ଭୁବନେଶ୍ୱର: ଜୁଲାଇରେ ହେବ ରାଷ୍ଟ୍ରପତି ନିର୍ବାଚନ । ଏହି ସମୟରେ ବିଜେଡି କାହାକୁ ସମର୍ଥନ କରିବ ସେନେଇ ତାଙ୍କ ଦଳ ଠିକ୍ ସମୟରେ ନିଷ୍ପତ୍ତି ନେବ ବୋଲି ବିଜେଡି ସଭାପତି ନବୀନ ପଟ୍ଟନାୟକ ଏନଡିଟିଭିକୁ ସାକ୍ଷାତକାର ଦେଇ କହିଛନ୍ତି । ୨୦୨୪ ଲୋକସଭା ନିର୍ବାଚନ ପୂର୍ବରୁ ବିରୋଧୀ ଦଳମାନଙ୍କ ଦ୍ୱାରା ‘ତୃତୀୟ ସାମ୍ମୁଖ୍ୟ’ ଗଠନର କଳ୍ପନାଜଳ୍ପନା ପ୍ରସଙ୍ଗରେ ମଧ୍ୟ ନବୀନ ପଟ୍ଟନାୟକ କହିଛନ୍ତି। ସମୟ ଆସିଲେ କହିବେ । ତାଙ୍କର ଉଦ୍ଦେଶ୍ୟ କୌଣସି ରାଜନୀତିକ ଦଳଙ୍କ ମେଣ୍ଟରୁ ସ୍ୱାଧାୀନ ରହିବାକୁ ସେ ଲକ୍ଷ୍ୟ ରଖିଛନ୍ତି ।
ବିଜେଡି ପାଖରେ ବିଜୟର ଚାବି !
ଚଳିତ ବର୍ଷ ଜୁଲାଇରେ ରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହେବ। ପ୍ରାର୍ଥୀଙ୍କ ବିଜୟ ସୁନିଶ୍ଚିତ କରିବାକୁ ହେଲେ ଏନଡିଏ ବିଜେଡି ଏବଂ ଓ୍ୱାଇଏସଆର କଂଗ୍ରେସର ସମର୍ଥନ ଆବଶ୍ୟକ କରିବ। ଏହି ନିର୍ବାଚନରେ ଜିତିବା ପାଇଁ ୫୪୯,୪୫୨ ଭୋଟ୍ ଆବଶ୍ୟକ। ଏନଡିଏ ବର୍ତ୍ତମାନ ୯୦୦୦ ଭୋଟ୍ ଅର୍ଥାତ୍ ପ୍ରାୟ ୧.୨ ପ୍ରତିଶତ ଭୋଟ୍ ପଛରେ ଅଛି। ବିଜେଡିର ଉଭୟ ଗୃହରେ ମିଶି ୨୧ ଜଣ ସାଂସଦ ଅଛନ୍ତି। ଅର୍ଥାତ୍ ରାଷ୍ଟ୍ରପତି ନିର୍ବାଚନରେ ତାଙ୍କର ୩.୨ ପ୍ରତିଶତ ଭୋଟ୍ ରହିଛି। ଯଦି ଗତଥର ପରି ଏନଡିଏ ବିଜେଡିର ସମର୍ଥନ ପାଇବ ତେବେ ପ୍ରାର୍ଥୀଙ୍କ ବିଜୟ ସୁନିଶ୍ଚିତ ହୋଇପାରିବ।
ପୁଣିଥରେ ଏନଡିଏକୁ ସମର୍ଥନ କରିବ କି ବିଜେଡି ?
