Indians Killed In US: ଭାରତୀୟଙ୍କ ପାଇଁ ଅସୁରକ୍ଷିତ ଆମେରିକା!, ଗଡୁଛି ଗୋଟିଏ ପରେ ଗୋଟିଏ ମୁଣ୍ଡ…

ନୂଆଦିଲ୍ଲୀ: ଆମେରିକାରେ ଗଡୁଛି ଭାରତୀୟଙ୍କ ମୁଣ୍ଡ…ଭାରତୀୟଙ୍କ ପାଇଁ ଅସୁରକ୍ଷିତ ହେବାରେ ଲାଗିଛି ଆମେରିକା…କାହାର ମୁଣ୍ଡ କାଟି, କାହାକୁ ଗୁଳି କରି ହତ୍ୟା…ଅକ୍ଟୋବରରେ ଗଲାଣି ୪ ଜୀବନ…

ହଜାର ମାଇଲ ଦୂର ଆମେରିକାରେ ଭାରତୀୟ ଏବଂ ଭାରତୀୟ ବଂଶୋଦ୍ଭବଙ୍କ ହତ୍ୟା ଏବେ ଚିନ୍ତା ବଢାଇଛି । ଅକ୍ଟୋବର ପ୍ରଥମ ସପ୍ତାହରେ ହିଁ ପୃଥକ ଘଟଣାରେ ଦୁଇ ଜଣ ଭାରତୀୟଙ୍କୁ ଅତି ନିର୍ମମ ଭାବରେ ହତ୍ୟା କରାଯାଇଛି । ଯାହା ଏବେ ଆମେରିକା ମାଟିରେ ଭାରତୀୟଙ୍କ ସୁରକ୍ଷା ନେଇ ବଡ ପ୍ରଶ୍ନ ଉଠାଇଛି ।

ଆମେରିକାରେ ଭାରତୀୟ ନାଗରିକଙ୍କୁ ହତ୍ୟା

ଗତ କେଇ ବର୍ଷ ଭିତରେ ଆମେରିକାରେ ଲଗାତାର ଭାରତୀୟଙ୍କ ଉପରେ ଅତ୍ୟାଚାର ବୃଦ୍ଧି ହୋଇଥିବା ବେଳେ ଏବେ ପୁଣି ଜଣେ ହତ୍ୟାର ଶିକାର ହୋଇଛି ଜଣେ ଯୁବକ । ଅକ୍ଟୋବର ୧ ରେ, ହାଇଦ୍ରାବାଦର ୨୭ ବର୍ଷୀୟ ଛାତ୍ର ଚନ୍ଦ୍ରଶେଖର ପୋଲଙ୍କୁ ଟେକ୍ସାସର ଡେଣ୍ଟନରେ ଏକ ପେଟ୍ରୋଲ ପମ୍ପରେ ଗୁଳି କରି ହତ୍ୟା କରାଯାଇଛି । ଯେଉଁଠାରେ ସେ ପାର୍ଟ-ଟାଇମ୍ କାମ କରୁଥିଲେ। ଏହାର ଦୃଶ୍ୟ ସିସିଟିଭିରେ କଏଦ୍ ହୋଇଥିବା ବେଳେ ଜଣେ ୨୩ ବର୍ଷୀୟ ସନ୍ଦିଗ୍ଧ ରିଚାର୍ଡ ଫ୍ଲୋରେଜ ତାଙ୍କୁ ହତ୍ୟା କରିଥିବା ଅଭିଯୋଗରେ ଗିରଫ କରାଯାଇଛି । କିଛି ଦିନ ପରେ, ଅକ୍ଟୋବର ୪ ରେ, ୫୧ ବର୍ଷୀୟ ଭାରତୀୟ ବଂଶୋଦ୍ଭବ ମୋଟେଲ ମାଲିକ ରାକେଶ ଏହାଗାବନଙ୍କୁ ପେନସିଲଭାନିଆର ପିଟସବର୍ଗରେ ତାଙ୍କ ଘର ବାହାରେ ଗୁଳି କରାଯାଇଥିଲା। ସେହିପରି ଅକ୍ଟୋବର ୨ରେ ମଧ୍ୟ ଆମେରିକାର ଉତ୍ତର କାରୋଲିନାରେ ୨ ଜଣ ଗୁଜୁରାଟୀ ଅନୀଲ ପଟେଲ ଏବଂ ପଙ୍କଜ ପଟେଲଙ୍କୁ ହତ୍ୟା କରାଯାଇଥିଲା ।ଗତ ସେପ୍ଟେମ୍ବର ମାସରେ ଟେକ୍ସାସର ଡାଲାସରେ ଜଣେ ଭାରତୀୟ ବଂଶୋଦ୍ଭବ ମୋଟେଲ ମ୍ୟାନେଜର ଚନ୍ଦ୍ର ନାଗାମଲ୍ଲାୟାହଙ୍କ ମୁଣ୍ଡ କାଟି ତାଙ୍କୁ ହତ୍ୟା କରାଯାଇଥିଲେ । ତାଙ୍କ ସହଯୋଗୀ ତାଙ୍କୁ ନିର୍ମମ ଭାବେ ହତ୍ୟା କରିଥିବା ବେଳେ ତାଙ୍କ ମୁଣ୍ଡକୁ ଫୁଟବଲ୍ ପରି ଲାତ ମାରିଥିଲେ । ଯାହାର ଦୃଶ୍ୟ ଅତ୍ୟନ୍ତ ଭୟଙ୍କର ଥିଲା । ଯାହା ଏବେ ଆମେରିକାରେ ଭାରତୀୟ ସମ୍ପ୍ରଦାୟ ମଧ୍ୟରେ ସୁରକ୍ଷା ଚିନ୍ତାକୁ ବୃଦ୍ଧି କରିଛି।

