୧୫ ବର୍ଷୀୟ ବୈଭବ ସୂର୍ଯ୍ୟବଂଶୀଙ୍କ ସଫଳତା ପଛର କାହାଣୀ

ନୂଆଦିଲ୍ଲୀ: ପ୍ରତିଭା ଆଗରେ ବୟସର କୌଣସି ମାନେ ନାହିଁ, ଏହାକୁ ପୁଣି ଥରେ ପ୍ରମାଣିତ କରି ଦେଖାଇଛନ୍ତି ୧୫ ବର୍ଷର ଯୁବ କ୍ରିକେଟ୍ ତାରକା ବୈଭବ ସୂର୍ଯ୍ୟବଂଶୀ। ଆଇପିଏଲ୍ ମୈଦାନରେ ନିଜର ଚୌକା-ଛକା ବର୍ଷାରେ କ୍ରିକେଟ୍ ଦୁନିଆକୁ ସ୍ତବ୍ଧ କରିବା ପରେ, ଏବେ ଟିମ୍ ଇଣ୍ଡିଆର ୟୁକେ ଗସ୍ତ ପାଇଁ ଟି-୨୦ ଦଳରେ ସେ ସ୍ଥାନ ପାଇଛନ୍ତି। କିନ୍ତୁ ଆପଣ ଜାଣିଛନ୍ତି କି, ଏହି ୧୫ ବର୍ଷର ବାଳକର ସଫଳତା ପଛରେ ରହିଛି କେତେ ବଡ଼ ସଂଘର୍ଷ ଏବଂ କଠିନ ପରିଶ୍ରମ ? ଦିନକୁ ୮ ଘଣ୍ଟା ପ୍ରାକ୍ଟିସ୍ ଆଉ ୬୦୦ରୁ ଅଧିକ ବଲ୍‌ର ସାମ୍ନା କରନ୍ତି ବୈଭବ !

ମାତ୍ର ୮ ବର୍ଷ ବୟସରୁ ହାତରେ ବ୍ୟାଟ୍ ଧରି କ୍ରିକେଟ୍ ଏକାଡେମୀରେ ପାଦ ଥାପିଥିଲେ ବୈଭବ। ଗତ ୬ ବର୍ଷ ଧରି ଲଗାତାର ସେ ଯେଉଁ ପରିଶ୍ରମ କରିଛନ୍ତି, ତାହା ଆଜି ତାଙ୍କୁ ଏହି ସଫଳତାର ଶୀର୍ଷରେ ପହଞ୍ଚାଇଛି। ବୈଭବଙ୍କ ପିଲାଦିନର କୋଚ୍ ମନୀଷ ଓଝାଙ୍କ କହିବା ଅନୁଯାୟୀ, ବୈଭବ ଦିନକୁ ପ୍ରାୟ ୮ ଘଣ୍ଟା କଠିନ ଅଭ୍ୟାସ କରନ୍ତି। ସକାଳ ୭ଟା ୩୦ ମିନିଟ୍‌ରୁ ଆରମ୍ଭ ହେଉଥିବା ଏହି ଅଭ୍ୟାସ ପ୍ରତିଦିନ ଅପରାହ୍ନ ୪ଟା ପର୍ଯ୍ୟନ୍ତ ଚାଲେ। ଥ୍ରୋ-ଡାଉନ୍, ନେଟ୍ ସେସନ୍ ଏବଂ ବୋଲିଂ ମେସିନ୍ ସାହାଯ୍ୟରେ ସେ ଦିନକୁ ପ୍ରାୟ ୧୦୦ ଓଭର ଅର୍ଥାତ୍ ୬୦୦ରୁ ଅଧିକ ବଲ୍‌ର ସାମ୍ନା କରି ବ୍ୟାଟିଂ କରନ୍ତି।

ପଡ଼ିଆରେ ବଡ଼ ବଡ଼ ସଟ୍ସ ଖେଳିବା ପଛରେ ରହିଛି ବୈଭବଙ୍କ ଦୃଢ଼ ‘ମସଲ୍ ମେମୋରୀ’। ଲଗାତାର ହଜାର ହଜାର ବଲ୍ ଖେଳିବା ଦ୍ୱାରା ସେ ଯେକୌଣସି ଚାପର ପରିସ୍ଥିତିରେ ମଧ୍ୟ ସହଜରେ ବଡ଼ ସଟ୍ ମାରିବାରେ ସଫଳ ହେଉଛନ୍ତି। ଏହି କଠିନ ପରିଶ୍ରମ ବଳରେ ହିଁ ସେ ଚଳିତ ଆଇପିଏଲ୍‌ରେ ୨୩୭ରୁ ଅଧିକ ବିସ୍ଫୋରକ ଷ୍ଟ୍ରାଇକ୍ ରେଟ୍ ସହ ୭୭୬ ରନ୍ ସଂଗ୍ରହ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି।

