ମକ୍କାରେ ବିପଦର ଆଶଙ୍କା, ବାଜିଲା ସାଇରନ୍: ହୁଥି ବିଦ୍ରୋହୀଙ୍କ ଉପରେ ସାଉଦି ଆରବର ଘନଘନ ମିସାଇଲ୍ ମାଡ଼

ରିୟାଦ: ୟେମେନର ଇରାନ ସମର୍ଥିତ ହୁଥି ବିଦ୍ରୋହୀ ଏବଂ ସାଉଦି ଆରବ ମଧ୍ୟରେ ତିକ୍ତତା ପୁଣି ଥରେ ଚରମ ସୀମାରେ ପହଞ୍ଚିଛି। ହୁଥି ବିଦ୍ରୋହୀମାନେ ସାଉଦି ଆରବ ଉପରେ ଡ୍ରୋନ୍ ଏବଂ ବାଲାଷ୍ଟିକ୍ ମିସାଇଲ୍ ମାଡ଼ କରିବା ପରେ ସାଉଦି ସେନା ପକ୍ଷରୁ ଏହାର କଡ଼ା ଜବାବ ଦିଆଯାଇଛି । ସାଉଦି ସେନା ୟେମେନରେ ଥିବା ହୁଥି ବିଦ୍ରୋହୀଙ୍କ ଘାଟି ଉପରେ ଘନଘନ ମିସାଇଲ୍ ମାଡ଼ କରିବା ସହ ୫୦ରୁ ଅଧିକ ଏୟାର୍ ଷ୍ଟ୍ରାଇକ୍ କରିଥିବା ଜଣାପଡ଼ିଛି ।

ଗତ ସୋମବାର ଦିନ ହୁଥି ବିଦ୍ରୋହୀମାନେ ସାଉଦି ଆରବର ଦକ୍ଷିଣ ଭାଗରେ ଥିବା ଖମିସ୍ ମୁଶୈତ୍, ଅଭା ଏବଂ ତାଇଫ୍ ସହରର ସାମରିକ ଘାଟିକୁ ଟାର୍ଗେଟ୍ କରି ଆକ୍ରମଣ କରିଥିଲେ । ସାଉଦି ସେନାବାହିନୀ ଅନୁଯାୟୀ, ଏହି ଆକ୍ରମଣରେ ୧୩ ଜଣ ନାଗରିକ ଆହତ ହୋଇଥିବା ବେଳେ ୭ଟି ଘର ଏବଂ ୨ଟି ଗାଡ଼ି କ୍ଷତିଗ୍ରସ୍ତ ହୋଇଛି । ଏହି ଘଟଣା ପରେ ସାଉଦି ସରକାର ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ ।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ହୁଥି ଆକ୍ରମଣକୁ ଦୃଷ୍ଟିରେ ରଖି ମଙ୍ଗଳବାର ସାଉଦି ଆରବର ପବିତ୍ର ସହର ମକ୍କା, ଜେଦ୍ଦା ଏବଂ ତାଇଫ୍ ସମେତ ୬ଟି ଅଞ୍ଚଳରେ ‘ସିଭିଲ୍ ଡିଫେନ୍ସ’ ପକ୍ଷରୁ ଜରୁରୀକାଳୀନ ଆଲର୍ଟ ଜାରି କରାଯାଇଥିଲା । ଲୋକମାନଙ୍କୁ ସତର୍କ ରହିବାକୁ ସାଇରନ୍ ମଧ୍ୟ ବଜାଯାଇଥିଲା । ତେବେ କିଛି ସମୟ ପରେ ବିପଦ ଟଳିଯିବାରୁ ଏହି ଆଲର୍ଟକୁ ହଟାଇ ନିଆଯାଇଥିଲା । ମଧ୍ୟପ୍ରାଚ୍ୟରେ ବ୍ୟାପକ ଯୁଦ୍ଧ ପରିସ୍ଥିତି ଆରମ୍ଭ ହେବା ପରଠାରୁ ମକ୍କାରେ ଏଭଳି ଆଲର୍ଟ ଜାରି ହେବା ଏକ ବିରଳ ଘଟଣା ।

