ଚେନ୍ନାଇରୁ ଦିଲ୍ଲୀ ପର୍ଯ୍ୟନ୍ତ ଏନଡିଏ ଶକ୍ତିଶାଳୀ… ତଥାପି ସରକାର ଗଢ଼ିବା ପାଇଁ କଂଗ୍ରେସର ସହାୟତା କାହିଁକି ଚାହିଁଲେ ଥାଲାପତି ବିଜୟ?

ଚେନ୍ନାଇ: ତାମିଲନାଡୁ ବିଧାନସଭା ନିର୍ବାଚନ ପରେ ସାଉଥ ସୁପରଷ୍ଟାର ବିଜୟଙ୍କ ଦଳ ‘ଟିଭିକେ’ (TVK) କଂଗ୍ରେସର ସମର୍ଥନରେ ସରକାର ଗଢିବା ପାଇଁ ଦାବି କରିଛି। ରାଜ୍ୟର ୨୩୪ଟି ଆସନ ମଧ୍ୟରୁ ସରକାର ଗଢ଼ିବା ପାଇଁ ୧୧୭ଟି ଆସନ ଆବଶ୍ୟକ ହେଉଥିବା ବେଳେ ବିଜୟଙ୍କ ଦଳକୁ ୧୦୭ଟି (କିଛି ରିପୋର୍ଟ ଅନୁସାରେ ୧୦୮) ଆସନ ମିଳିଛି, ଯାହା ବହୁମତଠାରୁ ମାତ୍ର କିଛି କମ୍। ଏହି ପରିପ୍ରେକ୍ଷୀରେ ସେ ମାତ୍ର ୫ଟି ଆସନ ଜିତିଥିବା କଂଗ୍ରେସର ସମର୍ଥନ ଲୋଡ଼ିଛନ୍ତି।

ଏନଡିଏ (NDA) କୁ ଅଣଦେଖା କରିବାର କାରଣ:

ଯଦିଓ ୫୩ଟି ଆସନ ଜିତିଥିବା ଏନଡିଏ ମେଣ୍ଟର ଦଳଗୁଡ଼ିକ ବିଜୟଙ୍କୁ ସମର୍ଥନ ଦେବାକୁ ପ୍ରସ୍ତୁତ ଥିଲେ, ତଥାପି ସେ ସେମାନଙ୍କୁ ଗ୍ରହଣ କରିନାହାଁନ୍ତି।

ମେଣ୍ଟ ନ କରିବା ପଛର କାରଣ :

୧. ବିଚାରଧାରାର ବିରୋଧ  : ବିଜୟ ପୂର୍ବରୁ କହିଥିଲେ ଯେ ବିଜେପି ତାଙ୍କର ବୈଚାରିକ ବିରୋଧୀ ଏବଂ ଡିଏମକେ-ଏଆଇଏଡିଏମକେ ତାଙ୍କର ରାଜନୈତିକ ବିରୋଧୀ।

୨. ବିଜେପିଠାରୁ ଦୂରତା: ବିଜେପି ବର୍ତ୍ତମାନ ଏଆଇଏଡିଏମକେ ସହ ମେଣ୍ଟରେ ଅଛି, ଯାହାଙ୍କ ସହ ବିଜୟ ମେଣ୍ଟ କରିବାକୁ ଚାହୁଁନାହାଁନ୍ତି। ଏକାକୀ ବିଜେପି ପାଖରେ ମାତ୍ର ଗୋଟିଏ ଆସନ ଅଛି, ଯାହା ବିଜୟଙ୍କ ପାଇଁ ବିଶେଷ ଲାଭଦାୟକ ନୁହେଁ।

୩. କଂଗ୍ରେସର ଭୋଟ : ତାମିଲନାଡୁରେ କଂଗ୍ରେସର ଭଲ ଭୋଟ ଅଛି। କଂଗ୍ରେସ ସହ ରହିଲେ ଭବିଷ୍ୟତରେ ରାଜନୈତିକ ମୁଖ୍ୟଧାରାରେ ରହିବା ସହଜ ହେବ ବୋଲି ବିଜୟ ମନେ କରୁଛନ୍ତି।

୪. ଲୋକସଭା ଲକ୍ଷ୍ୟ: ବିଧାନସଭା ପରେ ଟିଭିକେର ନଜର ଆଗାମୀ ଲୋକସଭା ନିର୍ବାଚନ ଉପରେ ରହିଛି, ଯେଉଁଥିପାଇଁ ସେ କଂଗ୍ରେସ ସହ ସମ୍ପର୍କ ମଜଭୁତ କରିବାକୁ ଚାହୁଁଛନ୍ତି।

ଡିଏମକେ (DMK) ର ପ୍ରତିକ୍ରିୟା:

କଂଗ୍ରେସର ଏହି ସମର୍ଥନକୁ ଡିଏମକେ ‘ପଛପଟୁ ଛୁରୀ ମାରିବା’ ସହ ତୁଳନା କରିଛି। ଡିଏମକେ କହିଛି ଯେ କଂଗ୍ରେସ ସେମାନଙ୍କ ସହ ମିଶି ନିର୍ବାଚନ ଲଢ଼ିଥିଲା, କିନ୍ତୁ ଏବେ ଟିଭିକେ ସହ ମିଶି ସରକାର ଗଢ଼ିବାକୁ ଯାଉଛି। ଅନ୍ୟପଟେ କଂଗ୍ରେସ ଏହାକୁ ଏକ ରାଜନୈତିକ ପଦକ୍ଷେପ ବୋଲି କହିଛି।