ଓସ୍ଜାର ବାର୍ଷିକ ଉତ୍ସବ : ଅରୂପାନନ୍ଦ ରାଉତରାୟ ଓ ବୀରେନ୍ଦ୍ର ଲାକ୍ରା ପୁରସ୍କୃତ, ଅଚ୍ୟୁତ ସାମନ୍ତଙ୍କୁ ସମ୍ବର୍ଦ୍ଧନା
ଭୁବନେଶ୍ୱର : ଓସ୍ଜାର ବାର୍ଷିକ ଉତ୍ସବ ଅନୁଷ୍ଠିତ ହୋଇଯାଇଛି । ଭାରତୀୟ କ୍ରୀଡା ସାମ୍ବାଦିକ ସଂଘ ଏସ୍ଜେଏଫ୍ଆଇର ଅନୁବନ୍ଧିତ ଓଡିଶା କ୍ରୀଡା ସାମ୍ବାଦିକ ସଂଙ୍ଘର ସପ୍ତମ ପ୍ରତିଷ୍ଠା ଉତ୍ସବ ସଭାପତି ସନ୍ଦୀପ ମିଶ୍ରଙ୍କ ସଭାପତିତ୍ୱରେ ଅନୁଷ୍ଠିତ ହୋଇଛି ।ଏହି ପ୍ରତିଷ୍ଠା ଉତ୍ସବ ସମାରୋହରେ ଓଡିଶା ତଥା ଭାରତୀୟ ବାସ୍କେଟବଲ୍ ଦୁନିଆର କିମ୍ବଦନ୍ତୀ ଖେଳାଳି ଓ ପ୍ରଶିକ୍ଷକ ଅରୂପାନନ୍ଦ ରାଉତରାୟଙ୍କୁ ଓସଜା ଲାଇଫ୍ ଟାଇମ ଏବଂ ଟୋକିଓ ଅଲମ୍ପିକ୍ କାଂସ୍ୟ ବିଜେତା ଭାରତୀୟ ହକି ଦଳର ସଦସ୍ୟ ବୀରେନ୍ଦ୍ର ଲାକ୍ରାଙ୍କୁ ଓସଜା ବର୍ଷର ଶ୍ରେଷ୍ଠ ଖେଳାଳି ପୁରଷ୍କାର ପ୍ରଦାନ କରାଯାଇଥିଲା ।
ପୁରଷ୍କାର ଆକାରରେ ବିଶେଷ ଟ୍ରଫି , ପ୍ରଶସ୍ତିତ୍ର, ଉତ୍ତରୀୟ ଏବଂ ୨୫ ହଜାର ଟଙ୍କା ଚେକ୍ ଅତିଥିମାନେ ପ୍ରଦାନ ପୂର୍ବକ ଅରୂପାନନ୍ଦ ଓ ବୀରେନ୍ଦ୍ରଙ୍କୁ ସମ୍ମାନୀତ କରିଥିଲେ ।ଏହି ଅବସରରେ କିଟ୍ ଓ କିସର ପ୍ରତିଷ୍ଠାତା ତଥା ଭାରତୀୟ ଭଲିବଲ୍ ସଂଙ୍ଘର ସଭାପତି ଡ .ଅଚ୍ୟୁତ ସାମନ୍ତଙ୍କୁ କ୍ରୀଡା ବିକାଶ ଯୋଗଦାନ ପାଇଁ ଓସଜା ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା । ତାଙ୍କ ଅନୁପସ୍ଥିତିରେ ଏହି ସମ୍ମାନ ଗ୍ରହଣ କରିଥିଲେ କିଟର କ୍ରୀଡା ବିଭାଗର ଡିଜି ଗଗନେନ୍ଦୁ ଦାଶ ।