ବୈଭବଙ୍କ ସଫଳତାର ସୂତ୍ର:
ଦୈନିକ ପ୍ରାକ୍ଟିସ୍: ୮ ଘଣ୍ଟା (ସକାଳ ୭:୩୦ ରୁ ଅପରାହ୍ନ ୪:୦୦)
ପ୍ରତିଦିନ ଖେଳନ୍ତି: ୧୦୦ ଓଭର (୬००ରୁ ଅଧିକ ବଲ୍)
ଆଇପିଏଲ୍ ସ୍କୋର: ୭୭୬ ରନ୍
ଷ୍ଟ୍ରାଇକ୍ ରେଟ୍: ୨୩୭+

ତେବେ ଏହି ସଫଳତା କେବଳ ବୈଭବଙ୍କର ନୁହେଁ, ବରଂ ତାଙ୍କ ପଛରେ ରହିଛି ତାଙ୍କ ପିତା ସଞ୍ଜୀବ ଏବଂ ମାତା ଆରତୀଙ୍କ ଅତୁଳନୀୟ ତ୍ୟାଗ। ବୈଭବଙ୍କୁ ଅଭ୍ୟାସ କରାଇବା ପାଇଁ ପରିବାର ପ୍ରତିଦିନ ସମସ୍ତୀପୁରରୁ ପାଟନା ପର୍ଯ୍ୟନ୍ତ ଏକ ଦୀର୍ଘ ଯାତ୍ରା କରୁଥିଲେ। କୋଚ୍‌ଙ୍କ କହିବା ଅନୁସାରେ, ବୈଭବଙ୍କ ମା’ ଆରତୀ ଦେବୀ ପ୍ରତିଦିନ ରାତି ୨ଟାରୁ ଉଠି ରୋଷେଇ କରନ୍ତି। ସେ କେବଳ ନିଜ ପୁଅ ବା ସ୍ୱାମୀଙ୍କ ପାଇଁ ନୁହେଁ, ବରଂ ସାଙ୍ଗରେ ଆସୁଥିବା ଅନ୍ୟ ଖେଳାଳି, ଡ୍ରାଇଭର ଏବଂ ଏକାଡେମୀର ଅନ୍ୟ ପିଲାମାନଙ୍କ ପାଇଁ ମଧ୍ୟ ଖାଦ୍ୟ ପ୍ରସ୍ତୁତ କରି ପଠାଉଥିଲେ। ପରିବାରର ଏହି ତ୍ୟାଗ ପାଇଁ ଆଜି ବୈଭବଙ୍କୁ ଟିମ୍ ଇଣ୍ଡିଆର ନୀଳ ଜର୍ସି ପିନ୍ଧିବାକୁ ଯୋଗ୍ୟ କରିଛି।

ବୈଭବ ସୂର୍ଯ୍ୟବଂଶୀଙ୍କ ଏହି କାହାଣୀ ପ୍ରମାଣିତ କରୁଛି ଯେ ଯଦି ପ୍ରତିଭା ସହିତ ନିରନ୍ତର ପରିଶ୍ରମ, ଅନୁଶାସନ ଏବଂ ପରିବାରର ସହଯୋଗ ଥାଏ, ତେବେ ଖୁବ୍ କମ୍ ବୟସରେ ମଧ୍ୟ ଆକାଶଛୁଆଁ ସ୍ୱପ୍ନକୁ ସାକାର କରାଯାଇପାରେ। ଆଜି ବୈଭବ ଦେଶର ଲକ୍ଷ ଲକ୍ଷ ଯୁବ ଖେଳାଳିଙ୍କ ପାଇଁ ଏକ ବଡ଼ ପ୍ରେରଣା ପାଲଟିଛନ୍ତି। ଆଗାମୀ ୟୁକେ ଗସ୍ତରେ ବୈଭବ ଭାରତ ପାଇଁ ଚମତ୍କାର ପ୍ରଦର୍ଶନ କରିବେ ବୋଲି ଆଶା ।