ନୂଆଦିଲ୍ଲୀ: ତତ୍କାଳ ଟିକେଟ୍ ବୁକିଂ ସମୟରେ ଭିଡ଼ କମାଇବା ଓ ବ୍ୟବସ୍ଥାକୁ ଆହୁରି ସ୍ୱଚ୍ଛ କରିବା ପାଇଁ ରେଳବାଇ ପକ୍ଷରୁ ନୂଆ ପଦକ୍ଷେପ ନିଆଯାଇଛି। ପଶ୍ଚିମ ମଧ୍ୟ ରେଳବାଇର କୋଟା ଡିଭିଜନ ଅଧୀନରେ ଥିବା ସମସ୍ତ ଷ୍ଟେସନରେ ଏବେ ତତ୍କାଳ ବୁକିଂ ପାଇଁ ଟୋକନ ସିଷ୍ଟମ୍ ଲାଗୁ କରାଯାଇଛି। ଏହାର ଲକ୍ଷ୍ୟ ହେଉଛି ରିଜର୍ଭେସନ୍ କାଉଣ୍ଟରରେ ଲମ୍ବା ଲାଇନ୍ ଓ ଅସୁବିଧାକୁ କମାଇ ଯାତ୍ରୀଙ୍କୁ ସୁବିଧାଜନକ ବୁକିଂରେ ସହଯୋଗ କରିବା।
ନୂଆ ବ୍ୟବସ୍ଥା ଅନୁସାରେ, ଏସି କ୍ଲାସ୍ ପାଇଁ ତତ୍କାଳ ଟିକେଟ୍ ବୁକ୍ କରିବାକୁ ଆସୁଥିବା ଯାତ୍ରୀଙ୍କୁ ସକାଳ ୯ଟାରୁ ୯ଟା ୨୫ ମିନିଟ୍ ପର୍ଯ୍ୟନ୍ତ ଟୋକନ ଦିଆଯିବ। ସେହିପରି ସ୍ଲିପର କ୍ଲାସ୍ ପାଇଁ ଟୋକନ ବଣ୍ଟନ ସକାଳ ୯ଟା ୩୦ରୁ ୯ଟା ୫୫ ମିନିଟ୍ ପର୍ଯ୍ୟନ୍ତ ହେବ। ରେଳବାଇ ପକ୍ଷରୁ ଯାତ୍ରୀଙ୍କୁ ସମୟରେ କାଉଣ୍ଟରକୁ ପହଞ୍ଚିବା ଓ କର୍ମଚାରୀଙ୍କ ସହଯୋଗ କରିବାକୁ ଅନୁରୋଧ କରାଯାଇଛି।
ବର୍ତ୍ତମାନ ରେଳବାଇ ନିୟମ ଅନୁଯାୟୀ, ଏସି କ୍ଲାସ୍ ପାଇଁ ତତ୍କାଳ ବୁକିଂ ସକାଳ ୧୦ଟାରୁ ଆରମ୍ଭ ହୁଏ। ନନ୍ ଏସି କ୍ୟାଟେଗୋରି ପାଇଁ ବୁକିଂ ସକାଳ ୧୧ଟାରୁ ଆରମ୍ଭ ହୁଏ। ଏହି ବୁକିଂ ଯାତ୍ରା ତାରିଖର ଗୋଟିଏ ଦିନ ପୂର୍ବରୁ କରାଯାଏ। ଯାତ୍ରୀମାନେ ପିଆରଏସ୍ କାଉଣ୍ଟର ସହିତ ଆଇଆରସିଟିସି ୱେବସାଇଟ୍ ଓ ମୋବାଇଲ୍ ଆପ୍ ମାଧ୍ୟମରେ ମଧ୍ୟ ତତ୍କାଳ ଟିକେଟ୍ ବୁକ୍ କରିପାରିବେ। ଅନଲାଇନ୍ ବୁକିଂ ପାଇଁ ଆଧାର ପ୍ରମାଣିତ ଆକାଉଣ୍ଟ ବ୍ୟବହାର କରିହେବ।
କୋଟା ଡିଭିଜନ୍ ପଶ୍ଚିମ ରେଳ ରୁଟ୍ର ଗୁରୁତ୍ୱପୂର୍ଣ୍ଣ ଡିଭିଜନ୍ମାନଙ୍କ ମଧ୍ୟରୁ ଗୋଟିଏ। ୧ ଏପ୍ରିଲ ୧୯୫୨ରେ ଏହା ତିଆରି ହୋଇଥିଲା। ଏହାର ନେଟୱର୍କ ମୁଖ୍ୟତଃ ରାଜସ୍ଥାନକୁ ଲାଗିଥିବା ବେଳେ ମଧ୍ୟପ୍ରଦେଶ ଓ ଉତ୍ତରପ୍ରଦେଶର କିଛି ଅଂଶକୁ ମଧ୍ୟ ଛୁଇଁଛି।
ରେଳବାଇ ପକ୍ଷରୁ ରିଜର୍ଭେସନ୍ ଚାର୍ଟ ପ୍ରସ୍ତୁତି ସମ୍ପର୍କରେ ମଧ୍ୟ ନିୟମ ପୁଣି ମନେ ପକାଇଦିଆଯାଇଛି। ସକାଳ ୫ଟା ୧ ମିନିଟ୍ରୁ ଦ୍ୱିପ୍ରହର ୨ଟା ମଧ୍ୟରେ ଯାତ୍ରା ଆରମ୍ଭ କରୁଥିବା ଟ୍ରେନ୍ଗୁଡ଼ିକ ପାଇଁ ପ୍ରଥମ ରିଜର୍ଭେସନ୍ ଚାର୍ଟ ସାଧାରଣତଃ ପୂର୍ବଦିନ ରାତି ୮ଟା ସୁଦ୍ଧା ପ୍ରସ୍ତୁତ ହୁଏ। ଦ୍ୱିପ୍ରହର ୨ଟା ୧ ମିନିଟ୍ରୁ ମଧ୍ୟରାତ୍ରି ପର୍ଯ୍ୟନ୍ତ ଓ ମଧ୍ୟରାତ୍ରିରୁ ସକାଳ ୫ଟା ମଧ୍ୟରେ ଛାଡ଼ୁଥିବା ଟ୍ରେନ୍ ପାଇଁ ପ୍ରଥମ ଚାର୍ଟ ଟ୍ରେନ୍ ଛାଡ଼ିବାର ଅତି କମରେ ୧୦ ଘଣ୍ଟା ପୂର୍ବରୁ ପ୍ରସ୍ତୁତ ହୁଏ।
