ଓଡ଼ିଶା ସମ୍ବାଦ ବ୍ୟୁରୋ: ଗୁରୁବାର ହରିୟାଣାର ରୋହତକ ଜିଲ୍ଲାର ସାମ୍ପଲାସ୍ଥିତ ଚୌଧୁରୀ ଛୋଟୁରାମ ସ୍ମାରକ ସ୍ଥଳରେ ଏକ କିସାନ ମହାପଞ୍ଚାୟତ ଅନୁଷ୍ଠିତ ହୋଇଥିଲା। ଏହି ସଭାରେ ହରିୟାଣାର ପୂର୍ବତନ ରାଜ୍ୟପାଳ ସତ୍ୟପାଲ ମଲିକ ଯୋଗ ଦେଇଥିଲେ। ଏହି ସମୟରେ ସେ ନିଜକୁ ଆଗାମୀ ନିର୍ବାଚନରେ ପ୍ରଧାନମନ୍ତ୍ରୀ ପାଇଁ ଯୋଗ୍ୟ ବୋଲି କହିଥିଲେ। ସେ କହିଥିଲେ, ଯେବେ ଯେବେ ବିରୋଧୀ ଦଳ ଏକଜୁଟ ହୁଅନ୍ତି, ବିଜେପି ପରାଜୟର ସମ୍ମୁଖୀନ ହୋଇଛି। ଏଥର ବିଜେପି ସାମ୍ନାରେ କେବଳ ଜଣେ ବିରୋଧୀ ପ୍ରାର୍ଥୀ ରହିବ। ଏଥିପାଇଁ ଏକ ଯୋଜନା ପ୍ରସ୍ତୁତ କରାଯାଇଛି। ବିରୋଧୀ ଦଳର ଏପରି ୧୦ ଜଣ ପ୍ରାର୍ଥୀ ଅଛନ୍ତି ଯେଉଁମାନେ ବିଜେପିକୁ ବରାବର ଟକ୍କର ଦେବାକୁ ପ୍ରସ୍ତୁତ।
ଯେତେବେଳେ ଗଣମାଧ୍ୟମ ପୂର୍ବତନ ରାଜ୍ୟପାଳ ସତ୍ୟପାଲ ମଲିକଙ୍କୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା କଥା ପଚାରିଥିଲେ ସେତେବେଳେ ସେ କହିଥିଲେ ଯେ ସେ କୌଣସି ଦଳରେ ଯୋଗଦେବେ ନାହିଁ କିମ୍ବା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ନାହିଁ। କିନ୍ତୁ ଯିଏ ବିଜେପିକୁ ପରାସ୍ତ କରିବ ତାଙ୍କୁ ସେ ସାହାଯ୍ୟ କରିବେ। ମଲିକଙ୍କୁ ପ୍ରଧାନମନ୍ତ୍ରୀଙ୍କ ସ୍ଥାନରେ ରହିବା ବିଷୟରେ ପଚରାଯାଇଥିଲା ଆଉ ସେ କହିଥିଲେ ସେ ପ୍ରଧାନମନ୍ତ୍ରୀ ଭାବରେ ସର୍ବୋତ୍ତମ ଜଣେ ବ୍ୟକ୍ତି ହୋଇପାରନ୍ତି।
ସେହିପରି କୁସ୍ତି ପ୍ରସଙ୍ଗରେ ପୂର୍ବତନ ରାଜ୍ୟପାଳ ମଲିକ ବିଜେପି ସରକାରକୁ ଘେରିଥିଲେ ଏବଂ କହିଥିଲେ ଯେ ବିଜେପି କେବଳ କ୍ଷମତାର ଚିନ୍ତା କରେ ଏବଂ ଅନ୍ୟ କାହାରି ଚିନ୍ତା କରେ ନାହିଁ। ଏଥି ସହିତ ମଲିକ ପୁଲୱାମା ମାମଲାର ତଦନ୍ତ ନେଇ ମଧ୍ୟ ପ୍ରଶ୍ନ ଉଠାଇ କହିଛନ୍ତି ଯେ ସରକାର କାହିଁକି ପୁଲୱାମା ମାମଲାର ଅନୁସନ୍ଧାନ କରିନାହାଁନ୍ତି। ସୂଚନା ଥାଉକି କିଛି ଦିନ ପୂର୍ବରୁ ପୂର୍ବତନ ରାଜ୍ୟପାଳ ସତ୍ୟପାଲ ମଲିକ ବିଜେପିକୁ ଟାର୍ଗେଟ କରି କହିଥିଲେ ଯେ ଯଦି ବିଜେପି ପରାଜିତ ନହୁଏ ତେବେ ଦେଶର ଅବସ୍ଥା ଆହୁରି ଖରାପ ହୋଇପାରେ।