ବକୁ : ପ୍ରାୟ ୯୬ ପ୍ରତିଶତ ଜନସଂଖ୍ୟା ମୁସଲମାନ ସମ୍ପ୍ରଦାୟର ହୋଇଥିଲେ ମଧ୍ୟ ମୁସଲମାନ-ବହୁଳ ଦେଶ ଅଜରବଇଜାନରେ ସ୍କୁଲ ଓ ଶିକ୍ଷାନୁଷ୍ଠାନଗୁଡ଼ିକରେ ହିଜାବ ଏବଂ ଧାର୍ମିକ ପୋଷାକ ଉପରେ କଟକଣା ଲଗାଯାଇଛି। ସରକାରଙ୍କ ଏହି ନୂତନ ନିୟମକୁ ନେଇ ବର୍ତ୍ତମାନ ବିଶ୍ୱବ୍ୟାପୀ ଚର୍ଚ୍ଚା ଏବଂ ପ୍ରତିବାଦ ଦେଖାଦେଇଛି।
ଅଜରବଇଜାନ ସରକାର ଏହି କଟକଣା ପଛର ମୁଖ୍ୟ କାରଣ ଭାବେ ଦେଶର ସମ୍ବିଧାନ ଏବଂ ଧର୍ମନିରପେକ୍ଷ ଶିକ୍ଷା ବ୍ୟବସ୍ଥାକୁ ଦର୍ଶାଇଛନ୍ତି। ଦେଶର ସମ୍ବିଧାନର ଧାରା ୧୮ ଅନୁଯାୟୀ, ରାଷ୍ଟ୍ର ଏବଂ ଧର୍ମ ପରସ୍ପରଠାରୁ ଅଲଗା ଏବଂ ସରକାରୀ ଶିକ୍ଷା ବ୍ୟବସ୍ଥା ସମ୍ପୂର୍ଣ୍ଣ ଧର୍ମନିରପେକ୍ଷ ହେବା ଆବଶ୍ୟକ। ସ୍କୁଲଗୁଡ଼ିକରେ ଏକ ସମାନ ୟୁନିଫର୍ମ ଏବଂ ପେଷାଗତ ଶୃଙ୍ଖଳା ବଜାୟ ରଖିବା ପାଇଁ ସରକାର ନିକଟରେ ସ୍କୁଲ ପୋଷାକ ନିୟମରେ ସଂଶୋଧନ ଆଣିଛନ୍ତି। ଏହାମାଧ୍ୟମରେ ଛାତ୍ରଛାତ୍ରୀଙ୍କ ସହିତ ଶିକ୍ଷକମାନଙ୍କ ପାଇଁ ମଧ୍ୟ ଏକକ ନିୟମ ଓ ପୋଷାକ ମାନଦଣ୍ଡ ଧାର୍ଯ୍ୟ କରାଯାଇଛି।
ଯଦିଓ ସମ୍ବିଧାନର ଅନ୍ୟ ଏକ ଧାରା ନାଗରିକମାନଙ୍କୁ ଧର୍ମ ପାଳନ କରିବାର ଅଧିକାର ଦେଇଥାଏ, ତଥାପି ସରକାର ଏହି କଟକଣାକୁ କୌଣସି ଧର୍ମ ବିରୋଧୀ ପଦକ୍ଷେପ ଭାବେ ନୁହେଁ, ବରଂ ଶିକ୍ଷାନୁଷ୍ଠାନଗୁଡ଼ିକରେ ସମାନତା ଏବଂ ଧର୍ମନିରପେକ୍ଷ ନୀତି କାର୍ଯ୍ୟକାରୀ କରିବାର ଏକ ନୀତିଗତ ନିଷ୍ପତ୍ତି ବୋଲି କହିଛନ୍ତି। ତଥାପି, ଏହି ନିୟମ ପରେ କିଛି ସ୍କୁଲରେ ଛାତ୍ରଛାତ୍ରୀମାନେ ପ୍ରବେଶ କରିବାରେ ବାଧାପ୍ରାପ୍ତ ହୋଇଛନ୍ତି ଏବଂ ଏହାକୁ ନେଇ ସାମାଜିକ ସ୍ତରରେ ମଧ୍ୟ ବ୍ୟାପକ ବିବାଦ ଦେଖିବାକୁ ମିଳିଛି।ଅଜରବଇଜାନ ସରକାରଙ୍କ ଏହି ପଦକ୍ଷେପ ପଛରେ ଅନ୍ୟତମ ବଡ଼ କାରଣ ହେଉଛି ଦେଶରେ ବଢୁଥିବା ଆଧୁନିକୀକରଣ ଏବଂ ଧାର୍ମିକ ଚିନ୍ତାଧାରାକୁ ନିୟନ୍ତ୍ରଣ କରିବା। ସୋଭିଏତ୍ ସମୟରୁ ଏହି ଦେଶ ଏକ ଧର୍ମନିରପେକ୍ଷ ରାଷ୍ଟ୍ର ଭାବେ ପରିଚିତ ଥିବାରୁ, ସରକାର ସ୍କୁଲ ଓ ଶିକ୍ଷାନୁଷ୍ଠାନଗୁଡ଼ିକରେ କୌଣସି ପ୍ରକାରର ଧାର୍ମିକ ପରିଚୟ କିମ୍ବା ପାର୍ଥକ୍ୟକୁ ପ୍ରୋତ୍ସାହିତ କରିବାକୁ ଚାହୁଁନାହାଁନ୍ତି। ଏହାଦ୍ୱାରା ଛାତ୍ରଛାତ୍ରୀଙ୍କ ମଧ୍ୟରେ ସମାନତା ରକ୍ଷା ହେବା ସହ ଶିକ୍ଷାଦାନ ପରିବେଶ ଅଧିକ ଶୃଙ୍ଖଳିତ ଏବଂ ନିରପେକ୍ଷ ରହିବ ବୋଲି କର୍ତ୍ତୃପକ୍ଷ ମତ ଦେଇଛନ୍ତି।