ଇନ୍କୋଇସ୍ ପକ୍ଷରୁ ‘ସ୍ୱଚ୍ଛ ସାଗର, ସୁରକ୍ଷିତ ସାଗର ୫.୦’: ଓଡ଼ିଶା ଉପକୂଳରେ ସମୁଦ୍ର ସଫେଇ ଓ ସଚେତନତା ଅଭିଯାନ
ବ୍ରହ୍ମପୁର: ଦେଶବ୍ୟାପୀ ‘ସ୍ୱଚ୍ଛ ସାଗର, ସୁରକ୍ଷିତ ସାଗର ୫.୦’ (SSSS 5.0) ଅଭିଯାନ ଅଂଶସ୍ୱରୂପ ଓଡ଼ିଶା ଉପକୂଳରେ ଏକ ଦୁଇ ଦିନିଆ ସମୁଦ୍ରକୂଳ ସଫେଇ ଓ ସଚେତନତା କାର୍ଯ୍ୟକ୍ରମ ସେପ୍ଟେମ୍ବର ୧୮ ଓ ୧୯ ତାରିଖରେ ଅନୁଷ୍ଠିତ ହୋଇଯାଇଛି। ଭାରତୀୟ ଜାତୀୟ ମହାସାଗର ସୂଚନା ସେବା କେନ୍ଦ୍ର (ଇନ୍କୋଇସ୍)ର ନେତୃତ୍ୱରେ ସେଞ୍ଚୁରିଆନ୍ ବିଶ୍ୱବିଦ୍ୟାଳୟ ଓ ବ୍ରହ୍ମପୁର ବିଶ୍ୱବିଦ୍ୟାଳୟର ମିଳିତ ସହଯୋଗରେ ଆୟୋଜିତ ଏହି ଅଭିଯାନରେ ୧୬୫ରୁ ଊର୍ଦ୍ଧ୍ୱ ଛାତ୍ରଛାତ୍ରୀ, ସ୍ୱେଚ୍ଛାସେବୀ ଓ ସ୍ଥାନୀୟ ବାସିନ୍ଦା ସାମିଲ ହୋଇଥିଲେ।
ସେପ୍ଟେମ୍ବର ୧୯ ତାରିଖରେ ଗୋକରକୁଦା-ପୁରୁଣାବନ୍ଧ ଅଲିଭ୍ ରିଡ୍ଲେ କାଚିମ ପ୍ରଜନନ ସମୁଦ୍ରକୂଳରେ ଏକ ବ୍ୟାପକ ସଫେଇ ଅଭିଯାନ କରାଯାଇଥିଲା। ଏଥିରେ ୭୫ରୁ ଊର୍ଦ୍ଧ୍ୱ ପରିବେଶପ୍ରେମୀ ଓ ଛାତ୍ରଛାତ୍ରୀ ଅଂଶଗ୍ରହଣ କରି ସମୁଦ୍ରକୂଳରୁ ବିପୁଳ ପରିମାଣର ପ୍ଲାଷ୍ଟିକ୍ ବର୍ଜ୍ୟବସ୍ତୁ ଓ ପରିତ୍ୟକ୍ତ ମାଛଧରା ଜାଲ ହଟାଇଥିଲେ। ସମୁଦ୍ରକୂଳରେ ପଡ଼ିରହିଥିବା ଏହି ପ୍ଲାଷ୍ଟିକ୍ ଓ ଜାଲ ଅଲିଭ୍ ରିଡ୍ଲେ କାଚିମ ଏବଂ ସେମାନଙ୍କ ନବଜାତ ଛୁଆଙ୍କ ପାଇଁ ଗୁରୁତର ବିପଦ ସୃଷ୍ଟି କରିଥାଏ। ଏହି ସଫେଇ ଦ୍ୱାରା କାଚିମମାନଙ୍କ ସୁରକ୍ଷିତ ଚଳପ୍ରଚଳ ଓ ଅଣ୍ଡାଦାନ ପ୍ରକ୍ରିୟା ସହଜ ହୋଇପାରିବ। ଏହା