ଜୁନରୁ ବଦଳିବ ପର୍ସନାଲ ଫାଇନାନ୍ସ ନିୟମ: ଟ୍ୟାକ୍ସ ୟୁପିଆଇ ଏବଂ କ୍ରେଡିଟ କାର୍ଡ ବ୍ୟବହାରକାରୀଙ୍କ ପାଇଁ ବଡ଼ ଖବର

ନୂଆଦିଲ୍ଲୀ: ସାଧାରଣ ଲୋକଙ୍କ ପକେଟ ଉପରେ ସିଧାସଳଖ ପ୍ରଭାବ ପକାଉଥିବା ଅନେକ ଆର୍ଥିକ ନିୟମରେ ବଡ଼ ଧରଣର ପରିବର୍ତ୍ତନ ହେବାକୁ ଯାଉଛି। ଆସନ୍ତା ମାସରୁ ଆୟକର ୟୁପିଆଇ ଦେଣନେଣ ଏବଂ କ୍ରେଡିଟ କାର୍ଡକୁ ନେଇ କିଛି ନୂଆ ନିୟମ ଲାଗୁ ହେବ। ଡିଜିଟାଲ ପେମେଣ୍ଟକୁ ଅଧିକ ସୁରକ୍ଷିତ କରିବା ସହ ଟିକସ ଫାଙ୍କିବା ଉପରେ ରୋକ ଲଗାଇବା ପାଇଁ ସରକାର ଏହି ପଦକ୍ଷେପ ନେଉଛନ୍ତି। ଯଦି ଆପଣ ବି ନିୟମିତ ଭାବେ ୟୁପିଆଇ କିମ୍ବା କ୍ରେଡିଟ କାର୍ଡ ବ୍ୟବହାର କରୁଛନ୍ତି ତେବେ ଏହି ନୂଆ ନିୟମଗୁଡିକ ବିଷୟରେ ଜାଣିବା ନିହାତି ଜରୁରୀ।

କ୍ରେଡିଟ କାର୍ଡ ବ୍ୟବହାରକାରୀଙ୍କ ଉପରେ ଆୟକର ବିଭାଗ କଡ଼ା ନଜର ରଖିବାକୁ ପ୍ରସ୍ତୁତ ହେଉଛି। ନୂତନ ନିୟମ ଅନୁଯାୟୀ ଗୋଟିଏ ଆର୍ଥିକ ବର୍ଷରେ ଦଶ ଲକ୍ଷ ଟଙ୍କାରୁ ଅଧିକ କ୍ରେଡିଟ କାର୍ଡ ବିଲ ପେମେଣ୍ଟ କଲେ ଏହାର ରିପୋର୍ଟ ସିଧାସଳଖ ଆୟକର ବିଭାଗ ନିକଟକୁ ଯିବ। ସେହିପରି ଯଦି କେହି ଏକ ଲକ୍ଷ ଟଙ୍କାରୁ ଅଧିକ କ୍ରେଡିଟ କାର୍ଡ ବିଲ ନଗଦ ଆକାରରେ ପୈଠ କରନ୍ତି ତେବେ ତାଙ୍କୁ ନୋଟିସ ଆସିବାର ସମ୍ଭାବନା ରହିଛି। ଏହା ବ୍ୟତୀତ କ୍ରେଡିଟ କାର୍ଡ ପାଇଁ ଏବେ ପ୍ୟାନ କାର୍ଡ ଦେବା ବାଧ୍ୟତାମୂଳକ କରାଯାଇଛି।

ଦେଶର ପ୍ରମୁଖ ବ୍ୟାଙ୍କଗୁଡିକ ମଧ୍ୟ ସେମାନଙ୍କ କ୍ରେଡିଟ କାର୍ଡ ନିୟମରେ ପରିବର୍ତ୍ତନ ଆଣୁଛନ୍ତି। ୟୁଟିଲିଟି ବିଲ ପେମେଣ୍ଟ ଏବଂ ରିୱାର୍ଡ ପଏଣ୍ଟକୁ ନେଇ ନୂଆ ଗାଇଡଲାଇନ ଆସୁଛି। ଏକ ବିଲିଂ ସାଇକେଲରେ ପଚାଶ ହଜାର ଟଙ୍କାରୁ ଅଧିକ ୟୁଟିଲିଟି ବିଲ ପେମେଣ୍ଟ କଲେ ଏକ ପ୍ରତିଶତ ଅତିରିକ୍ତ ଦେୟ ଦେବାକୁ ପଡିପାରେ। ସେହିପରି ଏୟାରପୋର୍ଟ ଲାଉଞ୍ଜ ଆକ୍ସେସ ଏବଂ ଫୁଏଲ ସରଚାର୍ଜ ଛାଡ଼ ନିୟମରେ ମଧ୍ୟ କୋହଳ କରାଯାଇଛି ଯାହାଦ୍ୱାରା ଗ୍ରାହକଙ୍କ ଖର୍ଚ୍ଚ ବଢିବାର ଆଶଙ୍କା ରହିଛି।

ଅନ୍ୟପଟେ ୟୁପିଆଇ ପେମେଣ୍ଟ ବ୍ୟବସ୍ଥାକୁ ଆହୁରି ମଜବୁତ ତଥା ସୁରକ୍ଷିତ କରାଯାଉଛି। ଫୋନପେ ଗୁଗଲପେ କିମ୍ବା ପେଟିଏମ ଭଳି ଆପ ଜରିଆରେ ଟଙ୍କା ପଠାଇଲେ ଏବେ ଅଧିକ ସୁରକ୍ଷା ସ୍ତର ଦେଇ ଗତି କରିବାକୁ ପଡିବ। ନୂଆ ନିୟମ ଲାଗୁ ହେବା ପରେ କେବଳ ୟୁପିଆଇ ପିନ ଦେଲେ ଦେଣନେଣ ହୋଇପାରିବ ନାହିଁ ବରଂ ଏଥିପାଇଁ ଟୁ ଫ୍ୟାକ୍ଟର ଅଥେଣ୍ଟିକେସନ ବା ବାୟୋମେଟ୍ରିକ ସୁବିଧା ଦେବାକୁ ପଡିବ। ଏହା ସହିତ ସର୍ଭର ଉପରେ ଚାପ କମାଇବା ପାଇଁ ଦୈନିକ ବାଲାନ୍ସ ଚେକ କରିବା ଉପରେ ମଧ୍ୟ ସୀମା ଧାର୍ଯ୍ୟ କରାଯାଇଛି।