କ୍ରୀଡ଼ାବିତ୍ଙ୍କ ପ୍ରସାର କ୍ରୀଡ଼ାର ବିକାଶର ସବୁଠାରୁ ବଡ଼ ଉପାଦାନ। ଆଉ କ୍ରୀଡ଼ାବିତ୍ଙ୍କ ସଠିକ୍ ପ୍ରଚାର ଓ ପ୍ରସାର କରି ସେହି ବିକାଶର କାମକୁ ଦିଗପ୍ରଦାନ କରିବାରେ କ୍ରୀଡ଼ା ସାମ୍ବାଦିକମାନଙ୍କର ସବୁଠାରୁ ବଡ଼ ଯୋଗଦାନ ରହିଛି। ଖେଳାଳିଙ୍କ କୃତିତ୍ୱର ସଠିକ୍ ରିପୋର୍ଟ ପ୍ରସ୍ତୁତି ମାଧ୍ୟମରେ କ୍ରୀଡ଼ା ସାମ୍ବାଦିକ ଜଣଙ୍କ ଖେଳକୁ ପ୍ରସାରିତ କରିବା ଓ ଯୁବା କ୍ରୀଡ଼ାବିତ୍ମାନଙ୍କୁ ଖେଳ ସକାଶେ ପ୍ରେରିତ କରିବାର କାମ କରିଥାନ୍ତି ବୋଲି ସୋମବାର ସ୍ଥାନୀୟ କିମ୍ସ ଅଡିଟୋରିୟମରେ ଆୟୋଜିତ ଓସ୍ଜା ବା ଓଡ଼ିଶା କ୍ରୀଡ଼ା ସାମ୍ବାଦିକ ସଂଘର ବାର୍ଷିକ ଉତ୍ସବରେ ସାମିଲ ହୋଇ ଅତିଥିମାନେ ମତପ୍ରଦାନ କରିଛନ୍ତି।
ଏହି କ୍ରୀଡ଼ା ଉତ୍ସବରେ ନିଜ ଅଭିଭାଷଣ ରଖି ଭାରତୀୟ ଭାରୋତ୍ତୋଳନ ସଂଘର ସଭାପତି ସହଦେବ ଯାଦବ ଭାରୋତ୍ତୋଳନର ପ୍ରସାର ପ୍ରଚାର ପାଇଁ କ୍ରୀଡ଼ା ସାମ୍ବାଦିକମାନେ ସହଯୋଗ କରିବାକୁ ନିବେଦନ କରିଥିଲେ। ଖେଳାଳିମାନେ ଶୀଘ୍ର ଉନ୍ନତି ପାଇଁ ମାଦକ ଦ୍ରବ୍ୟର ସେବନ ନକରିବା ଉପରେ ସେ ସତର୍କ କରିବା ସହ ୨୦୨୮ ଅଲିମ୍ପିକ୍ରେ ଓଡ଼ିଶାର ଝିଲି ଦଳବେହେରା ପଦକ ପାଇବେ ବୋଲି କହିଥିଲେ। ଓଡ଼ିଶା ସରକାର ଓ କିଟ୍ ପକ୍ଷରୁ ଯେଉଁ କ୍ରୀଡ଼ା ପ୍ରୋତ୍ସାହନ କାର୍ଯ୍ୟ କରାଯାଉଛି ତାହାକୁ ସେ ଖୁବ୍ ପ୍ରଶଂସା କରିଥିଲେ। ଓସିଏ ସଭାପତି ପଙ୍କଜ ଲୋଚନ ଏବଂ ସମ୍ପାଦକ ସଂଜୟ ବେହେରା କ୍ରୀଡ଼ା ସାମ୍ବାଦିକତାର ଗୁରୁତ୍ୱ ଉପରେ କହିବା ସହ ଓସ୍ଜା ପାଇଁ ସହଯୋଗର ହାତ ବଢ଼ାଇବାର ପ୍ରତିଶ୍ରୁତି ଦେଇଥିଲେ।
