ବାରିପଦା: ବିଦ୍ୟାଳୟରେ ଦ୍ୱିତୀୟ ଶ୍ରେଣୀ ଛାତ୍ରଙ୍କୁ ମାଡ଼ । ମନ ଇଚ୍ଛା ପିଟିଲେ ଶିକ୍ଷକ । ମୟୂରଭଞ୍ଜ ଜିଲ୍ଲା କପ୍ତିପଦା ବ୍ଲକ କପ୍ତିପଦା ଉଚ୍ଚ ପ୍ରାଥମିକ ବିଦ୍ୟାଳୟର ଶିକ୍ଷକ ଦ୍ୱିତୀୟ ଶ୍ରେଣୀର ଛାତ୍ରଙ୍କୁ ମାଡ଼ ମାରିଥିବା ନେଇ ଅଭିଯୋଗ ହୋଇଛି ।
ସୂଚନା ଅନୁସାରେ, ୬ ବର୍ଷର ଶୁଭ ବେହେରା ଦ୍ୱିତୀୟ ଶ୍ରେଣୀରେ ପଢ଼େ । ଗତକାଲି ଶୁଭ ବିଦ୍ୟାଳୟ ଯାଇଥିବା ବେଳେ ନାଳରୁ ବାଡ଼ି ସାହାଯ୍ୟରେ ମୃତ ସାପଟିକୁ ଉଠାଇ ଥିଲା । ଯାହାକୁ ନେଇ ଅନ୍ୟ ପିଲା ଶିକ୍ଷକଙ୍କୁ ଜଣାଇଥିଲେ ।
ପିଲାଙ୍କ ଠାରୁ ଶୁଣିବା ପରେ ବିଦ୍ୟାଳୟର ଶିକ୍ଷକ ଜୟନ୍ତ କୁମାର ମଲ୍ଲିକ ମନ ବୁଝିବା ଯାଏ ଶୁଭକୁ ମାଡ଼ ମାରିଥିବା ଅଭିଯୋଗ ହୋଇଛି । ଏବେ ବି ଶୁଭର ପିଠିରେ ରହିଛି ମାଡ଼ର ଦାଗ । ବିଦ୍ୟାଳୟରୁ ଫେରିବା ପରେ ଘର ଲୋକ ଏ ବିଷୟରେ ଜାଣିବା ପରେ କପ୍ତିପଦା ଥାନାରେ ଏତଲା ଦେଇଛନ୍ତି । ଶୁଭକୁ କପ୍ତିପଦା ମେଡିକାଲରେ ଭର୍ତ୍ତି କରାଯାଇଛି ।