିଳୁଥିବା ଭିସା ଏବଂ ଅନ୍ୟାନ୍ୟ ସୁବିଧା ଉପରେ ମଧ୍ୟ କଟକଣା ଲଗାଯାଇଛି ।
ଏହି ପ୍ରସ୍ତାବ ପଛରେ ଯୁକ୍ତି ଦିଆଯାଇଛି ଯେ, ଏହାଦ୍ୱାରା ଆମେରିକୀୟ ନାଗରିକଙ୍କୁ ଚାକିରି କ୍ଷେତ୍ରରେ ଅଧିକ ସୁଯୋଗ ମିଳିବ । ତେବେ ସମାଲୋଚକଙ୍କ କହିବା କଥା, ଏହା ଆମେରିକାର ଟେକ୍ନୋଲୋଜି କ୍ଷେତ୍ରରେ ପ୍ରତିଭାର ଅଭାବ ସୃଷ୍ଟି କରିବ ଏବଂ ବଡ଼ ବଡ଼ କମ୍ପାନୀଗୁଡ଼ିକୁ ପ୍ରଭାବିତ କରିବ ।
ତେବେ ଏହା ଏବେ କେବଳ ଏକ ପ୍ରସ୍ତାବ ବା ବିଲ୍ ଆକାରରେ ଅଛି । ଏହାକୁ ଆଇନରେ ପରିଣତ ହେବା ପାଇଁ ଆମେରିକା କଂଗ୍ରେସର ଉଭୟ ସଦନରେ ମଞ୍ଜୁରୀ ମିଳିବା ସହ ରାଷ୍ଟ୍ରପତିଙ୍କ ସ୍ୱାକ୍ଷର ଆବଶ୍ୟକ । ଏହି ସମଗ୍ର ପ୍ରକ୍ରିୟାରେ ବହୁତ ସମୟ ଲାଗିପାରେ, କିନ୍ତୁ ଏହି ଖବର ଭାରତୀୟ ଆଇଟି ଜଗତରେ ଏବେ ହଲଚଲ ସୃଷ୍ଟି କରିଛି ।