Arms consignment seized:ଗଣତନ୍ତ୍ର ଦିବସ ପୂର୍ବରୁ ବଡ଼ ଆତଙ୍କବାଦୀ ଯୋଜନା ପଣ୍ଡ; ପାକ୍ ଡ୍ରୋନ ଦ୍ୱାରା ଆସିଥିବା ଅସ୍ତ୍ରଶସ୍ତ୍ର ଜବତ
ନୂଆଦିଲ୍ଲୀ:ଜମ୍ମୁ-କାଶ୍ମୀରର ସାମ୍ବା ଜିଲ୍ଲାରେ ଅନ୍ତର୍ଜାତୀୟ ସୀମା(IB) ନିକଟରେ ପାକିସ୍ତାନର ଏକ ବଡ଼ ଆତଙ୍କବାଦୀ ଷଡ଼ଯନ୍ତ୍ରକୁ ସୁରକ୍ଷା ବାହିନୀ ପଣ୍ଡ କରିଛନ୍ତି । ଜମ୍ମୁ ଓ କାଶ୍ମୀରର ସାମ୍ବା ଜିଲ୍ଲାର ଆନ୍ତର୍ଜାତୀୟ ସୀମା ନିକଟବର୍ତ୍ତୀ ଏକ ଅଞ୍ଚଳରୁ ପାକିସ୍ତାନରୁ ଡ୍ରୋନ୍ ଦ୍ୱାରା ଆସିଥିବା ଅସ୍ତ୍ରଶସ୍ତ୍ରକୁ ଜବତ କରାଯାଇଛି। ଅଧିକାରୀମାନେ ଶନିବାର ଏହି ସୂଚନା ଦେଇଛନ୍ତି।
ଅଧିକାରୀମାନେ କହିଛନ୍ତି ଯେ ଦୁଇଟି ପିସ୍ତଲ, ତିନୋଟି ମାଗାଜିନ୍, ୧୬ଟି କାର୍ଟ୍ରିଜ୍ ଏବଂ ଗୋଟିଏ ଗ୍ରେନେଡ୍ ସମେତ ଅନ୍ୟାନ୍ୟ ଜିନିଷପତ୍ର ଜବତ କରାଯାଇଛି। ସେ କହିଛନ୍ତି ଯେ ଗଣତନ୍ତ୍ର ଦିବସ ସମାରୋହରେ ବାଧା ସୃଷ୍ଟି କରିବା ପାଇଁ ଆତଙ୍କବାଦୀଙ୍କ ଯେକୌଣସି ପ୍ରୟାସକୁ ବିଫଳ କରିବା ପାଇଁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।
ଅଧିକାରୀ କହିଛନ୍ତି ଯେ, ସୀମା ପାରରୁ ସନ୍ଦେହଜନକ ଡ୍ରୋନ୍ କାର୍ଯ୍ୟକଳାପର ରିପୋର୍ଟ ପାଇବା ପରେ, ସୀମା ସୁରକ୍ଷା ବଳ (BSF) ଏବଂ ଜମ୍ମୁ-କାଶ୍ମୀର ପୋଲିସର ସ୍ୱତନ୍ତ୍ର ଅପରେସନ୍ସ ଗ୍ରୁପ୍ (SOG)ର ଏକ ମିଳିତ ଦଳ ଶୁକ୍ରବାର ବିଳମ୍ବିତ ରାତିରେ ଘଗୱାଲ ଅଞ୍ଚଳର ପଲୋରା ଗାଁରେ ଏକ ସର୍ଚ୍ଚ ଅପରେସନ୍ ଆରମ୍ଭ କରଥିଲେ ।
ଅଧିକାରୀଙ୍କ ଅନୁଯାୟୀ, ସନ୍ଧାନ ଦଳ ଏକ ଡ୍ରେନ୍ ପାଖରେ ହଳଦିଆ ଟେପରେ ଗୁଡ଼ାଯାଇଥିବା ଏକ ପ୍ୟାକେଟ ପାଇଥିଲେ, ଯାହାକୁ ବୋମା ନିଷ୍କ୍ରିୟକାରୀ ଦଳ ସହାୟତାରେ ଖୋଲାଯାଇଥିଲା। ସେମାନେ କହିଛନ୍ତି ଯେ ପ୍ୟାକେଟ୍ ରୁ ଅସ୍ତ୍ରଶସ୍ତ୍ର ଉଦ୍ଧାର କରାଯାଇଛି। ଏବେ ବି ତଲାସୀ ଅଭିଯାନ ଜାରି ରହିଛି।
ଅଧିକାରୀମାନେ କହିଛନ୍ତି ଯେ ଆତଙ୍କବାଦୀମାନେ ରାଷ୍ଟ୍ରୀୟ ଉତ୍ସବକୁ ବାଧା ଦେବା ପାଇଁ ଯୋଜନା କରୁଛନ୍ତି। ସୁରକ୍ଷା ଏଜେନ୍ସିଗୁଡ଼ିକ ସ୍ପଷ୍ଟ କରିଛନ୍ତି ଯେ ଅନୁପ୍ରବେଶ କିମ୍ବା ଆକ୍ରମଣର ଯେକୌଣସି ପ୍ରୟାସକୁ ସମ୍ପୂର୍ଣ୍ଣ ଭାବରେ ବିଫଳ କରିବା ପାଇଁ ସୀମାରେ ନଜର ରଖିବା ଏବଂ ସୁରକ୍ଷା ବ୍ୟବସ୍ଥାକୁ ଆହୁରି ସୁଦୃଢ଼ କରାଯାଇଛି।