ଓଏସଏସସି ପ୍ରଶ୍ନପତ୍ର ଲିକ୍ ମାମଲା, ଷ୍ଟାଫ ସିଲେକ୍ସନ କମିସନ ଅଧ୍ୟକ୍ଷଙ୍କ ଇସ୍ତଫା ସହ ସିବିଆଇ ତଦନ୍ତ ଦାବି

ଭୁବନେଶ୍ୱର: ଓଡ଼ିଶା ଷ୍ଟାଫ୍ ସିଲେକ୍ସନ୍ କମିଶନ୍ (ଓଏସ୍ଏସସି) ପ୍ରଶ୍ନପତ୍ର ଲିକ୍ ଘଟଣାକୁ ବିରୋଧ କରି ସୋମବାର ଶତାଧିକ ଚାକିରି ଆଶାୟୀ ବାଲେଶ୍ୱର ଜିଲ୍ଲାପାଳ ଓ ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟ ସମ୍ମୁଖରେ ବିଶାଳ ଶୋଭାଯାତ୍ରା କରିଛନ୍ତି। ନିଯୁକ୍ତି ପ୍ରକ୍ରିୟାକୁ ନେଇ ହୋଇଥିବା ଅନିୟମିତତାର ସିବିଆଇ ତଦନ୍ତ ଦାବି କରିବା ସହ ଓଡ଼ିଶା ଷ୍ଟାଫ ସିଲେକ୍ସନ କମିସନ ଅଧ୍ୟକ୍ଷଙ୍କ ଇସ୍ତଫା ଦାବି କରିଛନ୍ତି ପ୍ରତିବାଦକାରୀ।

ଆଜୀମାବାଦରୁ ଆରମ୍ଭ କରି ଚାକିରୀ ଆଶାୟୀମାନେ ଏକ ରାଲି କରି ଷ୍ଟେସନ ଛକ ଠାରେ ରାସ୍ତା ଅବରୋଧ କରିବା ସହ କାରଣ ଦର୍ଶାଅ ନୋଟିସ ପାଇଥିବା 55 ଜଣ ପରୀକ୍ଷାର୍ଥୀଙ୍କ ନାମ ପ୍ରକାଶ କରିବାକୁ କମିସନଙ୍କୁ ଅନୁରୋଧ କରିଛନ୍ତି।

ଏହି ବିକ୍ଷୋଭ ସମୟରେ ଆଶାୟୀ ପ୍ରାର୍ଥୀମାନେ ହାତରେ ବ୍ୟାନର ଓ ପ୍ଲାକାର୍ଡ ଧରି ‘ଦୁର୍ନୀତିକୁ ନା କୁହ'( SAY NO TO CORRUPTION) ସ୍ଲୋଗାନ ଦେବା ସହ କମିସନଙ୍କ ମଧ୍ୟରେ ଥିବା ଦୁର୍ନୀତିଗ୍ରସ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆହ୍ୱାନ ଦେଇଛନ୍ତି।

ଜଣେ ଆନ୍ଦୋଳନକାରୀ ପରୀକ୍ଷାର୍ଥୀ ଅଭିଯୋଗ କରିଛନ୍ତି ଯେ ଓଏସଏସସିର ନିଯୁକ୍ତି ପରୀକ୍ଷାରେ ଭଲ ପ୍ରଦର୍ଶନ କରିବା ସତ୍ତ୍ୱେ ବ୍ୟାପକ ଦୁର୍ନୀତି ଯୋଗୁଁ ସେମାନଙ୍କୁ ଚାକିରି ମିଳୁନାହିଁ। ଏପରିକି ଦୁର୍ନୀତି ଅବ୍ୟାହତ ରହିଲେ ଆତ୍ମହତ୍ୟାକୁ ଏକ ବିକଳ୍ପ ଭାବେ ବିବେଚନା କରିବାର ଚରମ ପଦକ୍ଷେପ ସମ୍ପର୍କରେ ମଧ୍ୟ ଆଶାୟୀ ନିଜର ହତାଶା ପ୍ରକାଶ କରିଛନ୍ତି।

ଅନ୍ୟ ଜଣେ ପରୀକ୍ଷାର୍ଥୀ କହିଛନ୍ତି ଯେ ସରକାରୀ ଆଇଟିଆଇ କେନ୍ଦ୍ରରେ ଆକାଉଣ୍ଟାଣ୍ଟ ପରୀକ୍ଷା ସମୟରେ ସେମାନେ ଦେଖିଥିଲେ ଯେ ପ୍ରଶ୍ନପତ୍ର ଠିକ୍ ଭାବେ ସିଲ୍ ହୋଇ ନାହିଁ, ଯାହା ପ୍ରକ୍ରିୟାର ନିରପେକ୍ଷତା ଉପରେ ପ୍ରଶ୍ନ ଉଠାଇଛି। ସେମାନେ ମଧ୍ୟ ନ୍ୟାୟ ପାଇଁ ସିବିଆଇ ତଦନ୍ତ ଦାବି କରିବା ସହ ଓଏସ୍ଏସସି ଅଧ୍ୟକ୍ଷ ଅଭୟଙ୍କ ଇସ୍ତଫା ଦାବି କରିଛନ୍ତି।

ବର୍ତ୍ତମାନ ସୁଦ୍ଧା ଆନ୍ଦୋଳନରତ ଚାକିରୀ ଆଶାୟୀଙ୍କ ଅଭିଯୋଗ ସମ୍ପର୍କରେ ଓଏସଏସସି କିମ୍ବା ଜିଲ୍ଲା ପ୍ରଶାସନ ପକ୍ଷରୁ କୌଣସି ସରକାରୀ ମନ୍ତବ୍ୟ ମିଳିପାରି ନାହିଁ।

ଜୁଲାଇ 27 ତାରିଖରେ ଜେଇ ସିଭିଲ ମେନ୍ ପରୀକ୍ଷା ପ୍ରଶ୍ନପତ୍ର ଲିକ୍ ମାମଲାରେ ବାଲେଶ୍ୱର ପୁଲିସ କହିଛି, ଓଡ଼ିଶା ବାହାରେ ଥିବା ପ୍ରିଣ୍ଟିଂ ପ୍ରେସ୍ରୁ ପ୍ରଶ୍ନପତ୍ର ଲିକ୍ ହୋଇଛି। ପଶ୍ଚିମବଙ୍ଗର ଦୀଘାରେ ନଅ ଜଣ ଓ ବିହାରରେ ଆଠ ଜଣଙ୍କୁ ଗିରଫ କରିବା ସହ ମାଷ୍ଟରମାଇଣ୍ଡ ସମେତ 17 ଜଣଙ୍କୁ ଗିରଫ କରିଛି ପୋଲିସ।