ନିଶ୍ଚିନ୍ତକୋଇଲା: କୁଳୁକୁଳୁ ସ୍ୱରରେ ବହି ଯାଉଛି ଲୁଣା ନଦୀ । ନଦୀ ଚାରିପଟେ ଘେରି ରହିଛି ସବୁଜିମା ଭରା ବୃକ୍ଷରାଜି । ନଦୀ ପଠାରେ ବିରାଜିତ ମା ରାମଚଣ୍ଡୀ । ପ୍ରାକୃତିକ ଶୋଭା ବିମଣ୍ଡିତ ଏଇ ନଦୀକୂଳରେ ବସି ଖଡ୍ଗ ହସ୍ତା ମା’ ରାମଚଣ୍ଡୀ ଯେମିତି ଭକ୍ତଙ୍କୁ ପାଛୋଟି ନେଉଛନ୍ତି ।
ମା’ ରାମଚଣ୍ଡୀଙ୍କର ପୀଠ ରହିଛି କଟକ ନିଶ୍ଚିନ୍ତକୋଇଲି ବ୍ଲକ କେରିଲୋ ପଞ୍ଚାୟତରେ । କେରିଲୋ ବାହାରବମ୍ପୁରେ ଥିବା ମା’ଙ୍କର ଏହି ପ୍ରସିଦ୍ଧ ପୀଠକୁ ଯିବା ପାଇଁ ହେଲେ କଟକ-ଚାନ୍ଦବାଲି ରାଜ୍ୟ ରାଜପଥର ଅସୁରେଶ୍ୱର ଛକରୁ କଟିକଟା-ଜଇପୁର ପୂର୍ତ୍ତ ବିଭାଗ ରାସ୍ତା ଦେଇ ଯିବାକୁ ପଡ଼ିବ । ଲୁଣା ନଦୀର ଦକ୍ଷିଣ ପାର୍ଶ୍ଵ ବନ୍ଧ କଡ଼ରେ ରହିଛି ମା’ ଙ୍କ ପୀଠ ।
ପରିସରରେ ଥିବା ବୃକ୍ଷ ରାଜି ଏହି ପୀଠର ଶୋଭାକୁ ଆହୁରି ଦ୍ୱିଗୁଣିତ କରିବାରେ ସହାୟକ ହେଉଛି। ସକାଳର ସୁର୍ଯ୍ୟ କିରଣ ହେଉ ଅବା ମଧ୍ୟାହ୍ନ ଅବା ସାୟାହ୍ନର ସୂର୍ଯ୍ୟକିରଣ । ମା’ ରାମ ଚଣ୍ଡୀଙ୍କ ମନ୍ଦିର ବେଢା ହିଁ କେବଳ ସ୍ପର୍ଶ କରିବାରେ ସକ୍ଷମ ହୁଏ , ମନ୍ଦିରଟି ଫୁଙ୍ଗୁଳା କାନ୍ଥ ଥିଲେ ହେଁ ସୁର୍ଯ୍ୟ କିରଣ ମା ଙ୍କ ଶାଶ୍ୱତ ପ୍ରତିମୂର୍ତ୍ତିକୁ ସ୍ପର୍ଶ କରି ପାରେ ନାହିଁ ।
ମା’ ସମସ୍ତଙ୍କ ମନସ୍କାମନା ପୂରଣ କରିଥାନ୍ତି । ତେଣୁ ଭକ୍ତମାନେ ମାନସିକ ରଖି ପୀଠାରେ ମାଛ ଆଉ ଛାଗ ବଳି ଦେଇଥାନ୍ତି । ସ୍ଥାନୀୟ ଲୋକଙ୍କ କହିବା ମୁତାବକ ମା’ ପ୍ରଥମେ ନଦୀ ପଠାର ଏକ ବରଗଛ କୋରଡରେ ପୂଜା ପାଉଥିଲେ । ସମୟକ୍ରମେ ମା ଙ୍କ ପାଇଁ ମନ୍ଦିର ନିର୍ମାଣ ସହିତ ଜଳସମ୍ପଦ ବିଭାଗ ପକ୍ଷରୁ ନଦୀ ପଠା ସଂରକ୍ଷଣ ନିମନ୍ତେ ପଥର ପ୍ୟାକିଂ କରଯାଇଥିଲା । ୩୦୦୦ରୁ ଉର୍ଦ୍ଧ୍ବ ଵୃକ୍ଷ ରୋପଣ କରାଯାଇଛି। ଫଳସ୍ୱରୂପ ମା ରାମଚଣ୍ଡୀ ପୀଠ ଏବେ ବଣଭୋଜିର ପ୍ରମୁଖ ସ୍ଥାନ ପାଲଟିଛି ଉପକୂଳ ଜିଲ୍ଲାବାସୀଙ୍କ ପାଇଁ । ଯାଜପୁର ,ପୁରୀ ,କେନ୍ଦ୍ରାପଡା ,ଖୋର୍ଦ୍ଧା, ଜଗତସିଂହପୁର ଜିଲ୍ଲାର ପର୍ଯ୍ୟଟକ ମାନେ ପ୍ରତ୍ୟେକ ଦିନ ଏଠାରେ ବଣଭୋଜି କରିବାକୁ ଆସୁଛନ୍ତି। ଖାଲି ସେତିକି ନୁହେଁ ପୁରାତନ ଛାତ୍ର ଛାତ୍ରୀ ମାନେ ବନ୍ଧୁ ମିଳନ ପାଇଁ ରାମଚଣ୍ଡୀ ପୀଠ କୁ ପ୍ରଥମ ପସନ୍ଦ କରୁଛନ୍ତି।