ନୂଆଦିଲ୍ଲୀ: ଆଜିକାଲି ଗାଁର ଛୋଟ ଚା’ ଦୋକାନଠାରୁ ଆରମ୍ଭ କରି ସହରର ବଡ଼ ବଡ଼ ସପିଂ ମଲ୍ ପର୍ଯ୍ୟନ୍ତ ସବୁଠି ୟୁପିଆଇ ମାଧ୍ୟମରେ ପେମେଣ୍ଟ କରିବା ଏକ ସାଧାରଣ କଥା ହୋଇଗଲାଣି । ତେବେ ନିକଟରେ ୨୦୦୦ ଟଙ୍କାରୁ ଅଧିକ ୟୁପିଆଇ କାରବାର ଉପରେ ଚାର୍ଜ ଲାଗିବା ନେଇ ଖବର ପ୍ରକାଶ ପାଇବା ପରେ ସାଧାରଣ ଗ୍ରାହକଙ୍କ ମଧ୍ୟରେ ବିଭିନ୍ନ ଦ୍ୱନ୍ଦ୍ୱ ସୃଷ୍ଟି ହୋଇଥିଲା । ଏହି ସନ୍ଦେହକୁ ଦୂର କରି କେନ୍ଦ୍ର ସରକାର ଏବଂ ସମ୍ପୃକ୍ତ କର୍ତ୍ତୃପକ୍ଷ ନୂଆ ନିୟମ ସମ୍ପର୍କରେ ସ୍ପଷ୍ଟୀକରଣ ଦେଇଛନ୍ତି। ସବୁଠାରୁ ବଡ଼ ଆଶ୍ୱସ୍ତିର କଥା ହେଉଛି, ସାଧାରଣ ଗ୍ରାହକଙ୍କୁ ୟୁପିଆଇ କାରବାର ପାଇଁ ନିଜ ପକେଟରୁ ଗୋଟିଏ ବି ଟଙ୍କା ଅତିରିକ୍ତ ଦେବାକୁ ପଡ଼ିବ ନାହିଁ ।
ନୂତନ ଏମଡିଆର୍ ଢାଞ୍ଚା ଅନୁଯାୟୀ, ଗୋଟିଏ ବ୍ୟାଙ୍କ ଖାତାରୁ ଅନ୍ୟ ଜଣେ ବ୍ୟକ୍ତିଙ୍କ ଖାତାକୁ ଟଙ୍କା ପଠାଇବା ସମ୍ପୂର୍ଣ୍ଣ ମାଗଣା ରହିବ। ଆପଣ ସାଙ୍ଗସାଥୀ କିମ୍ବା ପରିବାର ଲୋକଙ୍କୁ ଯେତେ ଟଙ୍କା ପଠାଇଲେ ମଧ୍ୟ ସେଥିପାଇଁ କୌଣସି ଚାର୍ଜ କଟିବ ନାହିଁ। ସେହିପରି ଦୋକାନୀ ବା ବ୍ୟବସାୟୀଙ୍କୁ ୨୦୦୦ ଟଙ୍କା ପର୍ଯ୍ୟନ୍ତ କରାଯାଉଥିବା ପେମେଣ୍ଟ ମଧ୍ୟ ସମ୍ପୂର୍ଣ୍ଣ ଫ୍ରି ରହିବ। ସରକାରୀ ତଥ୍ୟ ଅନୁସାରେ ଦେଶର ମୋଟ ୟୁପିଆଇ କାରବାର ମଧ୍ୟରୁ ପ୍ରାୟ ୯୬ ପ୍ରତିଶତ କାରବାର ୨୦୦୦ ଟଙ୍କା ଭିତରେ ହିଁ ହୋଇଥାଏ, ତେଣୁ ଛୋଟ ବ୍ୟବସାୟୀ ଓ ଗ୍ରାହକଙ୍କ ଉପରେ ଏହାର କୌଣସି ନକାରାତ୍ମକ ପ୍ରଭାବ ପଡ଼ିବ ନାହିଁ ।
