ନ୍ୟୁଜିଲାଣ୍ଡ ବିପକ୍ଷ ଚତୁର୍ଥ ଦିନିକିଆ ମ୍ୟାଚ୍ରେ ଭାରତକୁ ୨୪୪ ରନର ବଡ଼ ପରାଜୟର ସାମ୍ନା କରିବାକୁ ପଡ଼ିଛି । ପ୍ରଥମେ ବ୍ୟାଟିଂ କରି ନ୍ୟୁଜିଲାଣ୍ଡ ୩୩୩ ରନ୍ ସଂଗ୍ରହ କରିଥିବା ବେଳେ ଜବାବରେ ଭାରତୀୟ ଦଳ ମାତ୍ର ୮୯ ରନରେ ଅଲ୍ ଆଉଟ୍ ହୋଇଯାଇଥିଲା । ଏହି ପରାଜୟ ସହ ଟିମ୍ ଇଣ୍ଡିଆ ନାଁରେ ୪ଟି ଅଲୋଡ଼ା ରେକର୍ଡ ଯୋଡ଼ି ହୋଇଯାଇଛି । ଦକ୍ଷିଣ ଆଫ୍ରିକା, ଇଂଲଣ୍ଡ, ନ୍ୟୁଜିଲାଣ୍ଡ ଏବଂ ଅଷ୍ଟ୍ରେଲିଆ ମାଟିରେ ରନ୍ ବ୍ୟବଧାନରେ ଏହା ଭାରତର ସବୁଠାରୁ ବଡ଼ ଦିନିକିଆ ପରାଜୟ । ପୂର୍ବରୁ ୨୦୦୪ରେ ସିଡନୀଠାରେ ଅଷ୍ଟ୍ରେଲିଆ ବିପକ୍ଷରେ ଭାରତ ୨୦୮ ରନରେ ପରାସ୍ତ ହୋଇଥିଲା ।
ପ୍ରଥମ ଥର ପାଇଁ ଭାରତୀୟ ଦଳ ଗୋଟିଏ କ୍ୟାଲେଣ୍ଡର ବର୍ଷରେ ଉଭୟ ଦିନିକିଆ ଏବଂ ଟି-୨୦ ଫର୍ମାଟରେ ୧୦୦ରୁ କମ୍ ରନରେ ଅଲ୍ ଆଉଟ୍ ହୋଇଛି । ଉଭୟ ଥର ଶ୍ରେୟସ ଆୟର ଦଳର ଅଧିନାୟକ ଥିଲେ । ନ୍ୟୁଜିଲାଣ୍ଡରେ ଏହା ଭାରତର ସବୁଠାରୁ କମ୍ ଦିନିକିଆ ସ୍କୋର । ତେବେ ନ୍ୟୁଜିଲାଣ୍ଡ ବିପକ୍ଷରେ ଏହା ଭାରତର ଦ୍ୱିତୀୟ ସର୍ବନିମ୍ନ ସ୍କୋର (ପୂର୍ବରୁ ୨୦୧୦ରେ ଡାମ୍ବୁଲାଠାରେ ଭାରତ ୮୮ ରନରେ ଅଲ୍ ଆଉଟ୍ ହୋଇଥିଲା) । ଦିନିକିଆ ଅଧିନାୟକ ଭାବେ ନିଜର ପ୍ରଥମ ମ୍ୟାଚ୍ରେ ଖାତା ନଖୋଲି (୦ ରନରେ) ଆଉଟ୍ ହେବାରେ ଶ୍ରେୟସ ଆୟର ପ୍ରଥମ ଭାରତୀୟ ଖେଳାଳି ପାଲଟିଛନ୍ତି । ପୂର୍ବରୁ ବିରାଟ କୋହଲି ଏବଂ ରୋହିତ ଶର୍ମା ଅଧିନାୟକତ୍ୱ ଡେବ୍ୟୁରେ ୨-୨ ରନ୍ କରି ଆଉଟ୍ ହୋଇଥିଲେ ।
