Damage Gas Pipeline: ପାକିସ୍ତାନକୁ ବଡ ଝଟକା; ତେଲ ସଙ୍କଟ ବେଳେ ଗ୍ୟାସ ପାଇପଲାଇନକୁ ଉଡ଼ାଇ ଦେଲେ…
ନୂଆଦିଲ୍ଲୀ: ସାରା ବିଶ୍ୱରେ ଏକ ପ୍ରକାରର ଇନ୍ଧନ ସଙ୍କଟ ଦେଖାଦେଇଥିବା ବେଳେ ପାକିସ୍ତାନକୁ ଏକ ନୂଆ ଝଟକା ଲାଗିଛି। ବୃଦ୍ଧି ପାଉଥିବା ଗ୍ୟାସ୍ ମୂଲ୍ୟ ମଧ୍ୟରେ ପାକିସ୍ତାନର ଏକ ପ୍ରମୁଖ ଗ୍ୟାସ୍ ପାଇପଲାଇନ୍ କ୍ଷତିଗ୍ରସ୍ତ ହୋଇଛି । ବେଲୁଚିସ୍ତାନର ସୁଇ ଗ୍ୟାସ କ୍ଷେତ୍ରରୁ କରାଚୀକୁ ଇନ୍ଧନ ପରିବହନ କରୁଥିବା ଏକ ପ୍ରମୁଖ ଗ୍ୟାସ ପାଇପଲାଇନକୁ ଧ୍ୱଂସ କରାଯାଇଛି। ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁସାରେ ଏହି ଧ୍ୱଂସ ପଛରେ ବାଲୁଚ୍ ରିପବ୍ଲିକାନ୍ ଗାର୍ଡସ୍ (BRG) ହାତ ରହିଛି ।
ଏହି ବିସ୍ଫୋରଣ ସୁଇରୁ କରାଚୀକୁ ପ୍ରାକୃତିକ ଗ୍ୟାସ୍ ପରିବହନ କରୁଥିବା ଏକ ପାଇପଲାଇନକୁ ଗୁରୁତର ଭାବରେ କ୍ଷତିଗ୍ରସ୍ତ କରିଥିଲା। ଦି ବେଲୁଚିସ୍ତାନ ପୋଷ୍ଟ ରିପୋର୍ଟ କରିଛି ଯେ BRG ବେଲୁଚିସ୍ତାନର ପ୍ରାକୃତିକ ସମ୍ପଦର ଶୋଷଣକୁ ବିରୋଧ କରିଥିଲା ଏବଂ ଚେତାବନୀ ଦେଇଥିଲା ଯେ ଏପରି କାର୍ଯ୍ୟକଳାପକୁ ଟାର୍ଗେଟ କରିବା ଜାରି ରଖିବ।
ଅନ୍ୟପଟେ, ବଲୁଚିସ୍ତାନ ଲିବରେସନ ଫ୍ରଣ୍ଟ (ବିଏଲଏଫ୍) ସେନା ବିରୁଦ୍ଧରେ ଏକ ବଡ଼ ଅପରେସନ ଆରମ୍ଭ କରିଛି। ଟମ୍ପ ଅଞ୍ଚଳର ଆପସି ଖାନଠାରେ ଥିବା ପାକିସ୍ତାନୀ ସାମରିକ ଚେକପୋଷ୍ଟକୁ ଚାରିପଟୁ ଘେରିଯାଇ ବିଏଲଏଫ୍ ଯୋଦ୍ଧାମାନେ ରକେଟ୍, ମୋର୍ଟାର ଓ ସ୍ନାଇପର ରାଇଫଲ୍ରେ ପ୍ରବଳ ଗୁଳିବର୍ଷା କରିଥିଲେ। ଏହି ଭୟଙ୍କର ରକ୍ତପାତରେ ୧୫ ଜଣ ପାକିସ୍ତାନୀ ସୈନିକ ପ୍ରାଣ ହରାଇଥିବା ବେଳେ ଅନେକ ଗୁରୁତର ଆହତ ହୋଇଛନ୍ତି। ସେନା ମୃତଦେହ ଉଦ୍ଧାର କରିବାକୁ ଯାଉଥିବା ସମୟରେ ବିଦ୍ରୋହୀମାନେ ପୂର୍ବରୁ ଖଞ୍ଜିଥିବା ଆଇଇଡି ବିସ୍ଫୋରଣ କରିଥିଲେ, ଯେଉଁଥିରେ ସାମରିକ ଗାଡ଼ି ସହ ଆହୁରି ୪ ଜଣ ସୈନିକଙ୍କ ମୃତ୍ୟୁ ଘଟିଛି।
ଏହା ବ୍ୟତୀତ, ତୁରବତ ନିକଟରେ ପଞ୍ଜାବ ପ୍ରଦେଶକୁ ଯାଉଥିବା ଦୁଇଟି ଗ୍ୟାସ୍ ଟ୍ୟାଙ୍କରକୁ ବିଦ୍ରୋହୀମାନେ ନିଆଁ ଲଗାଇ ଦେଇଛନ୍ତି। ଅଭିଯୋଗ ହୋଇଛି ଯେ ଏହି ଟ୍ୟାଙ୍କରଗୁଡ଼ିକ ପାକିସ୍ତାନର ପଞ୍ଜାବ ପ୍ରଦେଶର ଶିଳ୍ପ ପାଇଁ ଗ୍ୟାସ ଯୋଗାଣ କରୁଥିଲେ।