ଭୁବନେଶ୍ୱର: ପର୍ଯ୍ୟଟନର ହଟସ୍ପଟ ବା କେନ୍ଦ୍ର ହେବ ଓଡ଼ିଶା। ସାରା ବିଶ୍ୱରୁ କିଭଳି ଲୋକମାନେ ପର୍ଯ୍ୟଟନ ପାଇଁ ଓଡ଼ିଶା ଆସିବେ ଏଥିପାଇଁ ରାଜ୍ୟ ସରକାର ପ୍ରସ୍ତୁତି କରୁଛନ୍ତି। ଶୁକ୍ରବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ସୂଚନା ଦେଇଛନ୍ତି। ଏପରି କରି ରାଜ୍ୟ ସରକାର ପୁଞ୍ଜି ନିବେଶ ଉପରେ ଗୁରୁତ୍ୱ ଦେବା ସହିତ ଜୀବିକା ଏବଂ ରୋଜଗାର ଉପରେ ଗୁରୁତ୍ୱ ଦେଉଛନ୍ତି ବୋଲି ମୁଖ୍ୟମନ୍ତ୍ରୀ କହିଛନ୍ତି।
ଓଡ଼ିଶାକୁ ପର୍ଯ୍ୟଟକଙ୍କ ବିଶ୍ୱସ୍ତରୀୟ ହଟସ୍ପଟ ଭାବେ ବିକଶିତ କରିବା ପାଇଁ ରାଜ୍ୟ ସରକାର ନିରନ୍ତର ଉଦ୍ୟମ ଜାରି ରଖିଛନ୍ତି। ଏହାଦ୍ୱାରା ଜୀବିକା ଓ ରୋଜଗାରର ସୁଯୋଗ ସୃଷ୍ଟି କରିହେବ। ଏବଂ ପୁଞ୍ଜିନିବେଶକାରୀଙ୍କୁ ନିବେଶ ପାଇଁ ରାଜ୍ୟକୁ ଆକୃଷ୍ଟ କରିହେବ। ଯାଜପୁରରେ ଆୟୋଜିତ ଅନ୍ତର୍ଜାତୀୟ କ୍ରାଫ୍ଟ ସମିଟକୁ ଭର୍ଚୁଆଲ ପ୍ଲାଟଫର୍ମ ଜରିଆରେ ଉଦଘାଟନ କରିବା ଅବସରରେ ନବୀନ ପଟ୍ଟନାୟକ ଏହା କହିଛନ୍ତି।
ପର୍ଯ୍ୟଟନ, ହସ୍ତତନ୍ତ ଏବଂ ହସ୍ତଶିଳ୍ପ କ୍ଷେତ୍ରର ସାମଗ୍ରିକ ବିକାଶ ପାଇଁ ବ୍ୟବସ୍ଥା ବିକଶିତ ଚାଲିଛି। ରାଜ୍ୟ ପର୍ଯ୍ୟଟନ ନୀତି, ହସ୍ତଶିଳ୍ପ ନୀତି, ପୋଷାକ ଓ ବୈଷୟିକ ବୟନଶିଳ୍ପ ନୀତି ଭଳି ବିଭିନ୍ନ ନୀତି ପ୍ରଣୟନ କରାଯାଇଛି ବୋଲି ମୁଖ୍ୟମନ୍ତ୍ରୀ ଏହି ଅବସରରେ କହିଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ ରାଜ୍ୟ ସରକାର ବିଭିନ୍ନ ସ୍ଥାନରେ ଆର୍ଟ ଗ୍ୟାଲେରୀ ଖୋଲୁଛନ୍ତି, ଐତିହ୍ୟ ପଦଯାତ୍ରାର ଆୟୋଜନ କରୁଛନ୍ତି ଏବଂ ପର୍ଯ୍ୟଟନ ଏବଂ ସଂସ୍କୃତିକୁ ପ୍ରୋତ୍ସାହିତ କରିବା ପାଇଁ ଅନେକ ପଦକ୍ଷେପ ନେଉଛନ୍ତି।
ଓଡ଼ିଶା ପାଇଁ ଏହା ଏକ ଐତିହାସିକ ଅବସର ବୋଲି ଉଲ୍ଲେଖ କରି ନବବନ ପଟ୍ଟନାୟକ କହିଲେ, ଯାଜପୁର ଓଡ଼ିଶାର ପ୍ରାଚୀନ ରାଜଧାନୀ ଥିଲା। ଧାର୍ମିକ ପର୍ଯ୍ୟଟନ, ସହରାଞ୍ଚଳ ପର୍ଯ୍ୟଟନ ଏବଂ ବୌଦ୍ଧ ପର୍ଯ୍ୟଟନର ପ୍ରଚଳିତ ସମ୍ପତ୍ତି ସହିତ ଏହା ଏକ ପ୍ରମୁଖ ପର୍ଯ୍ୟଟନ କେନ୍ଦ୍ର ହେବାର ସମ୍ଭାବନା ରହିଛି। ଯାଜପୁରର ସାଂସ୍କୃତିକ ଐତିହ୍ୟ ଏଥିରେ ପ୍ରତିଫଳିତ ହୋଇଛି ବୋଲି ସେ କହିଥିଲେ।
ଏହି ଅବସରରେ ମୁଖ୍ୟମନ୍ତ୍ରୀ କହିଥିଲେ ଯେ, ଓଡ଼ିଶା ହେଉଛି କଳା ଓ ହସ୍ତଶିଳ୍ପର ଏକ ଗୌରବମୟ ଭୂମି। ଏହାର ସଭ୍ୟତା ଯାତ୍ରା ହେଉଛି କଳାତ୍ମକ ସଂସ୍କୃତିର ଯାତ୍ରା।
Comments are closed.