ଭୁବନେଶ୍ୱର: କରୋନାର ସେକେଣ୍ଡ ଓ୍ୱେଭରେ ରାଜ୍ୟରେ ଜଣଙ୍କ ପରେ ଜମେ ନେତା କରୋନା ସଂକ୍ରମିତ ହେଉଛନ୍ତି । କରୋନାରେ ସଂକ୍ରମିତ ହେବା ପରେ ଚିକିତ୍ସାଧୀନ ଅବସ୍ଥାରେ ଗତକାଲି ବିଶିଷ୍ଟ ସ୍ଥପତି ତଥା ସାଂସଦ ପଦ୍ମବିଭୂଷଣ ରଘୁନାଥ ମହାପାତ୍ରଙ୍କ ଦେହାନ୍ତ ହୋଇଛି । ସେହିପରି କରୋନା ସଂକ୍ରମିତ ହେବା ପରେ ଭୁବନେଶ୍ୱର ଏମ୍ସରେ ଚିକିତ୍ସିତ ହେଉଛନ୍ତି ବିରୋଧୀ ଦଳ ନେତା ପ୍ରଦୀପ୍ତ ନାଏକ । ଗତ ସପ୍ତାହେ ଭିତରେ ୭-୮ ଜଣ ବିଧାୟକ ସଂକ୍ରମିତ ହୋଇଛନ୍ତି ।
ଆଠମଲ୍ଲିକ ବିଧାୟକ ରମେଶ ସାଇ କରୋନା ସଂକ୍ରମିତ ହୋଇଛନ୍ତି । ତାଙ୍କର କୋଭିଡ୍ ରିପୋର୍ଟ ଆସିଛି ପଜିଟିଭ୍ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟ୍ୱିଟ୍ କରି ଏହି ସୂଚନା ଦେଇଛନ୍ତି । ତାଙ୍କର ଆଶୁ ଆରୋଗ୍ୟ ଓ ଉତ୍ତମ ସ୍ୱାସ୍ଥ୍ୟ କାମନା କରିଛନ୍ତି ମୁଖ୍ୟମନ୍ତ୍ରୀ ।
ବିଧାୟକ ଶ୍ରୀ ରମେଶ ଚନ୍ଦ୍ର ସାଇ କୋଭିଡ ସଂକ୍ରମିତ ହୋଇଥିବା ନେଇ ଅବଗତ ହେଲି। ତାଙ୍କ ଆଶୁଆରୋଗ୍ୟ ଓ ଉତ୍ତମ ସ୍ୱାସ୍ଥ୍ୟ କାମନା କରୁଛି।
— Naveen Patnaik (@Naveen_Odisha) May 10, 2021
ପୂର୍ବରୁ ମନ୍ତ୍ରୀ ପ୍ରତାପ ଜେନା, ବିଧାୟିକା ବାସନ୍ତୀ ହେମ୍ବ୍ରମ୍, ବିଧାୟର ବିଷ୍ଣୁବ୍ରତ ରାଉତରାୟ, ତାଙ୍କ ବାପା ତଥା ପୂର୍ବତନ ମନ୍ତ୍ରୀ ବିଜୟଶ୍ରୀ ରାଉତରାୟ, ବିଧାୟକ ସୁବ୍ରତ ତରାଇ, ପ୍ରଫୁଲ୍ଲ ସାମଲ, ରଘୁନାଥ ଗମାଙ୍ଗ ପ୍ରମୁଖ କରୋନା ସଂକ୍ରମିତ ହୋଇଛନ୍ତି । ସମସ୍ତେ ଏବେ ଡାକ୍ତରଙ୍କ ପରାମର୍ଶ ଅନୁସାରେ ଆଇସୋଲେସନରେ ଅଛନ୍ତି । ସମସ୍ତଙ୍କୁ ଦ୍ରୁତ ଆଶୁ ଆରୋଗ୍ୟ କାମନା କରୁଛନ୍ତି ସମର୍ଥକ, ଦଳୀୟ ନେତା ଓ କର୍ମୀ ।