ଲକ୍ଷ୍ନୌ: ଅଯୋଧ୍ୟାରେ ରାମ ମନ୍ଦିର ନିର୍ମାଣ ପରେ ଏବେ କାଶୀରେ ଜ୍ଞାନବ୍ୟାପି ଏବଂ ମଥୁରାରେ କୃଷ୍ଣଙ୍କ ଜନ୍ମସ୍ଥାନରେ ମନ୍ଦିର ନିର୍ମାଣକୁ ନେଇ ଚର୍ଚ୍ଚା ଜୋର୍ ଧରିଛି । କୋର୍ଟ ଜ୍ଞାନବ୍ୟାପିକୁ ଏକ ମନ୍ଦିର ଭାବରେ ଗ୍ରହଣ କରି ସେଠାରେ ହିନ୍ଦୁମାନଙ୍କୁ ପୂଜା କରିବାକୁ ନିର୍ଦ୍ଦେଶ ଦେଇଛନ୍ତି । ଏହା ପରେ ଦେଶର ବିଭିନ୍ନ ହିନ୍ଦୁ ଧାର୍ମିକ ସ୍ଥାନରେ ନିର୍ମିତ ମସଜିଦଗୁଡ଼ିକୁ ହଟାଇବା ଦାବି ଗୋଟିଏ ପରେ ଗୋଟିଏ ବୃଦ୍ଧି ପାଇବାରେ ଲାଗିଛି। ଏହାରିଭିତରେ ପ୍ରୟାଗରାଜର ଶୃଙ୍ଗୱେରପୁରର ନିଶାଦରାଜ ଗୁହାର ଦୁର୍ଗରେ ନିର୍ମିତ ଏକ ମସଜିଦ ହଟାଇବାକୁ ଦାବି କରାଯାଉଛି ।
ଏଥିପାଇଁ ନିଶାଦ ପାର୍ଟି ସଭାପତି ତଥା ରାଜ୍ୟ ମତ୍ସ୍ୟ ମନ୍ତ୍ରୀ ସଞ୍ଜୟ ନିଶାଦ କହିଛନ୍ତି ଯେ ବେଆଇନ ଭାବେ ନିର୍ମିତ ଏହି ମସଜିଦ ହଟାଯିବା ଉଚିତ। ଏଥିପାଇଁ ସେ ଆଇନଗତ ଯୁଦ୍ଧ ଲଢିବା ପାଇଁ ସଂଘର୍ଷ କରିବେ | ଦୁର୍ଗରୁ ମସଜିଦ ହଟାଇବା ପାଇଁ ସମଗ୍ର ମତ୍ସ୍ୟଜୀବୀ ସମ୍ପ୍ରଦାୟ ଏକତ୍ରିତ ହୋଇଛନ୍ତି । ନିଶାଦରାଜ ଗୁହା ମତ୍ସ୍ୟଜୀବୀ ଓ ନାବିକମାନଙ୍କର ରାଜା ଥିଲେ। ସେ ଶୃଙ୍ଗୱେରପୁରରେ ଶାସନ କରୁଥିଲେ। ଯେତେବେଳେ ପ୍ରଭୁ ରାମ ତାଙ୍କ ପତ୍ନୀ ସୀତା ଏବଂ ଭାଇ ଲକ୍ଷ୍ମଣଙ୍କ ସହିତ ୧୪ ବର୍ଷ ବନବାସରେ ଯାଉଥିଲେ ସେତେବେଳେ ନିଷାଦରାଜ ଗୁହା ପ୍ରଭୁ ଶ୍ରୀ ରାମ, ମାତା ସୀତା ଏବଂ ଲକ୍ଷ୍ମଣଙ୍କୁ ତାଙ୍କ ଡଙ୍ଗାରେ ଗଙ୍ଗା ନଦୀ ପାର କରିବାରେ ସାହାଯ୍ୟ କରିଥିଲେ । ସେ ସେହି ଡଙ୍ଗାର ଡଙ୍ଗା ଚାଳକ ଥିଲେ ।
କେବଳ ଏତିକି ନୁହେଁ, ବନବାସ ପରେ ପ୍ରଭୁ ରାମ ତାଙ୍କର ପ୍ରଥମ ରାତ୍ରୀ ନିଷାଦରାଜ ଗୁହାଙ୍କ ଘରେ କାଟିଥିଲେ । ଏଥିପାଇଁ ରାଜା ଗୁହା ପ୍ରଭୁ ରାମଙ୍କ ରହିବା ଏବଂ ଖାଇବା ପାଇଁ ବ୍ୟବସ୍ଥା କରିଥିଲେ । ଶୃଙ୍ଗୱେରପୁରେ ଇଙ୍ଗୁଦି (ହିଙ୍ଗୋଟ) ଗଛ ତଳେ ବସି ପ୍ରଭୁ ରାମ ନିଶାଦରାଜ ଗୁହାଙ୍କ ସହ ବାର୍ତ୍ତଳାପ କରିଥିଲେ । ସେହିଠାରେ ପ୍ରଭୁ ରାମ ଏବଂ ନିଶାଦରାଜ ଗୁହାଙ୍କ ମିଳନ ହେତୁ ଶୃଙ୍ଗୱେରପୁର ଧାମ ବହୁତ ପ୍ରସିଦ୍ଧ | ନିଶାଦରାଜ ଗୁହାଙ୍କ ଦୁର୍ଗ ଏଠାରେ ଅବସ୍ଥିତ |
ପୁରାଣ ଅନୁଯାୟୀ, ଭଗବାନ ଶ୍ରୀ ରାମ ନିଶାଦରାଜଙ୍କୁ ପ୍ରତିଶୃତି ଦେଇଥିଲେ ଯେ ସେ ବନବାସରୁ ଫେରିବା ପରେ ମଧ୍ୟ ତାଙ୍କୁ ଭେଟିବେ। ଆହୁରି ମଧ୍ୟ ପ୍ରଭୁ ରାମ ନିଶାଦରାଜଙ୍କୁ ଆଲିଙ୍ଗନ କରି ତାଙ୍କୁ ତାଙ୍କର ବନ୍ଧୁ ବୋଲି କହିଥିଲେ। ପ୍ରଭୁ ରାମ ତାଙ୍କର ପ୍ରତିଜ୍ଞା ରକ୍ଷା କରି ଯେତେବେଳେ ବନବାସରୁ ଫେରିଥିଲେ, ସେତେବେଳେ ସେ ତାଙ୍କ ବନ୍ଧୁ ନିଶାଦରାଜଙ୍କୁ ଭେଟିଥିଲେ ଏବଂ ତାଙ୍କ କୁଟୀରରେ ଖାଦ୍ୟ ମଧ୍ୟ ଖାଇଥିଲେ । ସଞ୍ଜୟ ନିଶାଦଙ୍କ କହିବାନୁସାରେ, ଯେତେବେଳେ ୧୯୭୭ ମସିହାରେ ଶୃଙ୍ଗୱେରପୁରରେ ନିଶାଦରାଜ ଦୁର୍ଗର ଖନନ କରାଯାଇଥିଲା, ସେଠାରେ କୌଣସି ମସଜିଦ ନଥିଲା। ତେଣୁ ଏହି ବେଆଇନ୍ ଭାବେ ନିର୍ମିତ ମସଜିଦକୁ ତୁରନ୍ତ ହଟାଇବା ଉଚିତ୍ |
Comments are closed.