ଭୁବନେଶ୍ୱର: ରାଜ୍ୟରେ ଏବେ ଅସମ୍ଭାଳ ତାତି। ପ୍ରବଳ ଖରା ଓ ଗୁଳୁଗୁଳିରେ ଲୋକେ ଆଉଟୁପାଉଟୁ ହେଲେଣି। ହେଲେ ଏହାରି ଭିତରେ ଏକ ବଡ଼ ଆଶ୍ୱସ୍ତିକର ଖବର ସାମ୍ନାକୁ ଆସିଛି। ଦକ୍ଷିଣ-ପଶ୍ଚିମ ମୌସୁମୀ ବାୟୁ ଆସିବା ପାଇଁ ଏବେ ବାତାବରଣ ସମ୍ପୂର୍ଣ୍ଣ ଅନୁକୂଳ ହେବାରେ ଲାଗିଛି।
ପାଣିପାଗ ବିଭାଗର ସୂଚନା ଅନୁସାରେ, ଚଳିତ ସପ୍ତାହ ଶେଷ ସୁଦ୍ଧା ମୌସୁମୀ ବଙ୍ଗୋପସାଗରର ଦକ୍ଷିଣ ଭାଗରେ ପ୍ରବେଶ କରିବାର ଯଥେଷ୍ଟ ସମ୍ଭାବନା ରହିଛି। କେବଳ ଦକ୍ଷିଣ ବଙ୍ଗୋପସାଗର ନୁହେଁ, ଆଣ୍ଡାମାନ ସାଗର ଏବଂ ଆଣ୍ଡାମାନ-ନିକୋବର ଦ୍ୱୀପପୁଞ୍ଜ ଅଞ୍ଚଳରେ ମଧ୍ୟ ଏହି ସମୟ ସୁଦ୍ଧା ମୌସୁମୀ ଛୁଇଁବ ବୋଲି ପୂର୍ବାନୁମାନ କରାଯାଇଛି।
ପାଣିପାଗ ବିଜ୍ଞାନୀ ଉମାଶଙ୍କର ଦାସ ନିଜର ସୋସିଆଲ ମିଡିଆ ହ୍ୟାଣ୍ଡେଲ ‘ଏକ୍ସ’ରେ ଏହି ଗୁରୁତ୍ୱପୂର୍ଣ୍ଣ ସୂଚନା ସେୟାର କରିଛନ୍ତି। ସେ କହିଛନ୍ତି ଯେ, ବର୍ତ୍ତମାନ ପାଣିପାଗର ଅବସ୍ଥା ମୌସୁମୀର ଆଗମନ ପାଇଁ ବେଶ୍ ସହାୟକ ହେଉଛି। ଦକ୍ଷିଣ ବଙ୍ଗୋପସାଗର ଉପରେ ପବନର ଅନୁକୂଳ ଗତିପଥ, ଜଳୀୟ ବାଷ୍ପର ପ୍ରବାହ ଏବଂ ବାୟୁମଣ୍ଡଳରେ ହେଉଥିବା ଦ୍ରୁତ ପରିବର୍ତ୍ତନ ମୌସୁମୀ ବାୟୁକୁ ଆଗକୁ ବଢ଼ିବାରେ ସିଧାସଳଖ ସାହାଯ୍ୟ କରୁଛି।
ଦକ୍ଷିଣ-ପଶ୍ଚିମ ମୌସୁମୀ ବାୟୁ ଉପରେ ଓଡ଼ିଶାର କୃଷି ଚକ୍ର ଏବଂ ବାର୍ଷିକ ବର୍ଷା ସମ୍ପୂର୍ଣ୍ଣ ନିର୍ଭରଶୀଳ। ପ୍ରତିବର୍ଷ ଏହା ଭାରତୀୟ ମୁଖ୍ୟ ଭୂଖଣ୍ଡକୁ ଆସିବା ପୂର୍ବରୁ ପାଣିପାଗ ବିଭାଗ ଏହାର ଗତିବିଧି ଉପରେ କଡ଼ା ନଜର ରଖିଥାଏ। ବର୍ତ୍ତମାନର ଏହି ପରିବର୍ତ୍ତନ ଯୋଗୁଁ ରାଜ୍ୟର ଚାଷୀକୂଳ ଏବଂ ସାଧାରଣ ଲୋକଙ୍କ ମନରେ ଏକ ନୂଆ ଆଶା ସଞ୍ଚାର ହୋଇଛି।
ବର୍ତ୍ତମାନ ଓଡ଼ିଶା ସମେତ ପୂର୍ବ ଭାରତର ଅନେକ ସ୍ଥାନରେ ପ୍ରାକ୍-ମୌସୁମୀ ଗତିବିଧି ଆରମ୍ଭ ହୋଇସାରିଲାଣି। ତେଣୁ ଖୁବଶୀଘ୍ର ଏହି ପ୍ରଚଣ୍ଡ ତାତିରୁ ତ୍ରାହି ମିଳିବ ଏବଂ ପାଗରେ ପରିବର୍ତ୍ତନ ଆସିବ ବୋଲି ଆଶା କରାଯାଉଛି।
