ମୁମ୍ବାଇ: ସିନେମା ହଲରେ ପଡୁ ପଡୁ ଆଜି ଫାନ୍ସଙ୍କୁ ପାଗଳ କରିଛି ପୁଷ୍ପା-୨ । ରାତି ୩ ଟାରୁ ଲାଗିଛି ଅସମ୍ଭାଳ ଭିଡ । ବହୁ ପ୍ରତୀକ୍ଷାର ଅନ୍ତ ଘଟାଇ ଆଜି ସିନେମା ହଲରେ ପଡୁ ପଡୁ ପୂରା ବାୟା କରିଛି ପୁଷ୍ପା ଦି ରାଇଜର ସିକ୍ବେନ୍ସ ପୁଷ୍ପା ୨ ଦ ରୁଲ । ରିଲିଜ୍ ପୂର୍ବରୁ ଏହା ଫ୍ୟାନ୍ସଙ୍କ କ୍ରେଜ୍ ଯେତିକି ବଜାୟ ରଖିଥିଲା ରିଲିଜ୍ ପରେ ଏହାକୁ ଦ୍ବିଗୁଣିତ କରିଛି । ସାଉଥ ସୁପରଷ୍ଟାର ଅଲ୍ଲୁ ଅର୍ଜ୍ଜୁନ ଏବଂ ରଶ୍ମିକା ମନ୍ଦନାଙ୍କ ସୁପରହିଟ ଯୋଡି ପୁଷ୍ପାର ପ୍ରଥମ ଭାଗରେ କମାଲ କଲା ପରେ ପୁଣି ଦ୍ବିତୀୟ ଭାଗରେ ଦମଦାର ଏଣ୍ଟ୍ରି ସହ ଫ୍ୟାନ୍ସଙ୍କୁ ମତୁଆଲା କରିଛନ୍ତି । ରିଲିଜ ପୂର୍ବରୁ ହିଁ ରେକର୍ଡ ବଷ୍ଟର ହୋଇସାରିଥିବା ଏହି ଫିଲ୍ମ ଏ ବର୍ଷର ସବୁଠୁ ବଡ ଫିଲ୍ମ ଲକ୍ଷ୍ୟରେ ଆଗେଇ ଚାଲିଛି ।
ସୁକୁମାରଙ୍କ ନିର୍ଦ୍ଦେଶିତ ଫିଲ୍ମ ପୁଷ୍ପା ୨ ଆଜି ପାଖାପାଖି ୧୦ ହଜାର ସ୍କ୍ରିନ୍ ସହ ବିଭିନ୍ନ ଭାଷାରେ ରିଲିଜ୍ ହୋଇଯାଇଛି । ରିଲିଜ୍ ପୂର୍ବରୁ ହିଁ ୧୦୦ କୋଟିର ପ୍ରି ସେଲ ହାତେଇଥିଲା ପୁଷ୍ପା ୨ । ଆଉ ଆଜି ଫାଷ୍ଟ ଡେ ଫାଷ୍ଟ ଶୋରେ ପାଖାପାଖି ୨୫୦ରୁ ୨୭୫ କୋଟି ପାର୍ କରିବା ନେଇ ଆଶା ବାନ୍ଧିଛନ୍ତି ନିର୍ମାତା । ଅନ୍ୟପଟରେ ଫିଲ୍ମଟି ଚଳିତ ବର୍ଷ ପାଇଁ ଅନେକ କିଛି ମାଇଲ ଖୁଣ୍ଟ ସେଟ୍ କରିଯାଉଛି । ୪୦୦ କୋଟି ବଜେଟରେ ପ୍ରସ୍ତୁତ ହୋଇଥିବା ଏହି ଫିଲ୍ମ ପୁଷ୍ପା ୨ ଟିକେଟରେ ମଧ୍ୟ ରେକର୍ଡ ଭାଙ୍ଗିଛି । ଟିକେଟ ଦାମ ବେଙ୍ଗାଲୁରୁରେ ୧୦୦୦ ଟଙ୍କା, ମୁମ୍ବାଇରେ ୧୬୦୦ ଟଙ୍କା, ଦିଲ୍ଲୀରେ ୧୮୦୦ ଟଙ୍କା, ଭୁବନେଶ୍ୱରରେ ୪୦୦-୫୦୦ ଟଙ୍କା ଭିତରେ ରହିଛି । ଗୋଟେ ପଟେ ଆଡଭାନ୍ସ ବୁକିଂରେ ବୁକ୍ ମାଇଁ ଶୋରେ ୨ ମିଲିୟନ କ୍ରସ କରିଥିବା ବେଳେ ପୁଷ୍ପା ୨ କଲକି ୨୮୯୮ ଏଡି, ବାହୁବଳି ୨, କେଜିଏଫ ଚାପ୍ଟର ୨ ଭଳି ଫିଲ୍ମକୁ ପଛରେ ପକାଇଛି ।