ଅଧିକ ଯାଉଛି ଛାତ୍ରଙ୍କ ଜୀବନ

୨୦୨୪ ଏବଂ ୨୦୨୫ ମଧ୍ୟରେ ଆମେରିକାରେ ଭାରତୀୟ ଛାତ୍ରଙ୍କ ମଧ୍ୟରେ ମୃତ୍ୟୁ ସଂଖ୍ୟାରେ ଏକ ଚିନ୍ତାଜନକ ବୃଦ୍ଧି ପରିଲକ୍ଷିତ ହୋଇଛି । ୨୦୨୪ ମସିହାର ଏକ ରିପୋର୍ଟ ଅନୁଯାୟୀ, ୨୦୧୮ ମସିହାରୁ ବିଦେଶରେ ୮୦୦ ରୁ ଅଧିକ ଭାରତୀୟ ଛାତ୍ରଙ୍କ ମୃତ୍ୟୁ ହୋଇଛି, ଯେଉଁଥିରେ ଆମେରିକା ସର୍ବାଧିକ ୧୪୧ ଜଣଙ୍କ ମୃତ୍ୟୁ ହୋଇଛି । କେବଳ ୨୦୨୪ରେ ୧୧ ଜଣ ଛାତ୍ର ଆମେରିକାରେ ମୃତ୍ୟୁ ମୁହଁରେ ପଡିଛନ୍ତି । ତେବେ ଏଥିପାଇଁ ଦୁର୍ଘଟଣା, ଆତ୍ମହତ୍ୟା ଏବଂ ଚିକିତ୍ସା ଜରୁରୀକାଳୀନ ପରିସ୍ଥିତି ସମେତ କାରଣଗୁଡ଼ିକ ଭିନ୍ନ ଭିନ୍ନ ହୋଇଥିଲେ ମଧ୍ୟ, ଏଥିରେ ବର୍ଦ୍ଧିତ ଅନୁପାତରେ ହିଂସାତ୍ମକ ଅପରାଧ ଜଡିତ । ଯାହା ଉତ୍ତମ ସୁରକ୍ଷା ବ୍ୟବସ୍ଥା ଏବଂ ଦୃଢ଼ ସମ୍ପ୍ରଦାୟ ସହାୟତା ବ୍ୟବସ୍ଥା ପାଇଁ ଏକ ବଡ ଆହ୍ୱାନ ସୃଷ୍ଟି କରୁଛି।

କ’ଣ କରୁଛି ଭାରତ?

ଆମେରିକା ଭାରତୀୟଙ୍କ ମୃତ୍ୟୁ ଖବର ଏବେ ସାଧାରଣରେ ଚାଞ୍ଚଲ୍ୟ ଖେଳାଇ ଥିବା ବେଳେ ଏହାକୁ ଚିନ୍ତା ପ୍ରକାଶ କରିଛି । ହିଂସା ବୃଦ୍ଧି ପାଇବା ପରେ ଆମେରିକା ଏବଂ ଭାରତ ଉଭୟରେ ଅଧିକାରୀ ଏବଂ ସମ୍ପ୍ରଦାୟ ଗୋଷ୍ଠୀ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଭାରତରେ ଆମେରିକାର ରାଷ୍ଟ୍ରଦୂତ ଏରିକ୍ ଗାର୍ସେଟି ଏବଂ ଭାରତୀୟ ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର ଉଭୟ ଭାରତୀୟ ଛାତ୍ରଙ୍କ ସୁରକ୍ଷା ସମ୍ପର୍କରେ ଚିନ୍ତା ପ୍ରକାଶ କରିଛନ୍ତି। ସେହିପରି ଫାଉଣ୍ଡେସନ୍ ଫର୍ ଇଣ୍ଡିଆ ଏବଂ ଇଣ୍ଡିଆନ୍ ଡାଏସ୍ପୋରା ଷ୍ଟଡିଜ୍ (FIIDS) ପରି ସଂଗଠନଗୁଡ଼ିକ ଘଟଣାଗୁଡ଼ିକର ବିଶ୍ଳେଷଣ କରିଛନ୍ତି । ଏଥିସହିତ ଭାରତ ସରକାର ପୀଡିତଙ୍କ ମୃତଦେହ ପ୍ରତ୍ୟର୍ପଣରେ ସମର୍ଥନ ଏବଂ ସହାୟତା ପ୍ରଦାନ କରିବାକୁ ପ୍ରତିବଦ୍ଧତା ଦେଖାଇଛନ୍ତି ।