ସଞ୍ଜୟ ରାଉତଙ୍କ ବଡ଼ ଦାବି: ‘ବଦଳିପାରନ୍ତି ମହାରାଷ୍ଟ୍ରର ମୁଖ୍ୟମନ୍ତ୍ରୀ’

ମୁମ୍ବାଇ: ପୁଣି ଚର୍ଚ୍ଚାରେ ଉଦ୍ଧବ ଠାକରେଙ୍କ ଶିବସେନା (UBT) ର ରାଜ୍ୟସଭା ସାଂସଦ ସଞ୍ଜୟ ରାଉତଙ୍କ ବୟାନ। ସେ ଦାବି କରିଛନ୍ତି ଯେ, ଯଦି ଆଗାମୀ ମାସ ମଧ୍ୟରେ ମହାରାଷ୍ଟ୍ର କ୍ୟାବିନେଟରେ ପୁନର୍ଗଠନ ହୁଏ, ତେବେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ କେନ୍ଦ୍ର ସରକାରକୁ ଯାଇପାରନ୍ତି ଏବଂ ତାଙ୍କ ସ୍ଥାନରେ ରାଜ୍ୟର ଜଣେ ବିଜେପି ମନ୍ତ୍ରୀ ଆସିପାରନ୍ତି। ଶିବସେନା (UBT) ର “ରାମ ରକ୍ଷା ଆନ୍ଦୋଳନ” ପୂର୍ବରୁ ନାଗପୁର ଗସ୍ତ ସମୟରେ ସଞ୍ଜୟ ରାଉତ ମିଡିଆ ସହ ଆଲୋଚନା କରୁଥିଲେ।

ଆଗାମୀ ଗୋଟିଏ କିମ୍ବା ଦୁଇ ମାସ ମଧ୍ୟରେ କେନ୍ଦ୍ର ଏବଂ ରାଜ୍ୟ କ୍ୟାବିନେଟର ସମ୍ଭାବ୍ୟ ପୁନର୍ଗଠନ ବିଷୟରେ ତାଙ୍କୁ ପଚରାଯାଇଥିଲା। ସେ କହିଥିଲେ ଯେ ସେହି ପରିସ୍ଥିତିରେ, ମହାରାଷ୍ଟ୍ରରେ କିଛି ବଡ଼ ପରିବର୍ତ୍ତନ ଦେଖାଯାଇପାରେ। ଯଦି କେନ୍ଦ୍ରରେ ପୁନର୍ଗଠନ ହୁଏ, ତେବେ ଫଡନାଭିସ୍ ଦେଶ ସେବା କରିବାକୁ ସେଠାକୁ ଯାଇପାରନ୍ତି ଏବଂ ଜଣେ ବରିଷ୍ଠ ବିଜେପି ମନ୍ତ୍ରୀ ମହାରାଷ୍ଟ୍ରର ମୁଖ୍ୟମନ୍ତ୍ରୀ ହେବାର ସମ୍ଭାବନା ରହିଛି।

ସୂଚନା ଥାଉକି ଅଯୋଧ୍ୟା ରାମ ମନ୍ଦିରରେ ଭୋଗ ଚୋରି ଅଭିଯୋଗର ପ୍ରତିବାଦରେ ଶିବସେନା (UBT) ଜୁଲାଇ ୧୮ ତାରିଖରେ ନାଗପୁରରେ ଏକ “ରାମ ରକ୍ଷା ଆନ୍ଦୋଳନ”ର ଆୟୋଜନ କରିଛି। ସଞ୍ଜୟ କହିଛନ୍ତି ଯେ ରାଷ୍ଟ୍ରୀୟ ସ୍ୱୟଂସେବକ ସଂଘ (RSS) ସମେତ ସମସ୍ତ “ହିନ୍ଦୁତ୍ୱ” ସଂଗଠନକୁ ଅଂଶଗ୍ରହଣ ପାଇଁ ନିମନ୍ତ୍ରଣ ପଠାଯାଇଛି। ବିଜେପି ସମେତ ବିଭିନ୍ନ ରାଜନୈତିକ ଦଳର ନେତା ଏବଂ ସ୍ଥାନୀୟ ବିଧାୟକମାନଙ୍କୁ ନିମନ୍ତ୍ରଣ ପଠାଯାଇଛି।”