ବ୍ରହ୍ମପୁର ଉପକଣ୍ଠରୁ ବିପୁଳ ପରିମାଣର ବିଦେଶୀ ମଦ ଜବତ

ବ୍ରହ୍ମପୁର: ବ୍ରହ୍ମପୁର ଅବକାରୀ ବିଭାଗ ପକ୍ଷରୁ ବିପୁଳ ପରିମାଣର ନକଲି ବିଦେଶୀ ମଦ ଜବତ କରିବା ସହିତ ତିନି ଜଣଙ୍କୁ ଗିରଫ କରିଛନ୍ତି। ଗିରଫ ଅଭିଯୁକ୍ତମାନେ ହେଲେ ଗଜପତି ଜିଲା ଅନ୍ତରବା ଅଞ୍ଚଳର ପ୍ରଫୁଲ୍ଲ ସାହୁ (୫୯), ନକୁଳ ଗମାଙ୍ଗ (୨୮) ଓ ଗଞ୍ଜାମ ଜିଲା ବୁଗୁଡା ଅଞ୍ଚଳର ତାରିଣୀ ଜେନା (୨୫)। ପ୍ରତିଦିନ ବ୍ରହ୍ମପୁର-ଦିଗପହଣ୍ଡି ରାସ୍ତାରେ ବିପୁଳ ପରିମାଣର ଚୋରା ମଦ କାରବାର ହେଉଥିବାର ବିଶେଷ ସୂତ୍ରରୁ ଖବର ପାଇଥିଲା ଅବକାରୀ ବିଭାଗ। ଏହାପରେ ଅବକାରୀ ଅଧିକ୍ଷକ ରମେନ୍ଦ୍ର ନାରାୟଣ ନାୟକଙ୍କ ନିର୍ଦ୍ଦେଶକ୍ରମେ ସଦର ଅଧିକାରୀ ଅର୍ଜୁନ ମଲ୍ଲିକ ଏବଂ ତାଙ୍କ ଟିମ ଡେଙ୍ଗାପଦର ନିକଟରେ ଗାଡି ଯାଞ୍ଚ କରୁଥିଲେ। ଏହି ସମୟରେ ରାସ୍ତା ଦେଇ ଯାଉଥିବା ମହିନ୍ଦ୍ରା ପିକ୍‌ଅପ୍‌ ଭ୍ୟାନ (ଓଡି ୦୭ ୟୁ ୬୪୧୬)କୁ ଅଟକାଇଥିଲେ। ଗାଡ଼ିରେ ରେସନ ସାମଗ୍ରୀ ତଳେ ମଦ ରହିଥିଲା। ବିଭାଗ ପକ୍ଷରୁ ସେହି ବ୍ୟକ୍ତି ଓ ତାଙ୍କ ସହଯୋଗୀକୁ ଗିରଫ କରିବା ସହ ପୁଣିଥରେ ମଦ ମଗାଇବାକୁ କହିଥିଲେ। ଏହାପରେ ଜଣେ ଯୁବକ ସ୍କୁଟି ଗାଡି (ଓଡି ୦୭ ଇ୨୦୧୦) ରେ ପୁଣି ଏକ ପେଢୀ ମଦ ନେଇ ଆସିଥିଲେ। ସେମାନଙ୍କ ଠାରୁ ସୂଚନା ପାଇ ସହର ଉପକଣ୍ଠ ଗୌରାଙ୍ଗ ବିହାରର ଏକ ଭଡା ଘରେ ଚଢ଼ଉ କରାଯାଇ ମଦ ଜବତ କରାଯାଇଥିଲା। ବିଭାଗ ପକ୍ଷରୁ ୨୦୮ଟି ବୋତଲ ମଦ, ହୋମିଓପାଥିକ ସ୍ପିରିଟ ୬ ଲିଟର, ୪ ଶହ ଖାଲି ବୋତଲ, ସରକାରୀ ଲେବଲ ସହିତ ମଦ ପ୍ରସ୍ତୁତ ପାଇଁ ବ୍ୟବହାର ହେଉଥିବା ଅନ୍ୟାନ୍ୟ ସାମଗ୍ରୀ ଜବତ କରାଯାଇଥିଲା। ଏ ନେଇ ବିଭାଗ ପକ୍ଷରୁ ୫୧/୨୨ରେ ଏକ ମାମଲାରୁଜୁ କରି ତିନି ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଅବକାରୀ ଅଧିକ୍ଷକ ରମେନ୍ଦ୍ର ନାରାୟଣ ନାୟକ କହିଛନ୍ତି।