ତେବେ ୨୦୦୦ ଟଙ୍କାରୁ ଅଧିକ ମୂଲ୍ୟର ପେମେଣ୍ଟ ଉପରେ କିଛି ନୂଆ ସର୍ତ୍ତ ଲାଗୁ କରାଯାଇଛି । ଯଦି କୌଣସି ଗ୍ରାହକ ଦୋକାନରେ କିମ୍ବା ଅନଲାଇନ୍ ସପିଂରେ ୨୦୦୦ ଟଙ୍କାରୁ ଅଧିକ ବିଲ୍ ୟୁପିଆଇ ମାଧ୍ୟମରେ ଦିଅନ୍ତି, ତେବେ ଉକ୍ତ କାରବାର ଉପରେ ସାଧାରଣତଃ ୦.୪ ପ୍ରତିଶତ (ସର୍ବାଧିକ ୩୦୦ ଟଙ୍କା ପର୍ଯ୍ୟନ୍ତ) ଏମଡିଆର୍ ଚାର୍ଜ ଲାଗିବ । କିନ୍ତୁ ଏହି ଶୁଳ୍କ କେବଳ ମର୍ଚ୍ଚାଣ୍ଟ ବା ଦୋକାନ ମାଲିକଙ୍କୁ ହିଁ ବହନ କରିବାକୁ ପଡ଼ିବ। ଉଦାହରଣ ସ୍ୱରୂପ, ଯଦି ଆପଣ କୌଣସି ରେଷ୍ଟୁରାଣ୍ଟରେ ୫୦୦୦ ଟଙ୍କାର ବିଲ୍ ଦେଉଛନ୍ତି, ଆପଣ କେବଳ ୫୦୦୦ ଟଙ୍କା ହିଁ ପୈଠ କରିବେ । କିନ୍ତୁ ଦୋକାନୀଙ୍କ ଖାତାକୁ ଟଙ୍କା ଯିବା ବେଳେ ସେଥିରୁ ନିର୍ଦ୍ଧାରିତ ଚାର୍ଜ କାଟି ନିଆଯିବ। ବ୍ୟବସାୟୀମାନେ ଯେପରି ଏହି ଦେୟର ବୋଝ ଗ୍ରାହକଙ୍କ ଉପରେ ନପକାନ୍ତି, ସେଥିପ୍ରତି ଦୃଷ୍ଟି ଦେବାକୁ ବ୍ୟାଙ୍କଗୁଡ଼ିକୁ ନିର୍ଦ୍ଦେଶ ଦିଆଯାଇଛି ।
ଅନ୍ୟପକ୍ଷରେ ପେଟ୍ରୋଲ ପମ୍ପ୍, ଟ୍ରେନ ଟିକେଟ୍, ଟେଲିକମ୍ ଏବଂ କୃଷି ସାମଗ୍ରୀ ଭଳି ଜରୁରୀ ସେବା କ୍ଷେତ୍ରରେ ୨୦୦୦ ଟଙ୍କାରୁ ଊର୍ଦ୍ଧ୍ୱ ପେମେଣ୍ଟ ଉପରେ ବ୍ୟବସାୟୀଙ୍କୁ ସ୍ଥିର ମୂଲ୍ୟ ଭାବେ ମାତ୍ର ୫ ଟଙ୍କା ଦେବାକୁ ପଡ଼ିବ । ସେହିପରି ମ୍ୟୁଚୁଆଲ୍ ଫଣ୍ଡ ଏବଂ ଶେୟାର ବଜାର କାରବାର ପାଇଁ ଏହି ଚାର୍ଜ ମାତ୍ର ୦.୦୨ ପ୍ରତିଶତ ରଖାଯାଇଛି ।
ଆସନ୍ତା ଅକ୍ଟୋବର ୧୫, ୨୦୨୬ ତାରିଖରୁ ଏହି ନୂଆ ବ୍ୟବସ୍ଥା ଲାଗୁ ହେବାକୁ ଯାଉଛି। ଏହି ଚାର୍ଜରୁ ଆଦାୟ ହେଉଥିବା ଅର୍ଥ ୟୁପିଆଇ ଆପ୍ କମ୍ପାନୀ, ବ୍ୟାଙ୍କ ଏବଂ ପେମେଣ୍ଟ ସର୍ଭିସ୍ ପ୍ରୋଭାଇଡରଙ୍କ ମଧ୍ୟରେ ବଣ୍ଟାଯିବ, ଯାହାଦ୍ୱାରା ଦେଶର ଡିଜିଟାଲ୍ ଏବଂ ଗ୍ରାମୀଣ ଅର୍ଥନୈତିକ ଭିତ୍ତିଭୂମିକୁ ଅଧିକ ସୁରକ୍ଷିତ ତଥା ସୁଦୃଢ଼ କରାଯାଇପାରିବ ବୋଲି ସରକାର ସ୍ପଷ୍ଟ କରିଛନ୍ତି।
