ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ନୂଆ ସଂସଦ ଗୃହର ଉଦଘାଟନ କରିଛନ୍ତି। ଉଦ୍ଘାଟନୀ ସମାରୋହରେ ବିରୋଧୀ ଦଳ ସମେତ ଟିଏମସି ଏହାକୁ ବର୍ଜନ କରିଛି। କିନ୍ତୁ ଏହି କାର୍ଯ୍ୟକ୍ରମରେ ଦୁଇ ଟିଏମସି ସାଂସଦ ଶିଶିର ଅଧିକାରୀ ଏବଂ ଦ୍ବିବେନ୍ଦୁ ଅଧିକାରୀ ଉପସ୍ଥିତ ଥିଲେ। ନୂଆ ସଂସଦ ଗୃହର ଉଦଘାଟନୀ ସମାରୋହରେ ଶିଶିର ଅଧିକାରୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ହାତ ମିଳାଇଥିବାର ନଜର ଆସିଥିଲେ। ଏହାପରେ ପଶ୍ଚିମବଙ୍ଗ ରାଜନୀତି ସରଗରମ ହୋଇଛି।
ସାଂସଦ ଶିଶିର ଅଧିକାରୀ ଆରମ୍ଭରୁ ଟିଏମସି ସହିତ ରହିଛନ୍ତି। ଦୀର୍ଘ ଦିନ ଧରି ବିଧାୟକ ଥିଲେ, କିନ୍ତୁ ୨୦୨୦ରେ ପୁଅ ଶୁଭେନ୍ଦୁ ଅଧିକାରୀ ବିଜେପିରେ ଯୋଗଦେବା ପରେ ପରିସ୍ଥିତି ବଦଳି ଯାଇଛି। ତାଙ୍କ ଭାଇ ସୋମେନ୍ଦୁ ଅଧିକାରୀ ମଧ୍ୟ ଶୁଭେନ୍ଦୁ ଅଧିକାରୀଙ୍କ ପରେ ବିଜେପିରେ ଯୋଗ ଦେଇଥିଲେ। ସେତେବେଳେ ପଶ୍ଚିମବଙ୍ଗର ଶାସକ ଦଳ ଟିଏମସିର ବହୁ ନେତା ଓ ମନ୍ତ୍ରୀ ବିଜେପିରେ ଯୋଗ ଦେଇଥିଲେ। କେତେକ ସ୍ୱତନ୍ତ୍ର ବିମାନ ଯୋଗେ ଦିଲ୍ଲୀ ଯାଇଥିଲେ। ପରେ, ଯେତେବେଳେ ୨୦୨୧ ବିଧାନସଭା ନିର୍ବାଚନରେ ଟିଏମସି ଜିତିଲା ସେଥିମଧ୍ୟରୁ ଅନେକ ଘର ବାହୁଡିଥିଲେ। କିନ୍ତୁ ଏହାର ବ୍ୟତିକ୍ରମ ହେଉଛନ୍ତି ଶୁଭେନ୍ଦୁ ଅଧିକାରୀ। ସେ ଟିଏମସିକୁ ଫେରିନଥିଲେ, କିନ୍ତୁ ମମତା ବାନାର୍ଜୀ ଏବଂ ଅଭିଷେକ ବାନାର୍ଜୀଙ୍କୁ କଡା ସମାଲୋଚନା କରିବା ପରେ ସେ ଏବେ ରାଜ୍ୟରେ ବିରୋଧୀ ଦଳର ନେତା।
ଯଦିଓ ଦ୍ୱିବେନ୍ଦୁ ଅଧିକାରୀ ବାରମ୍ବାର କହିଛନ୍ତି ଯେ ସେ ଟିଏମସିରେ ଅଛନ୍ତି, କିନ୍ତୁ ଦଳୀୟ ସୂତ୍ର ଅନୁଯାୟୀ, ଅଧିକାରୀ ପରିବାରର ଏହି ଦୁଇ ସାଂସଦଙ୍କ ସହ ଟିଏମସି କୌଣସି ସମ୍ପର୍କ ନାହିଁ।
ଅପରପକ୍ଷେ, ଉଭୟ ସାଂସଦ ବାପ-ପୁଅ ପଶ୍ଚିମବଙ୍ଗ ବିଧାନସଭାରେ ଭୋଟ୍ ଦେବା ପରିବର୍ତ୍ତେ ଦିଲ୍ଲୀଆସିଥିଲେ ରାଷ୍ଟ୍ରପତି ନିର୍ବାଚନରେ ଭୋଟ୍ ଦେବାକୁ। ସେତେବେଳେ ଟିଏମସି ନେତା କୁନାଲ ଘୋଷ କହିଥିଲେ ଯେ ସେ ଶାରୀରିକ ତଥା ମାନସିକ ସ୍ତରରେ ବିଜେପି ସହ ଅଛନ୍ତି।
ଏଥର ନୂଆ ସଂସଦର ଉଦଘାଟନ ନେଇ ଶିଶିର ଅଧିକାରୀ ବିବାଦରେ ଅଛନ୍ତି। କଂଗ୍ରେସ ଏବଂ ଟିଏମସି ସମେତ ଅନେକ ଦଳ ପୂର୍ବରୁ ଏହି କାର୍ଯ୍ୟକ୍ରମକୁ ବର୍ଜନ କରିବେ ବୋଲି ଘୋଷଣା କରିଥିଲେ ମଧ୍ୟ ଜାଣିବାକୁ ମିଳିଥିଲା ଯେ ଟିଏମସିରୁ ନିର୍ବାଚନ ଜିତିଥିବା ସାଂସଦ ଉଭୟ ଶିଶିର ଅଧିକାରୀ ଏବଂ ଦ୍ୱିବେନ୍ଦୁ ଅଧିକାରୀ ନବନିର୍ମିତ ସଂସଦ ଗୃହର ଲୋକସଭା ଆସନରେ ଉପସ୍ଥିତ ଥିଲେ।
ଅଭିଭାଷଣ ପରେ ପ୍ରଧାନମନ୍ତ୍ରୀ ଅନେକ ଦଳର ସାଂସଦଙ୍କୁ ଭେଟି ଅଭିବାଦନ ଜଣାଇଥିଲେ। ସେହି ସମୟରେ ଶିଶିର ଅଧିକାରୀ ପ୍ରଧାନମନ୍ତ୍ରୀଙ୍କ ସହ ହାତ ମିଳାଇଥିବାର ନଜର ଆସିଥିଲେ।
ଏ ସମ୍ପର୍କରେ ପଚରାଯିବାରୁ ସାଂସଦ ଦ୍ୱିବେନ୍ଦୁ ଅଧିକାରୀ କହିଛନ୍ତି, ‘ଆମକୁ ଦଳ ପକ୍ଷରୁ ସୂଚନା ଦିଆଯାଇ ନାହିଁ। ଏପରିକି ଆମକୁ ଆସିବାକୁ କେହି ଅଟକାଇ ନଥିଲେ। ମୁଁ ପୁରୁଣା ସଂସଦରେ ବସିବାର ସୁଯୋଗ ପାଇଲି। ମୁଁ ଆଜି ନୂଆ ସଂସଦରେ ପ୍ରବେଶ କରିବାକୁ ସକ୍ଷମ ହେଲି। ଏହା ମୋ ପାଇଁ ଗର୍ବର ବିଷୟ। ଏଥିରେ ରାଜନୀତି ନ ଦେଖିବା ଭଲ।