କଲିକତା/ଭୁବନେଶ୍ୱର: ରାଜନୀତିରେ ବେଳେବେଳେ ଏମିତି କିଛି ସଂଯୋଗ ଘଟେ ଯାହା ସମସ୍ତଙ୍କୁ ଚକିତ କରିଦିଏ। ଓଡ଼ିଶାରେ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିବା ମୋହନ ଚରଣ ମାଝୀ ଦିନେ କେନ୍ଦୁଝରର ସରସ୍ୱତୀ ଶିଶୁ ବିଦ୍ୟା ମନ୍ଦିରରେ ଜଣେ ସାଧାରଣ ଗୁରୁଜୀ ଭାବେ ଶିକ୍ଷାଦାନ କରୁଥିଲେ। ତାଙ୍କର ସରଳ ଜୀବନଶୈଳୀ ଓ ଶୃଙ୍ଖଳିତ ଶିକ୍ଷକତାର ଅଭିଜ୍ଞତା ଆଜି ତାଙ୍କୁ ରାଜ୍ୟର ଶୀର୍ଷ ପଦବୀରେ ପହଞ୍ଚାଇଛି। ଠିକ୍ ସେହିଭଳି ଏକ ଛବି ଏବେ ପଡ଼ୋଶୀ ରାଜ୍ୟ ପଶ୍ଚିମବଙ୍ଗରେ ଦେଖିବାକୁ ମିଳିଛି।
ଉତ୍ତର ବଙ୍ଗର ଟାଣୁଆ ନେତା ନିଶିଥ ପ୍ରମାଣିକଙ୍କୁ ବିଜେପି ପଶ୍ଚିମବଙ୍ଗର ନୂତନ ଉପମୁଖ୍ୟମନ୍ତ୍ରୀ ଭାବେ ଚୟନ କରିଛି। ମୋହନ ମାଝୀଙ୍କ ଭଳି ନିଶିଥଙ୍କର ମଧ୍ୟ ଶିକ୍ଷକତା ସହ ଗଭୀର ସମ୍ପର୍କ ରହିଛି।
ରାଜନୀତିକୁ ଆସିବା ପୂର୍ବରୁ ନିଶିଥ ପ୍ରମାଣିକ ଜଣେ ପ୍ରାଥମିକ ଶିକ୍ଷକ ଭାବେ କାର୍ଯ୍ୟ କରୁଥିଲେ। ଲୋକଙ୍କ ସହ ସିଧାସଳଖ ଯୋଡ଼ି ହେବା ଏବଂ ସମାଜରେ ଶିକ୍ଷାର ପ୍ରସାର କରିବାର ଯେଉଁ ଅଭିଳାଷ ତାଙ୍କ ପାଖରେ ଥିଲା, ତାହା ତାଙ୍କୁ ଧୀରେ ଧୀରେ ଜନନେତା ଭାବେ ଗଢ଼ି ତୋଳିଥିଲା। ଉତ୍ତର ବଙ୍ଗର ରାଜବଂଶୀ ସମ୍ପ୍ରଦାୟର ଜଣେ ପ୍ରଭାବଶାଳୀ ଚେହେରା ଭାବେ ସେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି।
ମୋହନ ମାଝୀ ଓ ନିଶିଥ ପ୍ରମାଣିକଙ୍କ ମଧ୍ୟରେ ସମାନତା:
ପେଶା: ଦୁହେଁ ନିଜ କ୍ୟାରିୟର ଶିକ୍ଷକତାରୁ ଆରମ୍ଭ କରିଥିଲେ।
ଆଦର୍ଶ: ଉଭୟ ଶୃଙ୍ଖଳିତ ଜୀବନ ଓ ଜନସେବାକୁ ପ୍ରାଥମିକତା ଦେଇଛନ୍ତି।
ମୋହନ ମାଝୀ ଜଣେ ଆଦିବାସୀ ନେତା ଭାବେ ଓଡ଼ିଶାର ମଙ୍ଗ ଧରିଥିବା ବେଳେ, ନିଶିଥ ପ୍ରମାଣିକ ପଛୁଆ ବର୍ଗର ପ୍ରତିନିଧି ଭାବେ ପଶ୍ଚିମବଙ୍ଗରେ ବଡ଼ ଦାୟିତ୍ୱ ପାଇବାକୁ ଯାଉଛନ୍ତି।
ପୂର୍ବରୁ କେନ୍ଦ୍ର ମନ୍ତ୍ରୀମଣ୍ଡଳରେ କାର୍ଯ୍ୟ କରିସାରିଥିବା ନିଶିଥଙ୍କୁ ଏବେ ପଶ୍ଚିମବଙ୍ଗ ରାଜନୀତିରେ ବଡ଼ ଦାୟିତ୍ୱ ମିଳିବା ପରେ ପଶ୍ଚିମବଙ୍ଗ ବିଜେପି ଶିବିରରେ ଉତ୍ସାହ ଦେଖାଦେଇଛି। ଓଡ଼ିଶାରେ ‘ଗୁରୁଜୀ’ ମୋହନ ମାଝୀଙ୍କ ଶାସନ ଯେମିତି ସାଧାରଣ ଲୋକଙ୍କ ମନ ଜିଣିଛି, ପଶ୍ଚିମବଙ୍ଗରେ ମଧ୍ୟ ନିଶିଥ ପ୍ରମାଣିକ ସେହିପରି ସଫଳତା ପାଇବେ ବୋଲି ଚର୍ଚ୍ଚା ହେଉଛି।