ଅନ୍ୟପକ୍ଷରେ ଫିଲ୍ମର ଚାହିଦା ଏତେ ଦେଖିବାକୁ ମିଳିଥିଲା ଯେ, ଅସମ୍ଭାଳ ଭିଡ ଧସ୍ତାଧସ୍ତି ପରିସ୍ଥିତି ସୃଷ୍ଟି କରିବାରୁ ଏକ ଅଭାବନୀୟ ଖବର ସାମ୍ନାକୁ ଆସିଛି । ଗତକାଲି ଫିଲ୍ମର ପ୍ରିମିୟର ବେଳେ ହାଇଦ୍ରାବାଦର ସିନେମା ହଲରେ ରଶ୍ମିକା ଏବଂ ଅଲ୍ଲୁ ଉପସ୍ଥିତ ରହିଥିବା ବେଳେ ଫ୍ୟାନ୍ସଙ୍କ ଦଳାଚକଟାରେ ଜଣେ ମହିଳାଙ୍କ ମୃତ୍ୟୁ ହୋଇଛି । ଏଥିସହିତ ଏଥିରେ ଅନେକ ଶିଶୁ ଆହତ ହୋଇଥିବା ମଧ୍ୟ ସୂଚନା ମିଳିଛି ।
ତେବେ ଓଡିଶାରେ ମଧ୍ୟ ସାଉଥ ସୁପରଷ୍ଟାର ଅଲ୍ଲୁଙ୍କ ଫିଲ୍ମ ପୁଷ୍ପା ୨ ଦ ରୁଲକୁ ରିଲିଜର ପ୍ରଥମ ଦିନରେ ଖୁବ୍ ଭଲପାଇବା ଦେଇଛନ୍ତି ଦର୍ଶକ । ରାଜଧାନୀ ଭୁବନେଶ୍ବରରେ ରାତି ନପାହୁଣୁ ଦର୍ଶକଙ୍କ ଭିଡ ହଲରେ ଆଗରେ ଦେଖିବାକୁ ମିଳିଥିଲା । ଅପରପକ୍ଷେ ଫିଲ୍ମର କିଛି ଅଂଶ ମାଲକାନଗିରିର ଆଧିବାସୀ ଅଧ୍ୟୁଷିତା ଅଞ୍ଚଳରେ ସୁଟ୍ ହୋଇଥିବା ଯୋଗୁ ଗୋଟେ ଦୃଷ୍ଟିରୁ ଏହା ଓଡିଆଙ୍କ ହୃଦୟର ଟିକେ ଅଧିକ ନିକଟତର । ତେବେ ପୂରା ବିଶ୍ବରରେ ଚହଳ ସୃଷ୍ଟି କରିଥିବା ଫିଲ୍ମ ପୁଷ୍ପା ୨ ପ୍ରଥମ ଦିନର ରିଭ୍ୟୁ ଦେଖି ଲାଗୁଛି ଏହା ବକ୍ସ ଅଫିସକୁ ବଡ ଫାଇଦା ଦେଇପାରେ ବୋଲି ଆଶା କରାଯାଇଥିବା ବେଳେ ରିଲିଜର ଘଣ୍ଟାଏ ଭିତରେ ବିଭିନ୍ନ ସୋସିଆଲ ସାଇଟରେ ଲିକ୍ ହୋଇଥିବା ସୂଚନା ମିଳିଛି । ଯାହା ଫିଲ୍ମର କଲେକ୍ସନ ଆଶାକୁ ମଉଳାଇବା ନେଇ ଚର୍ଚ୍ଚା ।
Comments are closed.