ପୂର୍ବରୁ ସେପ୍ଟେମ୍ବର ୧୮ ତାରିଖରେ ହରିପୁର କ୍ରିକ୍ଠାରେ ସଫେଇ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା, ଯେଉଁଥିରେ ୯୦ରୁ ଊର୍ଦ୍ଧ୍ୱ ଜଣ ଅଂଶଗ୍ରହଣ କରି ସାମୁଦ୍ରିକ ଆବର୍ଜନା ସଫା କରିଥିଲେ। ପରେ ବ୍ରହ୍ମପୁର ବିଶ୍ୱବିଦ୍ୟାଳୟର ସାମୁଦ୍ରିକ ବିଜ୍ଞାନ ବିଭାଗଠାରେ ସମୁଦ୍ର ସଂରକ୍ଷଣ, ସାମୁଦ୍ରିକ ପ୍ରଦୂଷଣ ନିୟନ୍ତ୍ରଣ ଓ ସ୍ଥାୟୀ ବର୍ଜ୍ୟବସ୍ତୁ ପରିଚାଳନା ସମ୍ପର୍କରେ ଏକ ସଚେତନତା କର୍ମଶାଳା ଆୟୋଜିତ ହୋଇଥିଲା।
ଏହି ଅବସରରେ ଇନ୍କୋଇସ୍ର ବିଜ୍ଞାନୀ ଡ. ସଞ୍ଜୀବ ବଳିଆରସିଂହ କହିଥିଲେ ଯେ, ସମୁଦ୍ର ପରିବେଶ ସୁରକ୍ଷା ଓ ପ୍ରଦୂଷଣ ହ୍ରାସ ପାଇଁ ସ୍ଥାନୀୟ ଲୋକଙ୍କ ସହଭାଗିତା ଏବଂ ବୈଜ୍ଞାନିକ ସଚେତନତା ନିତାନ୍ତ ଆବଶ୍ୟକ। ସେଞ୍ଚୁରିଆନ୍ ବିଶ୍ୱବିଦ୍ୟାଳୟର ପ୍ରଫେସର ଡ. କମଲ କୁମାର ବାରିକ କହିଥିଲେ ଯେ, ଯୁବପିଢ଼ି ଓ ସ୍ଥାନୀୟ ସମୁଦାୟକୁ ଏହିଭଳି କାର୍ଯ୍ୟକ୍ରମରେ ଯୋଡ଼ିବା ଦ୍ୱାରା ଉପକୂଳ ସୁରକ୍ଷା ପ୍ରତି ଦାୟିତ୍ୱବୋଧ ବୃଦ୍ଧି ପାଇବ। ବ୍ରହ୍ମପୁର ବିଶ୍ୱବିଦ୍ୟାଳୟ ସାମୁଦ୍ରିକ ବିଜ୍ଞାନ ବିଭାଗର ମୁଖ୍ୟ ଡ. ତମୋଘ୍ନ ଆଚାର୍ଯ୍ୟ ସୁସ୍ଥ ସମୁଦ୍ର ପରିବେଶ ସହ ମାନବ କଲ୍ୟାଣର ନିବିଡ଼ ସମ୍ପର୍କ ବିଷୟରେ ଆଲୋଚନା କରିଥିଲେ। ଓଡ଼ିଶାର ମୂଲ୍ୟବାନ ସାମୁଦ୍ରିକ ସମ୍ପଦ ଓ ଜୈବବିବିଧତାକୁ ସୁରକ୍ଷିତ ରଖିବା ପାଇଁ ଶପଥ ଗ୍ରହଣ ସହ ଏହି ଦୁଇ ଦିନିଆ ଅଭିଯାନ ଉଦ୍ଯାପିତ ହୋଇଥିଲା।