ଶ୍ରୀନଗର:ଜମ୍ମୁ ଓ କାଶ୍ମୀରରେ ଶୀତଋତୁ ସମୟରେ ସୀମା ଆରପାରିରୁ ଆତଙ୍କବାଦୀଙ୍କ ଅନୁପ୍ରବେଶ ଘଟଣା ବୃଦ୍ଧି ପାଇଥାଏ। ତେବେ, ସୁରକ୍ଷା ବାହିନୀର କଡ଼ା ସତର୍କତା ଯୋଗୁଁ ଏଭଳି ଅନୁପ୍ରବେଶ ଉଦ୍ୟମଗୁଡ଼ିକୁ ସଫଳତାର ସହ ରୋକାଯାଇପାରୁଛି। ଏହି ସମୟରେ, ଉତ୍ତର କାଶ୍ମୀରର କୁପୱାଡ଼ା ଜିଲ୍ଲାରେ ଥିବା ନିୟନ୍ତ୍ରଣ ରେଖା (LoC) ନିକଟରେ ଚାଲିଥିବା ଏକ ଅଭିଯାନ ସମୟରେ ଶନିବାର ଦିନ ଦୁଇ ଜଣ ଆତଙ୍କବାଦୀ ନିହତ ହୋଇଥିବା ସୂଚନା ରହିଛି ।
ଆଧିକାରିକ ସୂତ୍ରରୁ ଜଣାପଡ଼ିଛି ଯେ, କେରାନ ସେକ୍ଟରର ଜୁମାଗୁଣ୍ଡ ଅଞ୍ଚଳରେ ସୈନିକମାନେ କିଛି ସନ୍ଦେହଜନକ କାର୍ଯ୍ୟକଳାପ ଦେଖିବାକୁ ପାଇଲେ, ଯାହା ପରେ ଏକ ଏନକାଉଣ୍ଟର ଆରମ୍ଭ ହୋଇଗଲା। ଜଣେ ବରିଷ୍ଠ ପ୍ରତିରକ୍ଷା ଅଧିକାରୀ କହିଛନ୍ତି, “କେରାନ ସେକ୍ଟରର ଜୁମାଗୁଣ୍ଡ ଅଞ୍ଚଳରେ, ନିୟନ୍ତ୍ରଣ ରେଖା (LoC) ନିକଟରେ ଭୋର ପ୍ରାୟ ୩:୩୦ ସମୟରେ ଏକ ଏନକାଉଣ୍ଟର ହୋଇଥିଲା। ଏଥିରେ ଦୁଇଜଣ ଆତଙ୍କବାଦୀ ନିହତ ହୋଇଛନ୍ତି। ବର୍ତ୍ତମାନ ସେଠାରେ ସର୍ଚ୍ଚ ଅପରେସନ୍ ଚାଲିଛି।”
ଶୀତଋତୁ ଆରମ୍ଭ ହେବା ପୂର୍ବରୁ ପାକିସ୍ତାନ ଜମ୍ମୁ ଓ କାଶ୍ମୀରରେ ଆତଙ୍କବାଦୀମାନଙ୍କୁ ଅନୁପ୍ରବେଶ କରାଇବା ପାଇଁ ଏକ ଯୋଜନା କରୁଥିବା ନେଇ ଆଶଙ୍କା ରହିଛି। ଗୁଇନ୍ଦା ସୂଚନାନୁଯାୟୀ, ପାକିସ୍ତାନ ଅଧିକୃତ କାଶ୍ମୀର (PoK) ରେ ଥିବା ବିଭିନ୍ନ ‘ଲଞ୍ଚପ୍ୟାଡ୍’ ରେ ପ୍ରାୟ ୫୦୦ ଆତଙ୍କବାଦୀ ଉପସ୍ଥିତ ଥିବା ଜଣାପଡ଼ିଛି। ଆଶଙ୍କା କରାଯାଉଛି ଯେ, ତୁଷାରପାତ ଯୋଗୁଁ ପାହାଡ଼ିଆ ରାସ୍ତାଗୁଡ଼ିକ ବନ୍ଦ ହେବା ପୂର୍ବରୁ ଏହି ଆତଙ୍କବାଦୀମାନଙ୍କୁ ଭାରତୀୟ ସୀମା ଭିତରକୁ ପଠାଇବା ପାଇଁ ଉଦ୍ୟମ କରାଯାଇପାରେ।
ଏହାକୁ ଦୃଷ୍ଟିରେ ରଖି ସୁରକ୍ଷା ସଂସ୍ଥାଗୁଡ଼ିକ ନିଜର ନଜରଦାରି ଓ ସତର୍କତା ବୃଦ୍ଧି କରିଛନ୍ତି। ଆନ୍ତର୍ଜାତୀୟ ସୀମାରେ ପ୍ରତିରକ୍ଷାର ପ୍ରଥମ ସ୍ତର ଭାବେ ବିବେଚିତ ହେଉଥିବା ‘ବର୍ଡର ସିକ୍ୟୁରିଟି ଫୋର୍ସ’ (BSF) କୁ ମଧ୍ୟ ଅନୁପ୍ରବେଶ ବିରୋଧୀ ଅଭିଯାନକୁ ଅଧିକ ଜୋରଦାର କରିବାକୁ ନିର୍ଦ୍ଦେଶ ଦିଆଯାଇଛି। ପାକିସ୍ତାନ ଅଧିକୃତ କାଶ୍ମୀର (PoK) ରେ ୫୦୦ ଆତଙ୍କବାଦୀ ଉପସ୍ଥିତ ଥିବା ନେଇ ଗୁଇନ୍ଦା ସୂଚନା ମିଳିବା ପରେ ସୁରକ୍ଷା ବାହିନୀକୁ ହାଇ ରଖାଯାଇଛି।