ବର୍ମିଂହାମ: ଚଳିତ ରାଜ୍ୟଗୋଷ୍ଠୀ କ୍ରୀଡାରେ ୱେଟଲିଫ୍ଟରଙ୍କ ପରେ ଭାରତୀୟ ରେସଲରମାନେ କମାଲ ଦେଖାଇବା ଆରମ୍ଭ କରିଛନ୍ତି । ବଜରଙ୍ଗ ପୁନିଆ, ସାକ୍ଷୀ ମଲିକ, ଅଂଶୁ ମଲିକ ନିଜ ନିଜ ବିଭାଗର ଫାଇନାଲରେ ପ୍ରବେଶ କରି ଅତି କମରେ ରୌପ୍ୟ ପଦକ ନିଶ୍ଚିତ କରିଛନ୍ତି । ପୁରୁଷ ୬୫ କିଗ୍ରା ବିଭାଗ ସେମିଫାଇନାଲରେ ବଜରଙ୍ଗ ଇଂଲଣ୍ଡର ଜର୍ଜ ର୍ୟାମଙ୍କୁ ୧୦-୦ରେ ପରାସ୍ତ କରିଥିଲେ । ସ୍ୱର୍ଣ୍ଣ ପଦକ ମୁକାବିଲାରେ ସେ କାନାଡାର ଲଚଲାନ ମ୍ୟାକନୀଲଙ୍କୁ ଭେଟିବେ । ମହିଳା ୬୨ କିଗ୍ରା ଫ୍ରି ଷ୍ଟାଇଲ ବିଭାଗରେ ସାକ୍ଷୀ କ୍ୟାମରେନୁର ବର୍ଥ ଏଟେନ ନଗୋଲେଙ୍କୁ ୧୦-୦ ଏକତରଫା ମୁକାବିଲାରେ ପରାସ୍ତ କରିଥିଲେ । ଫାଇନାଲରେ ସେ କାନାଡାର ଏନା ଗୋଡନେଜଙ୍କୁ ଭେଟିବେ । ମହିଳା ୫୭ କିଗ୍ରା ବିଭାଗରେ ଅଂଶୁ ଶ୍ରୀଲଙ୍କାର ନେଥମୀ ପୋରୁଥୋଟେଜୁଙ୍କୁ ପରାସ୍ତ କରି ଫାଇନାଲରେ ପ୍ରବେଶ କରିଛନ୍ତି । ତାଙ୍କ ପ୍ରତିଦ୍ୱନ୍ଦ୍ୱୀଙ୍କ ନାମ ଘୋଷଣା କରାଯାଇ ନାହିଁ ।
କ୍ୱାର୍ଟରରେ ସିନ୍ଧୁ: ବ୍ୟାଡମିଂଟନର ମହିଳା ସିଙ୍ଗଲ୍ସ ବିଭାଗରେ ପିଭି ସିନ୍ଧୁ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି । ପ୍ରି-କ୍ୱାର୍ଟରରେ ସେ ୟୁଗାଣ୍ଡାର ହୁସିନା କୋବୁଗାବେଙ୍କୁ ୨୧-୧୦, ୨୧-୯ ସିଧାସଳଖ ଗେମରେ ପରାସ୍ତ କରିଥିଲେ ।
Comments are closed.