ଭଦ୍ରକ : ଭଦ୍ରକ ଜିଲ୍ଲା ତିହିଡି ବ୍ଲକ୍ ପୀରହାଟ ଥାନା ନଛିବିନ୍ଧା ଗ୍ରାମରେ ଅଭାବନୀୟ ଘଟଣା । ଘର ଭିତରୁ ଝୁଲନ୍ତା ଅବସ୍ଥାରେ ଉଦ୍ଧାର ହୋଇଛି ମହିଳାଙ୍କ ମୃତଦେହ । ମୃତା ମହିଳା ଶଶଧର ରାଉଳଙ୍କ ସ୍ତ୍ରୀ କବିତା ରାଉଳ ବୋଲି ଜଣାଯାଇଛି । ଶୋଇବା ଘର ଖଟ ଉପରେ ମୃତଦେହ ପଡ଼ିଥିବା ବେଳେ, ସିଲିଂ ଫ୍ୟାନରେ ବନ୍ଧା ହୋଇଥିବା ଓଢଣି ଶବ ଦେହରେ ପଡ଼ିଥିବା ଦେଖିବାକୁ ମିଳିଛି ।
କବିତା ୨୦୦୭ ମସିହାରେ ନଛିବିନ୍ଧା ଗ୍ରାମର ଶଶଧର ରାଉଳଙ୍କୁ ବିବାହ କରିଥିଲେ । ତାଙ୍କର ଗୋଟିଏ ଝିଅ ଏବଂ ଗୋଟିଏ ପୁଅ ଅଛି । କବିତାଙ୍କ ସ୍ବାମୀ ସିକ୍ୟୁରିଟି ଗାର୍ଡ ଭାବେ କାର୍ଯ୍ୟ କରୁଛନ୍ତି । ତେବେ ଏହା ଆତ୍ମହତ୍ୟା ନୁହେଁ ବରଂ ତାଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ଅଭିଯୋଗ କରିଛନ୍ତି କବିତାଙ୍କ ବାପା । ମୃତ୍ୟୁ ସମୟରେ ସେହି ଘରେ ଉପସ୍ଥିତ ଥିବା ଉମେଶ ରାଉଳ ଏହାକୁ ଆତ୍ମହତ୍ୟାର ରୁପ ଦେଇଥିବା ବାପ ଘର ଲୋକେ ଅଭିଯୋଗ କରିଛନ୍ତି । ପୋଲିସ ମୃତଦେହ ଜବତ କରିଥିବା ବେଳେ, ସାଇଣ୍ଟିଫିକ ଟିମ୍ ଛାନବିନ୍ କରିଛି । ମୃତା କବିତାଙ୍କ ବାପାଙ୍କ ଏତଲା ଅନୁସାରେ ପୋଲିସ ହତ୍ୟା ମାମଲା ରୁଜୁ କରି ଉମେଶ ରାଉଳଙ୍କୁ ଅଟକ ରଖି ପଚରାଉଚରା କରୁଛି ।
Comments are closed.