ସାଉଦି ନେତୃତ୍ୱାଧୀନ ମେଣ୍ଟ ପକ୍ଷରୁ ସ୍ପଷ୍ଟ କରାଯାଇଛି ଯେ, ନିଜ ଦେଶର ସାର୍ବଭୌମତ୍ୱ ଏବଂ ନାଗରିକଙ୍କ ସୁରକ୍ଷା ପାଇଁ ସେମାନେ ଯେକୌଣସି ପଦକ୍ଷେପ ନେବାକୁ ପ୍ରସ୍ତୁତ । ହୁଥି ବିଦ୍ରୋହୀଙ୍କ ଏଭଳି ଆତଙ୍କବାଦୀ କାର୍ଯ୍ୟକଳାପର ଦୃଢ଼ ମୁକାବିଲା କରାଯିବ ବୋଲି ସାଉଦି ସରକାର ଚେତାବନୀ ଦେଇଛନ୍ତି ।

ସୂଚନାଯୋଗ୍ୟ, ୨୦୧୪ ମସିହାରୁ ୟେମେନରେ ଗୃହଯୁଦ୍ଧ ଲାଗି ରହିଛି, ଯେଉଁଥିରେ ସାଉଦି ଆରବ ୟେମେନ ସରକାରଙ୍କୁ ସମର୍ଥନ କରୁଛି ଏବଂ ହୁଥିମାନଙ୍କୁ ଇରାନର ସମର୍ଥନ ମିଳୁଛି । ଜାତିସଂଘର ମଧ୍ୟସ୍ଥତାରେ ହୋଇଥିବା ଯୁଦ୍ଧବିରାମ କିଛି ବର୍ଷ ପୂର୍ବେ ଭାଙ୍ଗିଯିବା ପରେ ଏବେ ସ୍ଥିତି ଅଧିକ ସଙ୍ଗିନ ହୋଇଛି । ନିକଟ ଅତୀତରେ ହୁଥି ବିଦ୍ରୋହୀମାନେ ଲୋହିତ ସାଗର ଉପକୂଳ ଏବଂ ବାବ୍ ଅଲ୍-ମାଣ୍ଡେବ୍ ପ୍ରଣାଳୀକୁ ନିଜ ଦଖଲକୁ ନେଇଛନ୍ତି, ଯାହା ବିଶ୍ୱ ବାଣିଜ୍ୟ ପାଇଁ ଏକ ପ୍ରମୁଖ ଜଳପଥ ।

କେବଳ ସେତିକି ନୁହେଁ, ସାଉଦି ଆରବର ପ୍ରମୁଖ ତୈଳ ଭିତ୍ତିଭୂମି ଉପରେ ମଧ୍ୟ ସେମାନେ କ୍ରମାଗତ ଆକ୍ରମଣ କରିଆସୁଛନ୍ତି । ଗୋଟିଏ ପଟେ ଆମେରିକା ଏବଂ ଇରାନ ମଧ୍ୟରେ ତିକ୍ତତା ଲାଗି ରହିଥିବା ବେଳେ, ସାଉଦି ଆରବ ଏବଂ ହୁଥିଙ୍କ ମଧ୍ୟରେ ଏହି ସାମ୍ପ୍ରତିକ ସଂଘର୍ଷ ସମଗ୍ର ମଧ୍ୟପ୍ରାଚ୍ୟକୁ ଏକ ବଡ଼ ସଙ୍କଟ ଆଡ଼କୁ ଠେଲି ଦେଇଛି । ଏହି ସଙ୍କଟମୟ ପରିସ୍ଥିତି ସମ୍ପର୍କରେ ସାଉଦି କ୍ରାଉନ୍ ପ୍ରିନ୍ସ ମହମ୍ମଦ ବିନ୍ ସଲମାନ ଇଜିପ୍ଟ ରାଷ୍ଟ୍ରପତିଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି ।