ସମ୍ପନ୍ନ ହେଲା ପ୍ରଭୁ ଶ୍ରୀ ଲିଙ୍ଗରାଜ ଓ ମାତା ପାର୍ବତୀଙ୍କ ଦିବ୍ୟ ବିବାହ: ଭୋର୍ ୫ଟାରେ ପଡ଼ିଲା ହାତଗଣ୍ଠି, କେଦାରଗୌରୀ ମନ୍ଦିରରେ ଜମିଲା ଭକ୍ତଙ୍କ ଭିଡ଼

ଭୁବନେଶ୍ୱର:  ଏକାମ୍ର କ୍ଷେତ୍ର ଭୁବନେଶ୍ୱରରେ ଅତ୍ୟନ୍ତ ଆଧ୍ୟାତ୍ମିକ ପରିବେଶ ମଧ୍ୟରେ ସମ୍ପନ୍ନ ହୋଇଛି ଏକାମ୍ର ଅଧିପତି ପ୍ରଭୁ ଶ୍ରୀ ଲିଙ୍ଗରାଜ ଏବଂ ମାତା ପାର୍ବତୀଙ୍କ ପବିତ୍ର ଦିବ୍ୟ ବିବାହ ମହୋତ୍ସବ। ଶୀତଳ ଷଷ୍ଠୀ ଯାତ୍ରା ଅବସରରେ ଆୟୋଜିତ ଏହି ମହାପ୍ରଭୁଙ୍କ ବିବାହ ଉତ୍ସବକୁ ଦେଖିବା ପାଇଁ ହଜାର ହଜାର ଭକ୍ତଙ୍କ ସମାଗମ ହୋଇଥିଲା। ଭୋର୍ ପ୍ରାୟ ୫ଟା ସମୟରେ ମହାପ୍ରଭୁ ଏବଂ ମାତା ପାର୍ବତୀଙ୍କ ଶୁଭ ହାତଗଣ୍ଠି ପଡ଼ିଥିଲା। ଏହା ପରେ ଦେବଦମ୍ପତିଙ୍କୁ ଦର୍ଶନ କରି ଭକ୍ତମାନେ ନିଜକୁ ଧନ୍ୟ ମନେ କରିଛନ୍ତି।

ପ୍ରଶାସନ ଏବଂ ସେବାୟତଙ୍କ ପକ୍ଷରୁ ସମସ୍ତ ନୀତିକାନ୍ତିକୁ ଶୃଙ୍ଖଳିତ କରିବା ପାଇଁ ବ୍ୟାପକ ପ୍ରସ୍ତୁତି କରାଯାଇଥିଲା। ତେବେ ମନ୍ଦିରର କିଛି ଆଦ୍ୟ ନୀତିକାନ୍ତିରେ ପାଖାପାଖି ୧ ଘଣ୍ଟା ବିଳମ୍ବ ଦେଖାଦେଇଥିଲା। ଏହି କାରଣରୁ ମହାପ୍ରଭୁଙ୍କ ଶୁଭ ହାତଗଣ୍ଠି ପଡ଼ିବା ନୀତି ମଧ୍ୟ ସାମାନ୍ୟ ବିଳମ୍ବ ହୋଇଥିଲା। ତଥାପି ସେବାୟତମାନଙ୍କ ନିଷ୍ଠାପର ଉଦ୍ୟମ ଯୋଗୁଁ ବୈଦିକ ରୀତିନୀତି ଅନୁଯାୟୀ ସମସ୍ତ ବିବାହ କାର୍ଯ୍ୟ ସଫଳତାର ସହ ସମ୍ପନ୍ନ ହୋଇଛି।

ଏହି ଦିବ୍ୟ ବିବାହ ଉତ୍ସବ ପାଇଁ ଗତକାଲି ରାତି ପ୍ରାୟ ୧୨ଟା ସୁଦ୍ଧା ଲିଙ୍ଗରାଜ ମନ୍ଦିରରୁ କେଦାରଗୌରୀ ମନ୍ଦିର ଅଭିମୁଖେ ବାହାରିଥିଲେ ଏକାମ୍ର ଅଧିପତି ପ୍ରଭୁ ଶ୍ରୀ ଲିଙ୍ଗରାଜ। ପାରମ୍ପରିକ ବାଦ୍ୟ, ଘଣ୍ଟଧ୍ୱନି ଏବଂ ଭକ୍ତଙ୍କ ହରିବୋଲ ଧ୍ୱନିରେ ସାରା ପରିବେଶ ପ୍ରକମ୍ପିତ ହୋଇଉଠିଥିଲା।

ବରଯାତ୍ରୀ ଶୋଭାଯାତ୍ରା କେଦାରଗୌରୀ ମନ୍ଦିରରେ ପହଞ୍ଚିବା ପରେ କନ୍ୟା ପକ୍ଷରୁ ମହାପ୍ରଭୁଙ୍କୁ ଭବ୍ୟ ସ୍ୱାଗତ କରାଯାଇଥିଲା। ଉଭୟ ମନ୍ଦିରର ସେବାୟତ ଓ ପ୍ରଶାସନିକ ଅଧିକାରୀମାନଙ୍କ ମିଳିତ ସହଯୋଗରେ ଏହି ଐତିହାସିକ ଶୀତଳ ଷଷ୍ଠୀ ମହୋତ୍ସବ ଶାନ୍ତିଶୃଙ୍ଖଳାର ସହ ଶେଷ ହୋଇଛି।