ଆଇଆଇଟିରେ ପଢିବାକୁ ଯୋଗ୍ୟ ବିବେଚିତ ହେଲେ ବିଚରାଧୀନ କଏଦୀ

ଭୁବନେଶ୍ୱର: କଥାରେ ଅଛି ଇଛାଶକ୍ତି ଥିଲେ ସବୁକିଛି ସମ୍ଭବ । ଏହି ଉକ୍ତିକୁ ସତ ପ୍ରମାଣିତ କରିଛନ୍ତି ଜଣେ ବିଚରାଧୀନ କଏଦୀ । ପଢି ଅବିଶ୍ୱାସ ଲାଗୁଥିଲେ ବି ବିହାରର ନୱାଡା ଜେଲରେ ବନ୍ଦୀ ଜୀବନ ବିତାଉଥିବା ଜଣେ ଯୁବ କଏଦୀ ଜଏଣ୍ଟ ଆଡମିଶନ୍ ଟେଷ୍ଟ ଫର୍ ମାଷ୍ଟର୍ସ (JAM) ପ୍ରବେଶିକାରେ ଉତ୍ତୀର୍ଣ୍ଣ ହୋଇଛନ୍ତି ।

ଚଳିତବର୍ଷ ଫେବ୍ରୁଆରୀ ୧୩ ତାରିଖରେ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲଜି (ରୁର୍‌କି) ଜଏଣ୍ଟ ଆଡମିଶନ୍ ଟେଷ୍ଟ ଫର୍ ମାଷ୍ଟର୍ସ (JAM) ପ୍ରବେଶିକା ପରୀକ୍ଷା ଆୟୋଜନ କରିଥିଲେ । ଏଥିରେ ବିଚରାଧୀନ କଏଦୀ ସୁରଜ୍ କୁମାର ପଦାର୍ପଣ କରି ସଫଳତାର ଉତ୍ତୀର୍ଣ୍ଣ ହେବା ସହ ସର୍ବଭାରତୀୟ ସ୍ତରରେ ୫୪ତମ ରାଙ୍କ ହାସଲ କରିଛନ୍ତି ।

ସାଧାରଣତଃ ଆଇଆଇଟିରେ କୌଣସି ମାଷ୍ଟର୍ସ କୋର୍ସ କିମ୍ବା ପିଏଚ୍‌ଡି କରିବାକୁ ହେଲେ JAM ଟେଷ୍ଟ ପାସ୍ କରିବାକୁ ପଡିଥାଏ । ପ୍ରାୟ ବର୍ଷେ ସମୟ ଧରି ସୁରଜ ଜେଲରେ କଏଦ ଥିଲାବେଳେ ସେ ନିଜ ସ୍ୱପ୍ନକୁ କିନ୍ତୁ ଧୂଳସାତ ହେବାକୁ ଦେଇନଥିଲେ । ଜେଲରେ ଥାଇ ସୁଦ୍ଧା ଉଚ୍ଚଶିକ୍ଷା ଲାଭ କରିବାର ନିଶା ତାଙ୍କୁ ଛାଡିନଥିଲା । ଗତବର୍ଷ ଅପ୍ରେଲ୍ ୧୭ ତାରିଖଠୁ ଜେଲ କର୍ତ୍ତୃପକ୍ଷ ଓ କିଛି ଶିକ୍ଷିତ କଏଦୀଙ୍କ ସହାୟତାରେ ସେ ନିଜ ପାଠପଢା ଜାରି ରଖିଥିଲେ ।

ପୋଲିସ ରିପୋର୍ଟ ଅନୁଯାୟୀ ମୋସମା ଗାଁ ବାସିନ୍ଦା ସୁରଜ ଏକ ହତ୍ୟା ମାମଲାରେ ବିଚରାଧୀନ କଏଦୀ ଭାବେ ଜେଲରେ ସଜା କାଟୁଛନ୍ତି । ଜମିଜମା ବିବାଦକୁ ନେଇ ଗତବର୍ଷ ମାର୍ଚ୍ଚ ମାସରେ ସଂଜୟ ଯାଦବ ନାମକ ଜଣେ ବ୍ୟକ୍ତିଙ୍କୁ କେହି ହତ୍ୟା କରିଥିଲେ । ଏହି ମାମଲାରେ ସୁରଜଙ୍କ ସମେତ ଅନ୍ୟ ୯ ଜଣଙ୍କ ନାଁ ଏଫ୍‌ଆଇଆର୍‌ରେ ରହିଥିଲା । ଫଳରେ ଗିରଫଦାରୀରୁ ସେ ବର୍ତ୍ତିପାରିନଥିଲେ ।

ସୁରଜଙ୍କ ସଫଳତାକୁ ନେଇ ନୱାଡା ଜେଲ୍ ସୁପରିଟେଣ୍ଡେଣ୍ଟ ଉମେଶ କୁମାର ଭାରତୀ ବେଶ ଖୁସୀ ଅଛନ୍ତି । ଜେଲରେ ଅତ୍ୟଧିକ ଗହଳିଚହଳି ଲାଗିରହିଥାଏ । ତଥାପି ଏଭଳି ସ୍ଥିତିରେ ସୁରଜ ପାଠପଢି ଜାମ୍ ପ୍ରବେଶିକାରେ ଉତ୍ତୀର୍ଣ୍ଣ ହୋଇ ତାଙ୍କ ଦୃଢ ମାନସିକତାର ପ୍ରମାଣ ଦେଇଛନ୍ତି ।