ମଣିଷଠି ଜନ୍ତୁପଣ ଯେତେଯେତେ 
ବୃଦ୍ଧି ପାଇ ପାଇ ଚାଲିଛି
ଜନପଦରେ ଜନ୍ତୁଙ୍କ ସଂଖ୍ୟାରେ
ସେତେ ଅବନତି ହେଉଛି !
ନିଜକୁ ଜନ୍ତୁଙ୍କ ଅଧିପତି ବୋଲି
ପ୍ରମାଣ କରିବା ପାଇଁ
ଜନ୍ତୁମାନଙ୍କୁ ସେ ମାରିଦେବା ସହ
ଘରଦ୍ବାର ରଖିନାଇଁ !
ସେଥିପାଇଁ ଯଦି ବର୍ତ୍ତିଯାଇଥିବା
କେଉଁ ଜନ୍ତୁଟେ ପଶି ଆସୁଛି;
ସନ୍ଦେହୀ ମଣିଷର ଆଖିକୁ ସିଏ
ଅଜବ ଅଜବ ଦିଶୁଛି !
ଏବେ ଅନ୍ୟର ରକ୍ତ ପିଇବା ହେଲା
ମଣିଷର ପ୍ରଧାନ କାମ
ଅନ୍ୟ ଯଦି କେହି ସେହିକାମ କରେ
ପଚାରେ କଣ ତା ନାମ ?
ସତକଥା ହେଲା ଏଇ ଅଜବ ଜନ୍ତୁଟି
ହେଉଛି ମଣିଷ ନିଜେ
ମେଣ୍ଢାପରି ମୁଣ୍ଡଟି ତା ଭାରି ଟାଣ,
ଘାସରେ କଲିଜା ଖୋଜେ !
ଦେଖିଲା ଲୋକେ କୁହନ୍ତି ସିଏ
ଏକଦମ୍ କଙ୍ଗାରୁ ପରି
ବାପାମାଆ ଛାଡି ଯେଣୁ ଡିଏଁ ସିଏ
ପିଲାଛୁଆଙ୍କୁ ଧରି !
କେବେ ସିଏ କୁକୁର ପରି ଧାଉଁଛି
କେବେ ବିଲେଇ ପରି ମ୍ୟାଉଁ
ଏତେ ସୁନ୍ଦର ଅଭିନୟ ମଣିଷ ଛଡା
କିଏ କରି ପାରିବ ଆଉ !
ନୂଆ ଫୁଆଁ ସବୁ ମିଛକଥା ଯେତେ
ମଣିଷ ଅଜବ ଜନ୍ତୁ
ମିଳିବନି କେବେ ବନ ବିଭାଗ ତାହାକୁ
ମିଡିଆବାଲା ଖୋଜନ୍ତୁ !
