Women’s ODI World Cup: ମହିଳା ବିଶ୍ୱକପ ଜିତିବା ପରେ ଗ୍ରାଉଣ୍ଡରେ କାନ୍ଦିଲେ ଏହି ପୂର୍ବତନ କ୍ରିକେଟର…କହିଲେ ଏହା ମୋର ସ୍ୱପ୍ନ ଥିଲା

ମୁମ୍ବାଇ:କାନ୍ଦିଲେ ପୂର୍ବତନ ଭାରତୀୟ ମହିଳା କ୍ରିକେଟ ଦଳର କିମ୍ବଦନ୍ତୀ ଝୁଲଣ ଗୋସ୍ୱାମୀ । ଭାରତ ଦକ୍ଷିଣ ଆଫ୍ରିକାକୁ ପରାସ୍ତ କରି ପ୍ରଥମ ଥର ପାଇଁ ମହିଳା ଏକଦିବସୀୟ ବିଶ୍ୱକପ୍ ୨୦୨୫ ଟାଇଟଲ ଜିତିଲା, ସେତେବେଳେ ପୂର୍ବତନ ଭାରତୀୟ ମହିଳା କ୍ରିକେଟ ଦଳର କିମ୍ବଦନ୍ତୀ  ଖେଳାଳି ଝୁଲଣ ଗୋସ୍ୱାମୀ ତାଙ୍କର ଲୁହ ରୋକିପାରିଲେ ନାହିଁ। କାରଣ ଭାରତୀୟ ମହିଳା କ୍ରିକେଟର ଜଣେ ମହାନ ଖେଳାଳି ଝୁଲଣ ଗୋସ୍ୱାମୀ ୨୦୧୭ରେ ଟାଇଟଲର ବହୁତ ନିକଟତର ହୋଇଥିଲେ, କିନ୍ତୁ ତାଙ୍କ କ୍ୟାରିଅରରେ ବିଶ୍ୱକପ୍ ଜିତିପାରି ନଥିଲେ ।

ରବିବାର ନଭେମ୍ବର ୨ ତାରିଖରେ ନଭି ମୁମ୍ବାଇରେ ଭାରତ ୫୨ ରନରେ ଫାଇନାଲ ମ୍ୟାଚ ଜିତି ପ୍ରଥମଥର ପାଇଁ ବିଶ୍ବକପ ନିଜ ନାଁରେ କରିଛି ।

ବିଶ୍ବକପ ଟ୍ରଫି ହାସଲ ପରେ ଭାରତୀୟ ଖେଳାଳିମାନେ ଗ୍ରାଉଣ୍ଡରେ ଟ୍ରଫି ସହ ବୁଲୁଥିଲେ ଓ ବିଜୟ ସେଲିବ୍ରେସନ କରୁଥିଲେ । ଏହି ସମୟରେ ଭାରତର ତିନି ଜଣ କିମ୍ବଦନ୍ତୀ ମହିଳା ଖେଳାଳି ଝୁଲଣ ଗୋସ୍ୱାମୀ, ମିତାଲି ରାଜ ଏବଂ ଅଞ୍ଜୁମ ଚୋପ୍ରା ବି ଉପସ୍ଥିତ ଥିଲେ । ଭାରତୀୟ ଦଳ ଏହି ଐତିହାସିକ ବିଜୟର ଉତ୍ସବ ପାଳନରେ ଏହି ତିନି ପୂର୍ବତନ ଖେଳାଳିଙ୍କୁ ସାମିଲ କରିଥିଲେ ​​ଏବଂ ସେମାନଙ୍କୁ ଟ୍ରଫି ଉଠାଇବାର ଗୌରବ ମଧ୍ୟ ଦେଇଥିଲେ।

ଅଧିନାୟକ ହରମନପ୍ରୀତ କୌର ଯେତେବଳେ ଝୁଲଣ ଗୋସ୍ୱାମୀଙ୍କୁ ଟ୍ରଫି ପ୍ରଦାନ କରିଥିଲେ, ଝୁଲଣ ତାଙ୍କ ଭାବନାକୁ ନିୟନ୍ତ୍ରଣ କରିପାରିଲେ ନାହିଁ ଏବଂ ତାଙ୍କ ଆଖିରୁ ଲୁହ ବହିବାକୁ ଲାଗିଲା।

ବିଜୟ ପରେ ଝୁଲଣ ସୋସିଆଲ ମିଡିଆ ପ୍ଲାଟଫର୍ମ ‘X’ ରେ ଲେଖିଛନ୍ତି,”ଏହା ମୋର ସ୍ୱପ୍ନ ଥିଲା, ଏବଂ ତୁମେମାନେ ଏହାକୁ ପୂର୍ଣ୍ଣ କରିଦେଲ। କପ୍ ଏବେ ଘରେ ପହଞ୍ଚିଯାଇଛି।”

ଏହି ଭାବପ୍ରବଣ ମୁହୂର୍ତ୍ତ ପରେ ଝୁଲଣ ପ୍ରକାଶ କଲେ ଯେ ସ୍ମୃତି ମନ୍ଧାନା ଏବଂ ହରମନପ୍ରୀତ କୌର ତାଙ୍କୁ ପ୍ରତିଶ୍ରୁତି ଦେଇଥିଲେ ଯେ ସେମାନେ ତାଙ୍କ ପାଇଁ ବିଶ୍ୱକପ୍ ଜିତିବେ। ଝୁଲଣ କହିଥିଲେ,’ସେ ମୋତେ ପ୍ରତିଶ୍ରୁତି ଦେଇଥିଲେ ଯେ ଆମେ ତୁମ ପାଇଁ ଏହି କପ୍ ଜିତିବୁ।’ଗତ ବର୍ଷ, ସେମାନେ କହିଥିଲେ, “ଆମେ ୨୦୨୨ରେ ସେମିଫାଇନାଲରେ ପହଞ୍ଚି ପାରିନଥିଲୁ, କିନ୍ତୁ ଏଥର ଆମେ ନିଶ୍ଚିତ ଭାବରେ ଜିତିବୁ। ହରମନ ଏବଂ ସ୍ମୃତି ମଧ୍ୟରାତ୍ରିରେ ମୋ ରୁମକୁ ଆସିଲେ ଏବଂ କହିଲେ, “ଆମେ ଜାଣିନାହୁଁ ଯେ ତୁମେ ପରବର୍ତ୍ତୀ ସମୟରେ ସେଠାରେ ରହିବ କି ନାହିଁ, କିନ୍ତୁ ଆମେ ତୁମ ପାଇଁ ଟ୍ରଫି ଜିତିବୁ। ଏବଂ ଆଜି ସେ ସେହି ପ୍ରତିଶ୍ରୁତି ପୂରଣ କରିଛନ୍ତି, ସେଥିପାଇଁ ମୁଁ ମୋର ଭାବନାକୁ ନିୟନ୍ତ୍ରଣ କରିପାରିଲି ନାହିଁ।’