ବନ୍ଦିତା ଦାଶ 
ପାଠ ଆମେ ପଢିବା
ଆମ ଦେଶ ଗଢିବା
ଠିକ୍ ସମୟରେ ଆମେ
ଠିକ୍ କାମ କରିବା ।
ସକାଳଟା ସଞ୍ଜ ହୁଏ
ସଞ୍ଜ ହୁଏ ରାତି
ଦିନ ଦିନ ବଢିଚାଲେ
ବଢିଚାଲେ ଗତି ।
ସାତଦିନ ମିଶିହୁଏ
ଗୋଟିଏ ସପ୍ତାହ
ଚାରି ସପ୍ତାହକୁ ନେଇ
ମାସଟିଏ କୁହ ।
ବାରମାସ ମିଶିଗଲେ
ହୁଏ ଏକ ବରଷ
ଛଅ ଋତୁ ଗୋଟା ଗୋଟା
ଥାଏ କେତେ ସରସ ।
ସମୟକୁ ସନମାନ
ଦିଏ ଯିଏ ଧରାରେ
ତା’ ମୁଣ୍ଡରେ ସୁନାପାଗ
ଫୁଲମାଳ ଗଳାରେ।
ପାଠ ଆମେ ପଢିବା
ପାଠ ସଙ୍ଗେ ଖେଳିବା
ସମୟର ତାଳେତାଳେ
ନିଜକୁ ବି ଗଢିବା ।
ଠକିବାନି ସମୟକୁ
ଠକିବାନି ପାଠକୁ
ଯିଏ ଠକେ ଏ ସବୁ
ନିଜେ ଠକେ ନିଜକୁ।
ଭାରି ମୂଲ୍ୟବାନ ଏଠି
ଏକାହିଁ ସମୟ
ତାଳଦେଇ ତା’ ସହ
ଚାଲ, ହେବ ବିଜୟ ।
ବନ୍ଦିତା ଦାଶ ,
କାଂଶବାହାଲ ।