ଭୁବନେଶ୍ୱର: ହୋଲସେଲ ଔଷଧ ଲାଇସେନ୍ସ ପ୍ରଦାନ ପାଇଁ ୬,୦୦୦ ଟଙ୍କା ଲାଞ୍ଚ ନେବା ଅଭିଯୋଗରେ ଗୁରୁବାର ଦିନ ଓଡ଼ିଶା ଭିଜିଲାନ୍ସ ଯାଜପୁରର ଜଣେ ଆସିଷ୍ଟାଣ୍ଟ୍ ଡ୍ରଗ୍ସ କଣ୍ଟ୍ରୋଲରଙ୍କୁ ଗିରଫ କରିଛନ୍ତି।
ଉକ୍ତ ଅଧିକାରୀ ଜଗତସିଂହପୁର ଜିଲ୍ଲାର ଅତିରିକ୍ତ ଦାୟିତ୍ୱରେ ଥିବା ଯାଜପୁରର ସହକାରୀ ଡ୍ରଗ୍ସ ନିୟନ୍ତ୍ରକ / ଡ୍ରଗ୍ସ ନିରୀକ୍ଷକ ସଞ୍ଜୟ କୁମାର ହାଁସଦା ବୋଲି ଜଣାପଡିଛି।
ଭିଜିଲାନ୍ସ ଅନୁଯାୟୀ, ହୋଲସେଲ ଔଷଧ ଦୋକାନ ଲାଗି ଲାଇସେନ୍ସ ପ୍ରଦାନ ପାଇଁ ଭୁବନେଶ୍ୱରର ଡ୍ରଗ୍ସ ନିୟନ୍ତ୍ରକଙ୍କ କାର୍ଯ୍ୟାଳୟକୁ ଆବେଦନ ସୁପାରିଶ କରିବା ପାଇଁ ଜଣେ ଆବେଦନକାରୀଙ୍କଠାରୁ ଲାଞ୍ଚ ନେଉଥିବା ବେଳେ ତାଙ୍କୁ ପାରାଦୀପ-କଟକ NH-୫୩ ରାସ୍ତା ପାର୍ଶ୍ୱର ଜୟପୁର ଛକରେ ଗିରଫ କରାଯାଇଥିଲା।
ଅଭିଯୋଗକାରୀ ତାଙ୍କର ହୋଲସେଲ ଔଷଧ ଦୋକାନ ପାଇଁ ଡ୍ରଗ୍ସ ନିୟନ୍ତ୍ରକଙ୍କ କାର୍ଯ୍ୟାଳୟରେ ଆବେଦନ କରିଥିଲେ। ସେ ଅନେକ ଥର ସଞ୍ଜୟଙ୍କୁ ଭେଟିଥିଲେ। କିନ୍ତୁ ସେ ଆବେଦନ ପ୍ରକ୍ରିୟାକରଣ କରିନଥିଲେ ଏବଂ ଲାଞ୍ଚ ଭାବରେ ୬,୦୦୦ ଟଙ୍କା ଦାବି କରିଥିଲେ। ହଇରାଣ ହେବା ପରେ ଅଭିଯୋଗକାରୀ ଭିଜିଲାନ୍ସ କର୍ତ୍ତୃପକ୍ଷଙ୍କୁ ଘଟଣା ବିଷୟରେ ଜଣାଇଥିଲେ।
ବୁଧବାର ଦିନ ଯେତେବେଳେ ଅଭିଯୋଗକାରୀ ତାଙ୍କ କାର୍ଯ୍ୟାଳୟକୁ ଯାଇଥିଲେ ସେ ସେଠାରେ ଉପସ୍ଥିତ ନଥିଲେ। ଫୋନରେ ଯୋଗାଯୋଗ କରାଯିବାରୁ ଅଧିକାରୀ ତାଙ୍କୁ ଜୟପୁର ଛକରେ ପହଞ୍ଚିବାକୁ କହିଥିଲେ। ଅଭିଯୋଗକାରୀ ଘଟଣାସ୍ଥଳ ରେ ପହଞ୍ଚିବା ପରେ ସଞ୍ଜୟ ତାଙ୍କୁ ତାଙ୍କର କାରରେ ବସିବାକୁ କହିଥିଲେ। ଯାହା ପରେ ତାଙ୍କ ଠାରୁ ଲାଞ୍ଚ ରାଶି ଗ୍ରହଣ କରିଥିଲେ।
ପରେ ଭିଜିଲାନ୍ସ ଟିମ୍ ତାଙ୍କୁ ଗିରଫ କରିବା ସହ ତାଙ୍କ ଠାରୁ ୬ ହଜାର ଲାଞ୍ଚ ଟଙ୍କା ଉଦ୍ଧାର କରିଥିଲା। ପରେ ଆୟ ବହିର୍ଭୁତ ସମ୍ପତ୍ତି ଥିବା ଦୃଷ୍ଟିରୁ ତାଙ୍କ କାର୍ଯ୍ୟାଳୟ ଏବଂ ବାସସ୍ଥାନରେ ଏକକାଳୀନ ତଲାସ ଆରମ୍ଭ ହୋଇଛି।
ଏନେଇ ଦୁର୍ନୀତି ନିବାରଣ (ସଂଶୋଧନ) ଆଇନ, ୨୦୧୮ ଧାରା ୭ ଅନୁଯାୟୀ ଏକ ମାମଲା ରୁଜୁ କରାଯାଇ ତଦନ୍ତ ଜାରି ରହିଛି।