୨୦୧୭ ରାଷ୍ଟ୍ରପତି ନିର୍ବାଚନରେ ଏନଡିଏର ପ୍ରାର୍ଥୀ ହୋଇଥିଲେ ରାମନାଥ କୋବିନ୍ଦ । ସେ ୬୫.୬୫ ପ୍ରତିଶତ ଭୋଟ୍ ପାଇଥିଲେ। ବିରୋଧୀ ମୀରା କୁମାରୀଙ୍କୁ ପ୍ରାର୍ଥୀ କରିଥିଲେ । କିନ୍ତୁ ସେ ମାତ୍ର ୩୪.୩୫ ପ୍ରତିଶତ ଭୋଟ୍ ପାଇଥିଲେ। ରାଷ୍ଟ୍ରପତି ନିର୍ବାଚନ ଉଭୟ ବିଧାୟକ ଏବଂ ସାଂସଦ ଭୋଟ୍ ଦିଅନ୍ତି । ସଂସଦରୁ ୭୭୬ ସାଂସଦ ଏବଂ ଦେଶର ବିଭିନ୍ନ ବିଧାନସଭାରୁ ୪୧୨୦ ବିଧାୟକ ରହିଛନ୍ତି। ପ୍ରତ୍ୟେକ ସାଂସଦଙ୍କ ଭୋଟର ମୂଲ୍ୟ ୭୦୮ ସହିତ ସମାନ। ଯେଉଁଠାରେ ବିଧାୟକଙ୍କ ଭୋଟର ମୂଲ୍ୟ ସେମାନଙ୍କ ରାଜ୍ୟର ଜନସଂଖ୍ୟା ଏବଂ ଆସନ ସଂଖ୍ୟା ଅନୁସାରେ ଭିନ୍ନ ରହିଥାଏ।
ବିଜେପି ହାତରୁ ଖସିଛି ଅନେକ ରାଜ୍ୟ
୨୦୧୭ ରୁ ୨୦୨୨ ପର୍ଯ୍ୟନ୍ତ ଦେଶର ରାଜନୀତିକ ଚିତ୍ର ବହୁତ ବଦଳିଛି । ତେଣୁ ରାଷ୍ଟ୍ରପତି ନିର୍ବାଚନର ଗଣିତ ମଧ୍ୟ ବଦଳିଛି। ସେତେବେଳେ ୨୧ଟି ରାଜ୍ୟରେ ଏନଡିଏ ସରକାର ଥିଲା। ମାର୍ଚ୍ଚ ୧୦ ପରେ ଏହି ଆକଳନକୁ ଦେଖିବା, ତେବେ ୧୭ଟି ରାଜ୍ୟରେ ଏନଡିଏ ସରକାର ଅଛନ୍ତି, ଯାହା ଦେଶର ୪୪ ପ୍ରତିଶତ ଏବଂ ଜନସଂଖ୍ୟାର ୪୯.୬ ପ୍ରତିଶତ ଉପରେ ଶାସନ କରେ। ମହାରାଷ୍ଟ୍ର, ତାମିଲନାଡୁ ଏବଂ ରାଜସ୍ଥାନ ଭଳି ବଡ ରାଜ୍ୟରେ ବିଜେପି ଏବଂ ଏହାର ସହଯୋଗୀମାନଙ୍କ ହାତରୁ କ୍ଷମତା ଯାଇଛି। ଛତିଶଗଡ ଏବଂ ଝାଡଖଣ୍ଡ ମଧ୍ୟ ବିଜେପି ହାତରୁ ଖସିଛି। ଟିଡିପି, ଶିବସେନା ଏବଂ ଅକାଳୀ ଦଳ ଭଳି ସହଯୋଗୀ ମଧ୍ୟ ପର୍ଯ୍ୟାୟକ୍ରମେ ବିଜେପି ପାଖରୁ ଦୂରେଇ ଯାଇଛନ୍ତି। କେବଳ ଜେଡିୟୁ ବିଜେପି ସହିତ ବିହାରରେ ରହିଛି।
ବିଜେଡି ଓ ଓ୍ୱାଇଏସଆର ଉପରେ ମୋଦୀ ସରକାରର ନଜର
ରାଷ୍ଟ୍ରପତି ନିର୍ବାଚନରେ ବିଜେପି ନେତୃତ୍ୱାଧୀନ ଏନଡିଏ ପାଇଁ ବିଜେଡି ଏବଂ ଓ୍ୱାଇଏସଆର କଂଗ୍ରେସର ସମର୍ଥନ ଜରୁରୀ । ୨୦୧୭ ନିର୍ବାଚନରେ ଏନଡିଏ ପ୍ରାର୍ଥୀ ରାମନାଥ କୋବିନ୍ଦଙ୍କ ସପକ୍ଷରେ ଭୋଟ୍ ଦେଇଥିବା ବିଜେଡି ୨୦୨୨ ନିର୍ବାଚନରେ ଏପର୍ଯ୍ୟନ୍ତ ସ୍ପଷ୍ଟ କରିନାହିଁ। ଏ ନେଇ ଏନଡିଟିଭିର ପ୍ରଶ୍ନର ଉତ୍ତରରେ ନବୀନ ପଟ୍ଟନାୟକ କହିଛନ୍ତି ଯେ ପ୍ରଥମେ ପ୍ରାର୍ଥୀ କିଏ ଦେଖିବା ଏହା ଅଧିକ ଗୁରୁତ୍ୱପୂର୍ଣ୍ଣ। ତା’ପରେ ଆମେ ନିଷ୍ପତ୍ତି ନେବା। ତେବେ ଏପର୍ଯ୍ୟନ୍ତ ଏ ବିଷୟରେ କୌଣସି ଆଲୋଚନା ହୋଇନାହିଁ।
