ନୂଆଦିଲ୍ଲୀ: ଭାରତର ପ୍ରଥମ ଚିଫ୍ ଅଫ ଡିଫେନ୍ସ ଷ୍ଟାଫ (ସିଡିଏସ) ଭାବେ କାର୍ଯ୍ୟଭାର ଗ୍ରହଣ କରିଥିବା ଜେନରାଲ ବିପିନ ରାୱତଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁଭେଚ୍ଛା ଜଣାଇଛନ୍ତି ।
“ମୁଁ ଖୁସି ଯେ ନୂଆ ବର୍ଷ ତଥା ନୂଆ ଦଶକ ପ୍ରାରମ୍ଭରେ, ଭାରତ ପ୍ରଥମ ଚିଫ୍ ଅଫ ଡିଫେନ୍ସ ଷ୍ଟାଫ ଭାବେ ଜେନରାଲ ବିପିନ ରାୱତଙ୍କୁ ପାଇଛି । ମୁଁ ତାଙ୍କୁ ଶୁଭେଚ୍ଛା ଜଣାଉଛି ଏବଂ ଏହି ନୂତନ କାର୍ଯ୍ୟଭାର ପାଇଁ ତାଙ୍କୁ ଶୁଭକାମନା ଜଣାଉଛି । ସେ ଜଣେ ଉଚ୍ଚକୋଟୀର ସେନାଧିôକାରୀ, ଯିଏକି ବଡ ଉତ୍ସାହର ସହିତ ରାଷ୍ଟ୍ରର ସେବା କରିଛନ୍ତି ।”
“ପ୍ରଥମ ସିଡିଏସ କାର୍ଯ୍ୟଭାର ସମ୍ଭାଳିବା ଅବସରରେ, ମୁଁ ରାଷ୍ଟ୍ରର ସେବା କରିଥିବା ଏବଂ ନିଜ ଜୀବନକୁ ସମର୍ପଣ କରିଥିବା ବୀର ସୈନିକମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛି । ମୁଁ କାରଗିିଲ ଯୁଦ୍ଧର ସାହସୀ ସୈନିକମାନଙ୍କୁ ସ୍ମରଣ କରୁଛି, ଯେଉଁମାନଙ୍କ ପାଇଁ ଆମ ସେନାର ସୁଧାର ଲାଗି ଅନେକ ଚର୍ଚ୍ଚା ଓ ପ୍ରକ୍ରିୟା ଆରମ୍ଭ ହୋଇଛି ଏବଂ ଏ ଦିଗରେ ଐତିହାସିକ ବିକାଶ ହୋଇପାରିଛି “।
“୧୫ ଅଗଷ୍ଟ ୨୦୧୯ରେ ଲାଲକିଲ୍ଲାରୁ ମୁଁ ଘୋଷଣା କରିଥିଲି ଯେ ଦେଶରେ ଜଣେ ଚିଫ୍ ଅଫ୍ ଡିଫେନ୍ସ ଷ୍ଟାଫ ନିଯୁକ୍ତ ହେବେ । ଏହା ଏକ ଅତ୍ୟନ୍ତ ଦାୟିତ୍ୱପୂର୍ଣ୍ଣ ପଦବୀ । ସେ ସେନାବାହନୀର ଆଧୁନିକୀକରଣ ଓ ବିକାଶ ଦିଗରେ କାର୍ଯ୍ୟ କରିବେ । ଏହା ୧୩୦ କୋଟି ଭାରତୀୟଙ୍କ ଆଶା ଓ ଆକାଂକ୍ଷାର ପ୍ରତିଫଳନ” ।
ପ୍ରଧାନମନ୍ତ୍ରୀ କହିଛନ୍ତି, “ପ୍ରତିରକ୍ଷା ବ୍ୟାପାର ବିଭାଗ ଏବଂ ଚିଫ୍ ଅଫ ଡିଫେନ୍ସ ଷ୍ଟାଫ ପଦବୀ ଗଠନ ଏକ ବ୍ୟାପକ ଏବଂ ଯୁଗାନ୍ତକାରୀ ସଂସ୍କାର, ଯାହାକି ଆମ ଦେଶକୁ ଆଧୁନିକ ଯୁଦ୍ଧ ଆହ୍ୱାନର ସମ୍ମୁଖୀନ ହେବାରେ ସହାୟକ ହେବ ।”