ନୂଆଦିଲ୍ଲୀ: ସୁରଟ କୋର୍ଟ ଗୁରୁବାର ରାହୁଲ ଗାନ୍ଧୀଙ୍କୁ ୨ ବର୍ଷ ସଜା ଶୁଣାଇବାର ୨୪ ଘଣ୍ଟା ପରେ ଲୋକସଭା ସଚିବାଳୟ ରାହୁଲ ଗାନ୍ଧୀଙ୍କ ସାଂସଦ ପଦକୁ ରଦ୍ଦ କରିଛି । ଏହାକୁ ନେଇ ସାରା ରାଜ୍ୟରେ ଚର୍ଚ୍ଚାର ବିଷୟ ହୋଇଥିବାବେଳେ କଂଗ୍ରେସ ପକ୍ଷରୁ ଏହାକୁ କଡା ସମାଲୋଚନା କରାଯାଇଛି ।
ସଦସ୍ୟତା ପଦ ରଦ୍ଧ ଉପରେ ପ୍ରତିକ୍ରିୟା ରଖି କଂଗ୍ରେସ ପକ୍ଷରୁ ଏକ ଟୁଇଟ କରି କୁହାଯାଇଛି ଏହା ରାଜେନୖତିକ ଏବଂ ନ୍ୟାୟିକ ଯୁଦ୍ଧ । ରାହୁଲ ଦେଶବାସୀଙ୍କ ପାଇଁ ସାରା ଦେଶ ବୁଲି ଲଢେଇ କରୁଥିଲେ । ଲୋକତନ୍ତ୍ରକୁ ବଞ୍ଚାଇବାକୁ ପ୍ରୟାସ କରୁଥିଲେ । ହେଲେ ତାଙ୍କ ବିରୋଧରେ ଏହା ଏକ ଷଡଯନ୍ତ୍ର । ଷଡଯନ୍ତ୍ର ସତ୍ତ୍ୱେ ମଧ୍ୟ ଏହି ଲଢେଇ ଜାରି ରହିବ ।
କଂଗ୍ରେସ ସାଂସଦ ଜୟରାମ ରମେଶ କହିଛନ୍ତି, ‘ଆମେ ଉଭୟ ଆଇନଗତ ଓ ରାଜନୈତିକ ଲଢେଇ କରିବୁ । ଆମେ ଚୁପ୍ ବସିବୁନି । ପ୍ରଧାନମନ୍ତ୍ରୀ-ଅଦାନୀ ଲିଙ୍କ ଏବଂ ରାହୁଲ ଗାନ୍ଧୀ ସଦସ୍ୟତା ରଦ୍ଦ ଘଟଣାରେ ଜେପିସି ଗଠନ ପାଇଁ ଲଢିବୁ । ଭାରତର ଗଣତନ୍ତ୍ର ଓମ ଶାନ୍ତି’ ।
ମଲ୍ଲିକାର୍ଜ୍ଜୁନ ଖଡଗେ କହିଛନ୍ତି, ସତ କହୁଥିବା ଓ ଜନତାଙ୍କ ହକ୍ ପାଇଁ ଲଢେଇ କରୁଥିବା ରାହୁଲଙ୍କ ସ୍ୱର ଚାପିବାକୁ ସଦସ୍ୟତା ପଦ ରଦ୍ଦ ହୋଇଛି ।
ସେହିପରି ବରିଷ୍ଠ କଂଗ୍ରେସ ନେତା ଶଶି ଥରୁର କହିଛନ୍ତି, ରାହୁଲଙ୍କ ବିରୋଧରେ ଏପରି କାର୍ୟ୍ୟାନୁଷ୍ଠାନ ମୋତେ ସ୍ତବ୍ଧ କରିଛି । ଏହା ଗଣତନ୍ତ୍ର ପ୍ରତି ହାନିକାରକ ।
ବରିଷ୍ଠ ନେତା ଦିଗବିଜୟ ସିଂ କହିଛନ୍ତି, ବିଜେପି ରାହୁଲ ଗାନ୍ଧୀଙ୍କୁ ଭୟ କରୁଛି । ସେଥିପାଇଁ ରାହୁଲଙ୍କ ସଦସ୍ୟତା ପଦ ରଦ୍ଦ କରାଯାଇଛି । ସରକାରଙ୍କୁ ଟାର୍ଗେଟ କରୁଥିବାରୁ ରାହୁଲଙ୍କ ମୁହଁ ଚୁପ୍ କରିବାକୁ ଏଭଳି ପ୍ରୟାସ ବିଜେପି ପକ୍ଷରୁ କରାଯାଇଛି ।
ଅନ୍ୟପକ୍ଷେ କେନ୍ଦ୍ର ରାଜ୍ୟ ଆଇନ ମନ୍ତ୍ରୀ ଏସପିଏସ ବାଘେଲ କହିଛନ୍ତି ‘ଏହା ଆଇନଗତ କାର୍ଯ୍ୟାନୁଷ୍ଠାନ । ରାହୁଲଙ୍କ ବିରୋଧରେ ଏପରି କାର୍ଯ୍ୟାନୁଷ୍ଠାନ ପ୍ରମାଣିତ କରୁଛି ଯେ ଆଇନ ଆଗରେ ସମସ୍ତେ ସମାନ ।’