ତରୁଣ କୁମାର ମିଶ୍ର 
ଆମେ ସବୁ ଏ ଦେଶର
ଟିକି ଟିକି ତାରକା ,
ଅଜ୍ଞାନର ଅନ୍ଧକାରେ
ଆଲୋକର ବର୍ତ୍ତିକା ।
ଜାତି ଭାଷା ବିଭେଦତା
ନାହିଁ ଆମ ମନରେ ,
ମାନବତା ଆମ ଜାତି
ଆମେ ଭାରତୀୟରେ ।
ଆମ ମନ ବଗିଚାରେ
ଭଳି ଭଳି କୁସୁମ ,
ବାସନାରେ ଚହଟଇ
ଗୁଣ ମଧ୍ଯ ଅସୀମ ।
ଅହିଂସା ଆମର ମନ୍ତ୍ର
ସତ୍ଯ ଶାନ୍ତି ପଥିକ ,
ସେବା ଦିଏ ବୃକ୍ଷ ଛାୟା
ଫଳ ଫଳେ ଅମୃତ ।
ପ୍ରଗତିର ଧାରା ଏଥେ
ନଦୀ ନୀରେ ବହଇ ,
ଜନନୀର ସୁଧା ବାରି
ମା ଧରଣୀ ଦିଅଇ ।
ତମାମ ବିଶ୍ବ ଅଟଇ
ଆମର ପରିବାର ,
ପରସ୍ପର ମଧ୍ଯେ ସ୍ନେହ
ଶ୍ରଦ୍ଧା ଆମ ଅପାର ।
ଖାଦ୍ଯ ବାସ ବସ୍ତ୍ର ପାଇଁ
ଆହ୍ବାନ ଯେ ଆମରି ,
ସମସ୍ତଙ୍କୁ ଯୋଗାଇବା
ଭେଦ ଭାବ ପାଶୋରି ।
ମହାମାରୀ ହିଂସା ଲୁଟ
ଠକାମୀ ଓ ଶୋଷଣ ,
ଦୂର କରିବାକୁ ଚେଷ୍ଟା
ଆମ ପାଇଁ ଆହ୍ବାନ ।
ପରିବେଶ ରକ୍ଷା ପାଇଁ
ଗଛ ଆମେ ଲଗାଉ ,
ପଶୁ ପକ୍ଷୀ ସଙ୍ଗେ ମିତ୍ର
ସ୍ଥାପନ କରିଥାଉ ।
ଜହ୍ନ ରାଇଜରେ ଆମ
ଚାନ୍ଦ୍ରାୟଣ ତୃତୀୟ ,
ପହଁଞ୍ଚି ଦେଇଛି ବାର୍ତ୍ତା
ଜହ୍ନ ଆମ ଆତ୍ମୀୟ ।
ମାଆ ଧରଣୀର ଭାଇ
ମାମୁଁ ଆମ ସବୁରି ,
ହସି ହସାଇବ ଧରା
ପାଶେ ଥିବ ଆମରି ।
ଖଣ୍ଡଗିରି ,ଭୁବନେଶ୍ବର
