ଭୁବନେଶ୍ୱର: ୯ଟି ଲୋକସଭା ଆସନ ପାଇଁ କଂଗ୍ରେସ ନିଜର ଦ୍ୱିତୀୟ ପ୍ରାର୍ଥୀ ତାଲିକା ଜାରି କରିଛି। କଂଗ୍ରେସ ପକ୍ଷରୁ ପ୍ରକାଶିତ ତାଲିକା ଅନୁଯାୟୀ ବରିଷ୍ଠ ନେତା ଶ୍ରୀକାନ୍ତ ଜେନା ବାଲେଶ୍ୱର ଲୋକସଭା ଆସନରୁ ନିର୍ବାଚନ ଲଢ଼ିବେ। ଏହି ଆସନ ପାଇଁ ବିଜେପି ପୂର୍ବତନ କେନ୍ଦ୍ରମନ୍ତ୍ରୀ ପ୍ରତାପ ଷଡ଼ଙ୍ଗୀଙ୍କୁ ପ୍ରାର୍ଥୀ କରିଛି। ଲେଖାଶ୍ରୀ ସାମନ୍ତସିଂହାର ବିଜେପି ଛାଡି ଶାସକ ଦଳରେ ଯୋଗ ଦେବା ପରେ ବିଜେଡି ତାଙ୍କୁ ଟିକେଟ ଦେଇଛି।
କଂଗ୍ରେସ ପୁରୀ ପାଇଁ ସୁଚରିତା ମହାନ୍ତି ଓ ଭୁବନେଶ୍ୱର ଲୋକସଭା ଆସନ ପାଇଁ ୟାସିର ନୱାଜଙ୍କୁ ପ୍ରାର୍ଥୀ କରିଛି। ବରିଷ୍ଠ କଂଗ୍ରେସ ନେତା ତଥା ଜଟଣୀ ବିଧାୟକ ସୁରେଶ ରାଉତରାୟଙ୍କ ପୁଅ ତଥା ବିଜେପିର ବର୍ତ୍ତମାନର ସାଂସଦ ଅପରାଜିତା ଷଡ଼ଙ୍ଗୀ ଓ ବିଜେଡିର ମନ୍ମଥ ରାଉତରାୟଙ୍କ ବିରୋଧରେ ନିର୍ବାଚନ ଲଢ଼େଇ ହେବ।
କଂଗ୍ରେସ ଦ୍ବିତୀୟ ତାଲିକାରେ ଘୋଷଣା କରିଥିବା ଅନ୍ୟ ପ୍ରାର୍ଥୀଙ୍କ ତାଲିକା ନିମ୍ନଲିଖିତ: କେନ୍ଦୁଝର ମୋହନ ହେମ୍ବ୍ରମ (ଏସଟି),
ବାଲେଶ୍ୱର ପାଇଁ ଶ୍ରୀକାନ୍ତ କୁମାର ଜେନା, ଭଦ୍ରକ ପାଇଁ ଅନନ୍ତ କୁମାର ସେଠୀ (ଏସସି), ଯାଜପୁର ପାଇଁ ଆଞ୍ଚଳ ଦାସ (ଏସସି),
ଢେଙ୍କାନାଳ ପାଇଁ ସସ୍ମିତା ବେହେରା, କେନ୍ଦ୍ରାପଡ଼ା ପାଇଁ ସିଦ୍ଧାର୍ଥ ସ୍ୱରୂପ ଦାସ, ଜଗତସିଂହପୁରରୁ ରବୀନ୍ଦ୍ର କୁମାର ସେଠୀ,
ପୁରୀରୁ ସୁଚରିତା ମହାନ୍ତି, ଭୁବନେଶ୍ଵରରୁ ୟାସିର ନୱାଜ ପ୍ରାର୍ଥୀ ହୋଇଛନ୍ତି।
ଏହାପୂର୍ବରୁ ଏପ୍ରିଲ ୨ ତାରିଖରେ ପ୍ରକାଶିତ ପ୍ରଥମ ତାଲିକାରେ କଂଗ୍ରେସ ୮ଟି ଲୋକସଭା ଓ ୪୯ଟି ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା କରିଛି। ରାଜ୍ୟରେ ମୋଟ ୨୧ ଟି ଲୋକସଭା ନିର୍ବାଚନ ମଣ୍ଡଳୀ ରହିଛି।