ନୂଆଦିଲ୍ଲୀ: ସଂସଦର ବଜେଟ୍ ଅଧିବେଶନ ବେଳେ ଶ୍ୱେତ ପତ୍ରକୁ ନେଇ ବେଶ୍ ଚର୍ଚ୍ଚା ହେଉଛି। ଯାହାକୁ ନେଇ ଶାସକ ଦଳ ବାଃ ବାଃ ନେବା ପାଇଁ ବେଶ୍ ଉତ୍ସୁକ। ତେବେ ଏହି ଶ୍ୱେତ ପତ୍ର କଣ? କଣ ଏହାର ବିଶେଷତ୍ଵ? ଏହାରି ସମ୍ବନ୍ଧ ସଂସଦ ଅଧିବେଶନର କାର୍ଯ୍ୟକାଳ ବୃଦ୍ଧି ପାଇବା ସହ ଜଡ଼ିତ କି? ମିଳିଥିଲା ସୂଚନା ଅନୁସାରେ ସରକାର ୨୦୧୪ ପୂର୍ବରୁ ଏବଂ ପରେ ଭାରତୀୟ ଅର୍ଥବ୍ୟବସ୍ଥାର ସ୍ଥିତିକୁ ତୁଳନା କରି ‘ଶ୍ୱେତ ପତ୍ର’ ଜାରି କରିବାକୁ ଯୋଜନା କରୁଛନ୍ତି । ବଜେଟ ଅଧିବେଶନ ୩୧ ଜାନୁଆରୀରୁ ଆରମ୍ଭ ହୋଇଥିବା ବେଳେ ୯ ଫେବୃଆରୀରେ ଶେଷ ହୋଇଥାଆନ୍ତା । କିନ୍ତୁ ବର୍ତ୍ତମାନ ଏହାକୁ ଆଉ ଗୋଟିଏ ଦିନ ବଢାଯାଇଛି । ବର୍ଦ୍ଧିତ ଦିନରେ ଏହାକୁ ଗୃହରେ ଉପସ୍ଥାପନ କରାଯିବ।
ମୋଦୀ ସରକାର ଏହି ଶ୍ୱେତ ପତ୍ର ମାଧ୍ୟମରେ ନିଜର ଏବଂ ୟୁପିଏ ସରକାରଙ୍କ ମାଧ୍ୟମରେ ଦେଶର ଆର୍ଥିକ ସ୍ଥିତିର ତୁଳନାତ୍ମକ ଚିତ୍ର ପେଶ୍ କରିବେ। ଯାହା ୟୁପିଏ ଦଶନ୍ଧି ଏବଂ ଏନଡିଏ ଦଶନ୍ଧିକୁ ଅନ୍ତର୍ଭୁକ୍ତ କରିବ। ସେ ସମୟର ଅର୍ଥନୈତିକ ସ୍ଥିତି ଏବଂ ବର୍ତ୍ତମାନର ଅର୍ଥନୈତିକ ସ୍ଥିତି ମଧ୍ୟରେ କଣ ଫରକ ଅଛି ତାକୁ ସଭିଙ୍କ ଆଗରେ ରଖିବେ। ପୂର୍ବରୁ ଅର୍ଥମନ୍ତ୍ରୀ ନିର୍ମଳା ସୀତାରମଣ ମଧ୍ୟ ନିଜ ଅନ୍ତରୀଣ ବଜେଟର ଭାଷଣ ଦ୍ୱାରା ଶ୍ୱେତ ପତ୍ରର ଘୋଷଣା କରିଛନ୍ତି । ୟୁପିଏ ଶାସନର ଆର୍ଥିକ ଅବ୍ୟବସ୍ଥା ଏବଂ ଏନଡିଏ ଶାସନର ଆର୍ଥିକ ଚତୁରତା ଦେଖାଇବାକୁ ଏକ ତୁଳନାତ୍ମକ ବିଶ୍ଳେଷଣ କରାଯିବ । ବର୍ତ୍ତମାନ ଅର୍ଥମନ୍ତ୍ରୀ ନିର୍ମଳା ସୀତାରମଣ କଂଗ୍ରେସ ନେତୃତ୍ୱାଧୀନ ୟୁପିଏ କ୍ଷମତା ଛାଡିବା ପରେ ଦେଶର ଦୁର୍ବଳ ଆର୍ଥିକ ସ୍ଥିତିକୁ ଉଜ୍ୱଳ କରିବା ପାଇଁ ଉଭୟ ଘରେ ଏକ ଶ୍ୱେତ ପତ୍ର ଉପସ୍ଥାପନ କରିବେ ଏବଂ ବର୍ତ୍ତମାନର ସରକାର କିପରି ଭାରତର ଦୁର୍ବଳ ଅର୍ଥନୀତିକୁ ଫେରାଇ ଆଣିଛନ୍ତି ତାହା ଜଣାଇବେ ।
ଏପ୍ରିଲ-ମେ ମାସରେ ହେବାକୁ ଥିବା ଲୋକସଭା ନିର୍ବାଚନ ପାଇଁ ସାରା ଦେଶ ପ୍ରସ୍ତୁତ ହୋଇଛି । ଏପରି ସମୟରେ ଗୃହରେ ଉପସ୍ଥାପିତ ହେବାକୁ ଥିବା ଏହି ଶ୍ବେତ ପତ୍ର ଦ୍ୱାରା ବିଜେପି ବିରୋଧି ଦଳକୁ ନାଲିଆଖି ଦେଖାଇବା ପାଇଁ ଏକ ମାଷ୍ଟର ପ୍ଲାନ କରିଛି।
ସାଧାରଣତଃ କହିବାକୁ ଗଲେ ଶ୍ୱେତ ପତ୍ର ଏକ ଦଲିଲ ଯାହା କିଛି ନିର୍ଦ୍ଦିଷ୍ଟ ସୂଚନା ଥିବା ଏକ ରେକର୍ଡ ବହି। ଯାହା କୌଣସି କମ୍ପାନୀ ବା ଅଣ-ଲାଭକାରୀ ସଂସ୍ଥା ଦ୍ୱାରା କୌଣସି ସମାଧାନ, ଉତ୍ପାଦ ବା ସେବାର ବିଶେଷତା ଗୁଡିକୁ ପ୍ରୋତ୍ସାହିତ କରିବା ପାଇଁ ଜାରି କରାଯାଏ । ବିଶେଷ କରି ସରକାରୀ ନୀତି ଓ ଆଇନ ତିଆରି କରିବା ପାଇଁ ତଥା ଜନତାଙ୍କ ରାୟ ଜାଣିବା ପାଇଁ ଏହାକୁ ବ୍ଯବହାର କରାଯାଇଥାଏ।