ବାଲେଶ୍ୱର: ଏକ ଛୋଟ ଛୁଆ ଡିଜେଲକୁ ପାଣି ଭାବି ପିଇଦେବାରୁ ମୃତ୍ୟୁ ଘଟିଛି। ବାଲେଶ୍ୱର ଜିଲ୍ଲାରେ ଏଭଳି ଏକ ଅଭାବନୀୟ ଘଟଣା ଘଟିଛି। ଦୁଃଖର କଥା ହେଲା ପିଲାଟିର ବୟସ ଦେଢ ବର୍ଷ । ଆଉ ଏହି ଡିଜେଲ ବୋତଲଟି ତାର ବାପା ରଖିଥିଲେ। ପିଲାଟିକୁ ବଞ୍ଚାଇବା ପାଇଁ ବହୁ ଚେଷ୍ଟା କରାଯାଇଥିଲା, ସ୍ୱାସ୍ଥ୍ୟବସ୍ଥା ବିଗିଡି ଯାଇଥିବାରୁ ମୃତ୍ୟୁ ଘଟିଥିଲା।
ଏହି ଘଟଣା ସମ୍ପର୍କରେ ପୋଲିସ କହିଛି ଯେ ବାପା ମଙ୍ଗଳବାର ଦିନ ତାଙ୍କ କାରକୁ ମରାମତି କରୁଥିଲେ। ଏବଂ ଡିଜେଲକୁ ନିକଟସ୍ଥ ଏକ ବୋତଲରେ ରଖିଥିଲେ। ଏହି ସମୟରେ ଘରେ ଖେଳୁଥିବା ତାଙ୍କ ପୁଅ ତାଙ୍କ ବାପାଙ୍କ ନିକଟକୁ ଆସି ଭୁଲରେ ବୋତଲରେ ରଖାଯାଇଥିବା ଡିଜେଲକୁ ପାଣି ବୋଲି ଭାବି ପିଇଦେଇଥିଲା।
ଡିଜେଲ ପିଇବାର କିଛି ମିନିଟ୍ ପରେ ଦେଢ଼ ବର୍ଷର ଶିଶୁ ବାନ୍ତି କରିବା ଆରମ୍ଭ କରିଥିଲା ଏବଂ ନିଃଶ୍ୱାସ ନେବାରେ ଅସୁବିଧା ଅନୁଭବ କରିଥିଲା। ଏହାପରେ ତୁରନ୍ତ ତାକୁ ଚିକିତ୍ସା ପାଇଁ ନିକଟସ୍ଥ ଡାକ୍ତରଖାନାକୁ ନିଆଯାଇଥିଲା। ତେବେ ଅବସ୍ଥା ବିଗିଡି ଯାଇଥିଲା ଏବଂ ତୁରନ୍ତ ଭୁବନେଶ୍ୱରକୁ ସ୍ଥାନାନ୍ତର କରାଯାଇଥିଲା। ଏହାପରେ ତାଙ୍କୁ ଭୁବନେଶ୍ୱର ସ୍ଥିତ ଏମ୍ସକୁ ନିଆଯାଇଥିଲା।
ହେଲେ ଏମ୍ସର ହସ୍ପିଟାଲରେ ଛୋଟ ଛୁଆଟିର ସ୍ବାସ୍ଥ୍ୟବସ୍ଥାରେ କୌଣସି ଉନ୍ନତି ଆସିନଥିଲା। ତେଣୁ ଅନ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା, କିନ୍ତୁ ଏହି ସମୟରେ ଶରୀରରେ ଜଟିଳତା ହେତୁ ଶିଶୁଟିର ମୃତ୍ୟୁ ଘଟିଥିଲା।
ଡାକ୍ତର କହିଛନ୍ତି, ଏହା ଏକ ଦୁଃଖଦ ଘଟଣା। ପିଲାଟିର ବାପା ହଠାତ୍ ଏକ ଡିଜେଲ ବୋତଲ ରଖିଥିଲେ ଯାହାକୁ ପାଣି ଭାବି ପିଲାଟି ପିଇ ଦେଇଥିଲା। ଏହାପରେ ସେ ମୃତ୍ୟୁ ବରଣ କରିଥିଲା।
Comments are closed.