କିଂବଦନ୍ତି ମିନତୀ ମହାପାତ୍ର ତାଙ୍କ ପ୍ରାରମ୍ଭିକ ଜୀବନରେ କିପରି ଏକ ଖବରକାଗଜର ପ୍ରଭାବ ତାଙ୍କ ଖେଳ ଜୀବନ ନିର୍ଦ୍ଧାରିତ କରିଥିଲା ତାହା କହିବା ସହ କ୍ରୀଡ଼ା ସାମ୍ବାଦିକମାନେ ଓଡ଼ିଶାକୁ କ୍ରୀଡ଼ା ଶକ୍ତିରେ ପରିଣତ କରିବା ଦିଗରେ ବଡ଼ ଭୂମିକା ନିଭାଉଥିବା ପ୍ରକାଶ କରିଥିଲେ। ଦୁଇ ପୁରସ୍କାର ବିଜେତା ଏହି ଭାବପୂର୍ଣ୍ଣ ସମ୍ବର୍ଦ୍ଦନା ପାଇଁ ଓସ୍ଜାକୁ ଦେଇଥିଲେ ଧନ୍ୟବାଦ୍।ଏଥିରେ ଓଡ଼ିଶାର ପ୍ରଥମ ଅର୍ଜୁନ ବିଜୟିନୀ ମିନତୀ ମହାପାତ୍ର ମୁଖ୍ୟଅତିଥି ତଥା ଭାରତୀୟ ଭାରୋତ୍ତଳନ ସଂଘର ସଭାପତି ସହଦେବ ଯାଦବ, ଏମଜିଏମ୍ ମିନେରାଲ୍ସର ଚେୟାରମ୍ୟାନ୍ ତଥା ଓସିଏ ସଭାପତି ପଙ୍କଜ ଲୋଚନ ମହାନ୍ତି ଏବଂ ଓସିଏ ସମ୍ପାଦକ ସଂଜୟ ବେହେରା ଅତିଥି ଭାବରେ ଯୋଗ ଦେଇଥିଲେ।
ଓସ୍ଜା ସମ୍ପାଦକ ସଂବିତ୍ ମହାପାତ୍ରଙ୍କ ସଂଯୋଜନାରେ ଆୟୋଜିତ ଏହି କାର୍ଯ୍ୟକ୍ରମରେ ଓସ୍ଜାର ବରିଷ୍ଠ ସଦସ୍ୟ ସୁଶାନ୍ତ ମହାନ୍ତି ସଂଘର ଗଠନଧାରା ବାବଦରେ ପ୍ରାରମ୍ଭିକ ସୂଚନା ପ୍ରଦାନ କରିଥିଲେ ତଥା ସଭାପତି ସନ୍ଦୀପ ମିଶ୍ର ଆଗାମୀ କାର୍ଯ୍ୟକ୍ରମ ବାବଦରେ ସମସ୍ତଙ୍କୁ ଅବଗତ କରିଥିଲେ। ଏହି ଉତ୍ସବରେ ଓସ୍ଜାର କାର୍ଯ୍ୟକାରୀ ସଭାପତି କେ ରବି, ସନାତନ ପାଣି, ହିମାଂଶୁ ପତି ମିଶ୍ର, ଦେବୀ ପ୍ରସନ୍ନ ମହାନ୍ତି, ସୁରେଶ ସ୍ୱାଇଁ, ତପନ ସ୍ୱାଇଁ, ସମୀକ୍ଷା ପଟ୍ଟନାୟକ, ପ୍ରତାପ ପ୍ରଧାନ, ମନୋରଞ୍ଜନ ଦାସ, ରଞ୍ଜନ ରାୟ, ଦେବୀ ପ୍ରସନ୍ନ ପାଣିଗ୍ରାହୀ, ମନମୋହନ ସ୍ୱାଇଁ, ସୁଜିତ ଦାସ, ମହେନ୍ଦ୍ର ସାହୁ, ତୁଷାର ସେନାପତି, ଦୀପ୍ତି ରଞ୍ଜନ ସାମଲ, ବିଜୟ ରଣା, ସନ୍ତୋଷ ମହାନ୍ତି, ବେଣୁଧର ଦାସ, ପ୍ରଫୁଲ୍ଲ କିଶୋର ସାହୁ, ରଶ୍ମିପ୍ରଭା ରଥ, ଶକ୍ତି ପ୍ରକାଶ ନନ୍ଦ, ଶୁଭଲକ୍ଷ୍ମୀ ବଳ ପ୍ରମୁଖ ଯୋଗ ଦେଇଥିଲେ।
Comments are closed.