ରିଲିଜ ହୋଇଛି ରଣବିର କପୁରଙ୍କ ବହୁ ପ୍ରତୀକ୍ଷିତ ଫିଲ୍ମ ‘ଆନିମଲ୍’, ସକାଳୁ ସକାଳୁ ଥିଏଟର୍ ସାମ୍ନାରେ ସିନେପ୍ରେମୀଙ୍କ ଭିଡ

ମୁମ୍ବାଇ: ରିଲିଜ ହୋଇଛି ରଣବିର କପୁରଙ୍କ ବହୁ ପ୍ରତୀକ୍ଷିତ ଫିଲ୍ମ ‘ଆନିମଲ୍’ । ସେଥିପାଇଁ ସମସ୍ତ ଥିଏଟରର ସାମ୍ନାରେ ସିନେପ୍ରେମୀଙ୍କ ଭିଡ ଦେଖିବାକୁ ମିଳିଛି । ଅନ୍ୟପଟେ ଆସନ୍ତା କାଲି ମୁକ୍ତିଲାଭ କରିବ ବିକି କୌଶଲଙ୍କ ଅଭିନୀତ ‘ସାମ୍ ବାହାଦୂର’ । ଯୋଉଥିପାଇଁ ସିନେପ୍ରମୀଙ୍କ ମଧ୍ୟରେ ଉତ୍ସାହ ଦ୍ଵିଗୁଣିତ ହୋଇଛି । ସନ୍ଦୀପ ରେଡ୍ଡୀ ଭଙ୍ଗାଙ୍କ ନିର୍ଦ୍ଦେଶନାରେ ନିର୍ମିତ ‘ଆନିମଲ୍’ ଓ ମେଘନା ଗୁଲଜାରଙ୍କ ନିର୍ଦ୍ଦେଶିତ ‘ସାମ୍ ବାହାଦୂର’ ମଧ୍ୟରେ କଡାକଡି ଟକ୍କର ହେବ ।

୫ଟି ଭାଷାରେ ମୁକ୍ତିଲାଭ କରିଛି ଫିଲ୍ମ ‘ଆନିମଲ୍’ । ହିନ୍ଦୀ, ତାମିଲ, ତେଲୁଗୁ, କନ୍ନଡ ଏବଂ ମାଲାୟାଲମ୍ ଭାଷାରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ରଟିରେ ରଣବୀର କପୁରଙ୍କ ବ୍ୟତୀତ ରଶ୍ମିକା ମନ୍ଦନା, ଅନିଲ କପୁର, ବବି ଦେଓଲ ଏବଂ ଶକ୍ତି କପୁର, ସୁରେଶ ଓବରୋଏଙ୍କୁ ଦେଖିବାକୁ ମିଳିବ । ରଶ୍ମିକା ଏବଂ ରଣବୀର ଏହି ଫିଲ୍ମ ଜରିଆରେ ପ୍ରଥମ ଥର ପାଇଁ ସ୍କ୍ରିନ ସେୟାର କରିଛନ୍ତି । ସେପଟେ ଫିଲ୍ମକୁ ନେଇ ପତ୍ନୀ ତଥା ଅଭିନେତ୍ରୀ ଆଲିଆ ଭଟ୍ଟ ପ୍ରଥମ ରିଭ୍ୟୁ ଦେଇଛନ୍ତି । ରଣବୀରଙ୍କ ଫିଲ୍ମକୁ ସମର୍ଥନ କରିବା ସହ ଫିଲ୍ମର ଖୁବ୍ ପ୍ରଂଶସା କରିଛନ୍ତି ଆଲିଆ ।

‘ଆନିମଲ୍’ର ଚମତ୍କାର ଟ୍ରେଲର ରିଲିଜ ହେବା ପରଠାରୁ ଫିଲ୍ମକୁ ନେଇ ଦର୍ଶକଙ୍କ ମଧ୍ୟରେ ପ୍ରବଳ ଉତ୍ସାହ ଲାଗିରହିଥିଲା । ଫାଷ୍ଟ ଡେ ଫାଷ୍ଟ ସୋ ପାଇଁ ବମ୍ପର ଆଡଭାନ୍ସ ବୁକିଂ ମଧ୍ୟ କରାଯାଇଥିଲା । ଚଳଚ୍ଚିତ୍ରଟି ରିଲିଜ ହେବାର ୬ଦିନ ପୂର୍ବରୁ ଆରମ୍ଭ ହୋଇଥିଲା ଆଡଭାନ୍ସ ବୁକିଂ । ଫିଲ୍ମଟି ରିଲିଜ୍ ପୂର୍ବରୁ ୨୦ କୋଟିରୁ ଅଧିକ ଟଙ୍କା ରୋଜଗାର କରିସାରିଲାଣି । ଆଡଭାନ୍ସ ବୁକିଂକୁ ମିଶାଇ ଆକଳନ କରାଗଲେ, ଫାଷ୍ଟ ଡେ ଫାଷ୍ଟ ସୋରେ ବକ୍ସ ଅଫିସରେ ରେକର୍ଡ ଭାଙ୍ଗିବା ନେଇ ଆଶା କରାଯାଉଛି |